_ ყველა შეხვედრაზე ტრადიციულად გაისმის რიტორიკული ფრაზები, საერთაშორისო პოლიტიკის მიმოხილვა, ახალი მთავრობის მიერ შესრულებულ დაპირებათა ჩამონათვალი და ახალი დაპირებები, რომელებიც აუცილებლად შესრულდება მომავალში, თუ მოსახლეობა კვლავ ენდობა “ქართულ ონებას”.
10 ოქტომბერს,ლანჩხუთის მუნიციპალიტეტის გვიმბალაურის ტერიტორიულ ერთეულში შემავალ სოფელ ჯუნეწერში გამართულ შეხვედრას საკმაოდ ბევრი ამომრჩეველი ესწრებოდა. თუ ჯუნეწრელი ამომრჩეველი შარშანდელ არჩევნებში დიდი აქტივობით გამოირჩეოდა, წელს ეს ტემპი შედარებით დავარდნილია.
შეხვედრა “ქართული ოცნების” ადგილობრივი შტაბის წევრებთან გადათხრილი ორმოების ფონზე მიმდინარეობდა. ერთი კვირაა სოფელში წყლის სისტემის სარეაბილიტაციო სამუშაოები მიმდინარეობს და ავტოტრანსპორტით გადაადგილება საკმაოდ გართულებულია.
შეხვედრას შტაბის ერთ-ერთი ყველაზე აქტიური სახე ნუგზარ ცინცაძე უძღვებოდა. იგი ადგილობრივი “ოცნების” შეუცვლელი ორატორია, შარშანდელი წინასაარჩევნო შეხვედრების “წამყვანი ძალა.” მან ისაუბრა მთავრობის სამომავლო გეგმებზე, გაკეთებულ საქმეებზე, ყბადაღებული კოჰაბიტაციის დამთავრების აუცილებლობაზე, მომავალ ადგილობრივ არჩევნებზე, რომელიც მისი თქმით, გადამწყვეტ როლს ითამაშებს ქვეყნის სასიკეთოდ შემობრუნების გზაზე…
შეხვედრას ადგილობრივი შტაბის რამდენიმე წევრიც ესწრებოდა. “ქართული ოცნების” ლანჩხუთის შტაბის სამედიცინო და სოციალურ საკითხთა კოორდინატორმა, ექიმმა მიხეილ ბარამიძემ ადგილობრივ მოსახლეობას ერთიანი სამედიცინო დაზღვევის ნიუანსები და დეტალები განუმარტა და მათ შეკითხვებსაც უპასუხა. მოსახლეობის მცირე უკმაყოფილება გამოიწვია ექიმ-კოორდინატორის განმარტებამ გეგმიური ოპერაციების დაფინანსების შესახებ. როგორც მიხეილ ბარამიძემ აღნიშნა, თუ პაციენტს სურს სახელმწიფომ მისი გეგმიური ოპერაცია დააფინანსოს, მან შეუძლებელი უნდა შეძლოს და ბიუროკრატიულ ბარიერთა მთელი სისტემა უნდა გადალახოს _ უნდა დარეგისტრირდეს რეგიონალური სადაზღვევო ცენტრის ბაზაში, რომელიც ოზურგეთში მდებარეობს; უნდა აიღოს სამედიცინო ცნობა, ე.წ. “ფორმა ასი”, უნდა შეუერთდეს ოპერაციების მრავალრიცხოვან მსურველთა რიგს და თუ რეგიონული სადაზღვევო ცენტრი დადებითად შეაფასებს მის მდგომარეობას და რომელიმე კლინიკაში მიავლენს საოპერაციოდ, პაციენტმა უნდა ჩათვალოს, რომ გაუმართლა. “ამასობაში ქე გამძვრება სული!” _ იხუმრა ერთ-ერთმა ადგილობრივმა.
ამომრჩეველებმა შეხვდრის ბოლოს, საკუთარ პრობლემებზეც გადაიტანა შტაბის წევრების ყურადღება. ჯუნეწერი ლანჩხუთის ცენტრიდან სამი კილომეტრითაა დაშორებული. მანძილის გამო მოსახლეობას ძალიან უჭირს პატარების საბავშვო ბაღებში ტარება. ისინი “ოცნების” კოორდინატორებისგან ადგილობრივ მთავრობასთან შუამავლობას ითხოვდნენ, რომ როგორმე დადებითად გადაწყდეს ბავშვების სახელმწიფო ტრანსპორტით გადაყვანის საკითხი.
“ჩვენ არ შეგვიძლია რომელიმე კონკრეტული პრობლემის საკუთარი ძალებით მოგვარება და არც ვაპირებთ, რომ დაგპირდეთ და არ შევასრულოთ დანაპირები. ჩვენ მხოლოდ ის შეგვიძლია, რომ ადგილობრივ თვითმმართველ ორგანოებამდე მივიტანოთ თქვენი გასაჭირი, ვუთხრათ მათ თქვენს პრობლემებზე, მათი პრეროგატივაა თქვენი სოციალური პრობლემების მოწესრიგება,” _ ასეთი განცხადება გააკეთა შეხვედრის ბოლოს შტაბის ერთ-ერთმა ახალგაზრდა წევრმა გელა კილაძემ.
სოფელში ძალიან დიდია უმუშევართა რაოდენობა. ამ პრობლემის მოსაგვარებლად მოსახლეობას ასეთი მოთხოვნა აქვს ადგილობრივ მთავრობასთან: სოფელში შარშან საფუძვლიანად გარემონტდა კლუბი, რომელიც ახლა უფუნქციოდაა დარჩენილი და უპატრონობით ისევ ფუჭდება. ხალხის მოთხოვნაა, ამ კარგად მოწესრიგებულ შენობაში საბავშვო ბაღი გაიხსნას და ადგილობრივი კადრებიც დასაქმდნენ. რაიონული შტაბის ზონის კოორდინატორი მამუკა ჭყონია დაპირდა მოსახლეობას, რომ შეეცდება ამ საკითხით რაიონული გამგეობა დააინტერესოს.
მმართველი ძალის წინასაარჩევნო შეხვედრები ერთი დეტალით მაინც განსხვავდება წინა მთავრობის მიერ წარმოებული სააგიტაციო ხასიათის მსგავსი აქციებისგან _ წლევანდელ შეხვედრებზე ძალით აღარ მოყავთ მხარდამჭერები, აღარც ძველებური პათოსი იგრძნობა და აღარც სახელმწიფო დროშებს აფრიალებენ პარტიულ ტანსაცმელში გამოწყობილი აქტივისტები. და კიდევ, არც დღევანდელ და არც ერთ შეხვედრაზე არ გამოჩენილან გამგეობის და სხვა საჯარო სამსახურების თანამშრომლები.
