“ამ კონფერენციამ კიდევ ერთხელ დაგვარწმუნა,რომ საქართველოს ჰყავს მეგობრები, რომლებიც მზად არიან საქართველოს ევროინტეგრაციის გზაზე დახმარება აღმოუჩინონ,” _ განაცხადა დავით უსუფაშვილმა კონფერენციის შედეგების შეჯამებისას და აღნიშნა, თუ რაოდენ დიდი მნიშვნელობა აქვს იმ ფაქტს, რომ კონფერენციას ესწრებოდა ლიტვის დელეგაცია როგორც ევროკავშირის თავმჯდომარე ქვეყნის წარმომადგენელი.
დავით უსუფაშვილის განცხადებით, საქართველოს სერიოზული სამუშაოების ჩატარება მოუწევს, მათ შორის საკანონმდებლო დონეზე, რათა ვილნიუსის სამიტზე რატიფიცირებული დოკუმენტები საქართველოს რეალურ ცხოვრებაში აისახოს.
“საქმე გასაკეთებელია არა ევროპელების, არამედ ქართველების მიერ, რათა მოვახერხოთ ყველა იმ სიკეთესთან ზიარება, რაც ევროპის მოქალაქეებისათვის არის ხელმისაწვდომი,” _ აღნიშნა დავით უსუფაშვილმა.
მისივე თქმით, კონფერენციის ფარგლებში ლიტვის დელეგაციასთან გამართული ორმხრივი შეხვედრები იმის სრულ გარანტიას იძლევა, რომ ორი ქვეყანა მხარდამხარ, ერთად გააგრძელებს პროგრესის, მეტი თავისუფლებისა და მეტი ეკონომიკური აღმავლობისკენ სვლას და მუდმივად მზად იქნებიან, ერთმანეთის გვერდით იყვნენ, როგორც ეს 80-იანი წლებში იყო.
ლიტვის რესპუბლიკის სეიმის თავმჯდომარე ლორეტა გრაუჟინიენეს განცხადებით, მათთვის მნიშვნელოვნია, რომ დემოკრატია საქართველოში იყოს ისეთი, რომ სახელმწიფო ემსახურებოდეს ქართველ ხალხს. მისივე თქმით, საქართველოში გამართულ შეხვედრებზე მიღებული ინფორმაციის შედეგად შეიძლება ითქვას, რომ დღეს “საქართველოსათვის ყველაზე დიდი გამოწვევა ისაა, რომ პოლიტიკოსებმა მოახდინონ ერთმანეთთან შეთანხმება, ამის გარეშე საქართველო წინ ვერ წავა”.
ლორეტა გრაუჟინიენემ ქართველ პოლიტიკოსებს კომპრომისისაკენ მოუწოდა.
“პოლიტიკა არის კომპრომისი. ეს არის ძალიან ძნელი, მაგრამ პოლიტიკოსები იმიტომ ვართ, რომ კომპრომისი შევძლოთ. პოლიტიკოსები ვალდებული არიან ნახონ კომპრომისი თავიანთი შვილებისა და მომავლისათვის,” _ განაცხადა მან.
როგორც ლიტვის რესპუბლიკის სეიმის თავმჯდომარემ განაცხადა, მის ქვეყანაში ძალიან ნერვიულობენ საქართველოს მომავალზე და სურთ, რომ დაინახონ ევროპული საქართველო.
“მსურს იაროთ იმ გზით, რომელიც აირჩიეთ და აუცილებლად დაგეხმარებით, რომ საქართველომ არ გადაუხვიოს არჩეული კურსიდან,” _ განაცხადა ლიტვის რესპუბლიკის სეიმის თავმჯდომარემ.
