ოზურგეთში სამედიცინო დაწესებულებებში მომუშავე პერსონალი, “გურია ნიუსთან” საუბარში აღნიშნავს, რომ ჯანდაცვის სფეროში დღეს ძალიან დიდი ქაოსია. მათი უმრავლესობა სამსახურიდან გათავისუფლებას ელოდება და რამდენიმე თვეა, არ აქვთ მიღებული სადაზღვევო კომპანიებისგან კუთვნილი სახელფასო ანაზღაურება. ზოგ მათგანს ისედაც მწირი ხელფასი შეუმცირდა, თუმცა რატომ, არც თვითონ იციან. მათი თქმით, მედპერსონალს სახელმწიფო ვეღარ იცავს, წინა წლების მრავალი თვის მიუღებელ ხელფასსა და ამჟამად დაგვიანებული სამი თვის სახელფასო ანაზღაურებაზე არავინ საუბრობს. მედიკოსების განმარტებით, სამედიცინო დაწესებულებები ერთი კლინიკის ხელში მოექცევა და სამედიცინო დაწესებულებებს მენეჯმენტს მხოლოდ ერთადერთი კომპანია _ “ავერსი” გაუწევს.
რა ბედი ეწევა ოზურგეთში სამედიცინო დაწესებულებებს, აპირებენ თუ არა მათი დირექტორები “ავერსის” კლინიკაში გადასვლას და რა პრობლემებია დღეს აქაურ სამედიცინო საზოგადოებაში, ამის შესახებ “გურია ნიუსი” ოზურგეთის სამშობიარო სახლის დირექტორს, დავით მდინარაძეს და ბავშვთა სამკურნალო ცენტრის დირექტორს, დავით მდინარაძეს ესაუბრა. პოლიკლინიკურ-ამბულატორიული გაერთიანების დირექტორმა მანანა კოპლატაძემ კომენტარის გაკეთებისგან თავი შეიკავა, ხოლო ბევრმა ექიმმა და ექთანმა, რომლებმაც პრობლემებზე ისაუბრეს, გვთხოვეს, მათი ვინაობა არ დაგვესახელებინა.
_ ეს სახელმწიფო პოლიტიკაა, რომელსაც წინ, სამწუხაროდ, ვერავინ აღუდგება _ გურიაში ტენდერი მოიგო სადაზღვევო კომპანია “ალფამ,” ეს კი ნიშნავს, რომ მეც და თქვენც, სურვილიც რომ გვქონდეს, სხვა სადაზღვევო კომპანიაში ვერ დავეზღვევით. ეს არის მონოპოლია! რა მოხდება ხვალ, არ ვიცით. ექთანებს დაბალი ხელფასი აქვთ, რამდენიმე წლის კი საერთოდ არ აუღიათ. პრეზიდენტი მაშინ დაგვპირდა, რომ ძველი ხელფასები დაგვირიგდებოდა. სამი თვე გადის უკვე, სადაზღვევო კომპანიებისგან კი კუთვნილი სახელფასო ანაზღაურება არ მიგვიღია. იცით, რა ცუდ დღეში არიან ექიმები? არ იციან, რა ხდება მათ თავს. მხოლოდ ის ვიცით, რომ მალე დაიწყება შემცირებები, რეორგანიზაცია. ამდენ თანამშრომელს რომ უმუშევრად დატოვებენ, ნორმალურია? რამდენი გამოცდა უნდა ჩავაბაროთ? ან გვექნება იმის შანსი, რომ მიგვიღებენ და დაგვაწყებინებენ სამსახურს? ხმის ამოღების უნდა გეშინოდეს _ აი, ახლა თქვენც რომ გესაუბრებით, საშიშია. მკაცრად ვართ გაფრთხილებული, რომ არ ვილაპარაკოთ, _ აღნიშნეს “გურია ნიუსთან” საუბარში მედიკოსებმა.
ბავშვთა სამკურნალო ცენტრის დირექტორი დავით მდინარაძე: _ სადაზღვევო კომპანიებს აპრილის თანხა არ აქვთ ჩამორიცხული. მაგ მხრივ ცუდი სიტუაციაა. ის, რომ ახალი კლინიკა შენდება, კარგია, ყველა განყოფილება ერთ კომპლექსში იქნება თავმოყრილი. ეს თანამედროვე ტიპის კლინიკა მაღალ დონეზე მოემსახურება პოლისიანს და არაპოლისიანსაც. ალბათ, გარკვეულწილად შეექმნება პრობლემა ჩვენს ბავშვთა სამკურნალო ცენტრს _ იქნება კონკურენცია და როდესაც იქ გადავა სახელმწიფო პროგრამები და დაზღვევა, მაშინ მე გამიჭირდება ამ სამედიცინო პერსონალის შენახვა. წარმოუდგენელია, მე ისეთი ინვესტიცია მოვიზიდო, რომელიც კონკურენციას გაუწევს “ავერსის” კლინიკას. შეიძლება, შემომთავაზონ ახალ კლინიკაში მუშაობა, რაზეც უარს ვერ ვიტყვი. დანარჩენს მომავალი გვიჩვენებს.
ოზურგეთის სამშობიარო სახლის დირექტორი დავით მდინარაძე ერთადერთი რესპონდენტი აღმოჩნდა, რომელიც ამ საკითხზე ღიად საუბრობს: _ ეს კლინიკა, თავისთავად, კონკურენტი იქნება, მაგრამ ჩემი აზრით, ეს ჯანსაღი კონკურენცია ვერ იქნება. ოზურგეთში და მთლიანად გურიაში, მოსახლეობის 99% გადახდისუუნაროა. რაც შეეხება იმას, რომ ჩვენ წავალთ თუ არ წავალთ, ბევრს არ ნიშნავს. ეს შენობა ეკონომიკის სამინისტროს ბალანსზეა და არ არის ჩვენი საკუთრება. ხვალ რას გვეტყვის იგივე ეკონომიკის სამინისტრო, არ ვიცით.
