ზაზა გაბუნიას განმარტებით, 2012 წლის იანვრის თვეში თბილისის მერიამ ამხანაგობის 3400 თავმჯდომარეს უმასპინძლა, რაც ბიუჯეტს ერთჯერადად 79 ათას 616 ლარი დაუჯდა.
“ამ პერიოდში, 16-26 იანვარს საკრებულოს იმდროინდელი უმრავლესობის– ნაციონალური მოძრაობის მიერ ბიუჯეტში ცვლილებების შეტანა მოხდა და სწორედ ამ ფაქტის აღნიშვნას უკავშირდება 80 000-მდე ლარის რესტორანში დახარჯვა”,_ აღნიშნა გაბუნიამ.
მისივე თქმით, 2012 წლის მარტში გაფორმებული ხელშეკრულებით ირკვევა, რომ ამავე მიზნით მერიამ 29 ათას 591 ლარი დახარჯა, ხოლო 2012 წლის 26 აპრილს განხორციელებული მომსახურების შესყიდვის თანახმად, კი ასევე მერიის მიერ 120 პერსონაზე 24 ათას 944 ლარი იქნა დახარჯული.
25 000 ლარია დახარჯული 2012 წლის 17-19 მაისს 1300 პერსონაზე.
2012 წლის 31 დეკემბერს გაფორმებული ხელშეკრულების მიხედვით კი მერიამ 250 პერსონაზე მოწყობილ ალა-ფურშეტში 11 ათას 640 ლარი დახარჯა.
“აქ მოტანილი ცალკეული შემთხვევებიდან ჩანს, რომ აღნიშნული ძვირადღირებული შეხვედრები პარტიული აქტივისტებისთვის იმართებოდა და ბიუჯეტის თანხები პარტიული ინტერესებისათვის იხარჯებოდა.
აღნიშნული ქმედებების კანონიერების დასადგენად, კერძოდ კი “მოქალაქეთა პოლიტიკური გაერთიანებების შესახებ” საქართველოს ორგანული კანონის მე-7.2 მუხლთან მიმართებით, ვთვლით, რომ ეს საკითხი სამართალდამცავი ორგანოების შემდგომის შესწავლის საგანი უნდა გახდეს”, _ აღნიშნა გაბუნიამ.
დღესვე მან აღნიშნული ფაქტების დამადასტურებელი დოკუმენტაცია ჟურნალისტებსაც მიაწოდა.
