მაია ფანჯიკიძის თქმით, საქართველო სრულად იზიარებს ევროპულ ღირებულებებსა და ფასეულობებს – დემოკრატიას, კანონის უზენაესობას, ადამიანის ფუნდამენტურ უფლებათა პატივისცემას. ხელისუფლების მიზანია ჩაატაროს გამჭვირვალე, თავისუფალი და სამართლიანი საპრეზიდენტო არჩევნები, საერთაშორისო სტანდარტებთან სრულ შესაბამისობაში.
“ჩვენი მიზანი ჩავატაროთ გამჭვირვალე, თავისუფალი და სამართლიანი არჩევნები საერთაშორისო სტანდარტებისა და საუკეთესო დემოკრატიული პრაქტიკის შესაბამისად, არასდროს ყოფილა ასეთი მტკიცე, როგორც ეს არის დღეს.
მთელი წლის მანძილზე, საქართველოს ხელისუფლებამ ძალისხმევა არ დაიშურა რათა შეექმნა სამართლიანი, თანაბარი და კონკურენტული გარემო 2013 წლის ოქტომბრის საპრეზიდენტო არჩევნების ჩასატარებლად. დარწმუნებულნი ვართ, რომ ეს არჩევნები სამაგალითო იქნება და კიდევ ერთხელ დაამტკიცებს ჩვენს ერთგულებას დემოკრატიული ფასეულობებისადმი, რაც მჟღავნდება ჩვენს კონკრეტულ მოქმედებებში. აღმოსავლეთ პარტნიორობის ვილნიუსის სამიტის მოახლოების ფონზე, ეს კიდევ ერთხელ დაარწმუნებს ჩვენს პარტნიორებს, თუ რამდენად მნიშვნელოვანია საქართველოსთვის მათი მხარდაჭერა ქვეყნის ევროპული და ევრო-ატლანტიკური ინტეგრაციის გზაზე.
იმედი გვაქვს, რომ საერთაშორისო დამკვირვებლები პარტნიორი ქვეყნებიდან, არასამთავრობო ინსტიტუტებიდან და სხვა საერთაშორისო ორგანიზაციებიდან დახმარებას გაგვიწევენ სამაგალითო დემოკრატიული არჩევნების ჩატარებაში. მოხარულები ვართ, რომ ეუთოს დემოკრატიული ინსტიტუტებისა და ადამიანის უფლებების ოფისმა თბილისში გამოაგზავნა სადამკვირვებლო მისია, რომელსაც ბატონი მატეო მეკაჩი ხელმძღვანელობს, და რომ სექტემბრის შუა რიცხვებში გრძელვადიანი დამკვირვებლების ჯგუფი მუშაობას შეუდგა. გვსურს, ასევე, მადლობა გადავუხადოთ ეუთოს საპარლამენტო ასამბლეას საქართველოში დამკვირვებელთა მისიის გამოგზავნის გამო,” _ განაცხადა მაია ფანჯიკიძემ.
საქართველოს საგარეო საქმეთა მინისტრმა ისაუბრა საქართველოს ხელისუფლების მიერ გატარებულ რეფორმებზე სამართლის სფეროში, სამოქალაქო საზოგადოების აქტიური ჩართულობის როლზე, გენდერულ თანასწორობასა და ბავშვთა უფლებებზე. მინისტრმა ხაზი გაუსვა საქართველოსა და ეუთო-ს შორის ნაყოფიერი თანამშრომლობის მნიშვნელობას მედიის თავისუფლებისა და ეროვნული უმცირესობების საკითხებში.
