იუსტიციის მინისტრ თეა წულუკიანის განცხადებით, უწყებათაშორისი კომისიის წევრებმა რამდენიმე აქტუალურ საკითხზე იმსჯელეს. მათი ყურადღების ცენტრში მოექცა ქედის საკრებულოსა და გამგეობაში მიმდინარე პროცესები; რეგისტრაციიდან მოხსნილ პირთა პრობლემები და სხვ. კომისიამ რამდენიმე არასამთავრობო ორგანიზაციის მიერ მიწოდებული ინფორმაციებიც განიხილა.
“დღეს ჩვენ გამოვეცით რეკომენდაცია, სადაც “ქართული ოცნებისა” და “ნაციონალური მოძრაობის” წარმომადგენლებს მოვუწოდეთ, სასწრაფოდ შეწყვიტონ ქედაში ურთიერთიმპიჩმენტის პროცედურები. ნაციონალები ცდილობენ გამგებლის იმპიჩმენტს, “ქართული ოცნება” კი − საკრებულოს თავმჯდომარის გადაყენებას. ადგილობრივმა ხელისუფლებამ უნდა შეძლოს ერთად მუშაობა, ეს მათი ვალდებულებაა,” _ განაცხადა თეა წულუკიანმა და დასძინა, რომ საკადრო გადაადგილებები თვითმმართველობებში ყველა პოლიტიკური ძალისათვის საზიანო იქნება.
იუსტიციის მინისტრმა იმ კონკრეტულ შედეგებზეც ისაუბრა, რაც “ქართული ოცნების” მხარდამჭერთა მხრიდან კონკურენტების აქტივისტთა შესაძლო ფიზიკურ შეურაცხყოფას მოჰყვა. მინისტრის თქმით, წინასაარჩევნო პერიოდში ორი ასეთი შემთხვევა დაფიქსირდა. პირველ საქმეზე გამამტყუნებელი განაჩენი უკვე დამდგარია, ხოლო მეორე − კალაშოვის, საქმეზე ინტენსიური გამოძიება მიმდინარეობს, რომლის წინასასამართლო სხდომა დღესაა დანიშნული.
“თავისუფალი და სამართლიანი არჩევნებისათვის” უწყებათაშორისი კომისიის მომდევნო სხდომა 24 ოქტომბერს, 11 საათზე, გაიმართება. თუმცა, კომისია მუშაობას არჩევნების დასრულების შემდეგ − მისი საბოლოო შედეგების გამოცხადებამდე გააგრძელებს.