_ რა პრობლემებია თქვენ სამედიცინო დაწესებულებაში?
_ სრული ქაოსია ხელფასებთან დაკავშირებით და კონკრეტულ პასუხსაც არავინ იძლევა. ხელშეკრულებების ყოველგვარი ვადა, რომლებიც სადაზღვევო კომპანიებთან მაქვს დადებული, დარღვეულია. აი, მაგალითად, “აი სი” ჯგუფი _ იანვარი და აპრილი მიუღებელია; “არქიმედეს გლობალ ჯორჯია” _ თებერვალი და აპრილი მიუღებელია; “იმედი ლ” _ მარტი, აპრილი მიუღებელია. ერთ-ერთ სადაზღვევო კომპანიას მარტო აპრილში 11 206 ლარი აქვს ჩვენი ვალი! ამის შემდეგ რაზე უნდა ვისაუბროთ?! მედპერსონალს ხელფასი თუ არ მიეცი, რა ქნას? ან მე რა ვქნა? სადაზღვევო კომპანიები, ხელშეკრულებაში მითითებულ ჩვენს მიერ შესრულებულ სამუშაოების ღირებულებას გარკვეულ დროში უნდა გვიფარავდნენ, მათ ყოველგვარ ვადას უკვე გადააცილეს. ჩვენ რომ რაღაც შეგვეშალოს, ავტომატურად გვაჭრიან თანხებს. მარტივად რომ გითხრათ, ჩვენ იმათ პასუხს ვერ ვთხოვთ, ისინი კი გვჩაგრავენ. სასამართლოში რომ ვუჩივლოთ, ესეც რთულ პროცედურებთანაა დაკავშირებული, უნდა გადავიხადოთ ბაჟი და ხელში ბოლოს რომ არაფერი გვექნება, ვიცით. ათასი კომუნალური ხარჯები გვაქვს _ დენი, წყალი, მედიკამენტი… ისინი ნისიად არაფერს გვაძლევენ და ორი-სამი თვე რომ ფული არ მოვა, დაწესებულებამ როგორ უნდა იარსებოს?
რაც შეეხება ჩემ გადასვლას ან არგადასვლას “ავერსის” კლინიკაში, ეს ჩემთვის ძალიან მტკივნეული თემაა. აქ ყველაფერი ჩვენი გაკეთებულია, ჩემი თითოეული თანამშრომლის. არ არის აუცილებელი, გადავიდე. თუ იქნება ჩემთვის მისაღები პირობები, ვნახოთ. მე ისიც არ ვიცი, იქ რამდენი საწოლი იქნება და სამშობიაროსთვის რამდენს მოიაზრებენ. ის საავადმყოფო ყველა აქაურ პერსონალს ვერ დაიტევს. მე მაქვს სახელმწიფო სერტიფიკატი და გამოცდა სახელმწიფოს უკვე ჩავაბარე, ამიტომ სხვაგან არ ვაპირებ გამოცდის ჩაბარებას – ეს ჩემი ღირსების შელახვაა. სამწუხაროდ, ვხვდები და ვიცი, რომ ჩვენს სასიკეთოდ კარგი არაფერი იქნება. შევეცდები, ბოლომდე აქ ვიყო და შევინარჩუნო ეს ცენტრი.
_ კონკურენციაზე რას იტყვით?
_ კონკურენცია არ არის ჯანსაღი და ყველას ერთნაირი პირობები არ აქვს. სახელმწიფო დაწესებულებები გაკოტრდებიან და ძალიან ბევრი ადამიანი დარჩება უმუშევარი, რაც სერიოზულ პრობლემას შექმნის.
_ ამ ფონზე შეიძლება, რეფორმა წარმატებულად მივიჩნიოთ?
_ ოზურგეთში ამ სახელმწიფო დაწესებულებებს რაღაც უნდა ეშველოს. ვერც ერთი მთავარი ექიმი, როგორი კარგი მენეჯერიც არ უნდა იყოს, ამ საავადმყოფოს ვერ უშველის იმიტომ, რომ მას არანაირი ფინანსური სახსარი არ გააჩნია. თუ სახელმწიფოსია, სახელმწიფომ უნდა მიხედოს. ევროკავშირის ქვეყნების სამედიცინო დაწესებულებების 70% სახელმწიფო მფლობელობაშია, აქ კი არც ერთი სახელმწიფო სამედიცინო დაწესებულება აღარ იქნება. ამის ილუზია არავის არ უნდა ჰქონდეს. 2012 წლის პირველი იანვრიდან უკვე ყველა სამედიცინო დაწესებულებაში უნდა იყოს ცენტრალური გათბობა და კლიმატკონტროლი. ამის გაკეთებას ვერც ერთი საავადმყოფო ვერ შეძლებს საკუთარი სახსრებით და თავისთავად განწირულია.
სოციალური მომსახურების სააგენტოს გურიის საკოორდინაციო ცენტრის უფროსი ვასილ ხომერიკი “გურია ნიუსთან” საუბარში ამბობს, რომ სადაზღვევო კომპანიების დავალიანებების გამო, სააგენტო საქმის კურსში არ იყო.
_ სააგენტო ამ დავალიანების შესახებ საქმის კურსში არ იყო. ამის შესახებ სამედიცინო დაწესებულებებმა აუცილებლად ოპერატიულად უნდა შეატყობინონ მედიაციის ცენტრს, რომელიც, დარწმუნებული ვარ, რეაგირებას ძალიან მალე გააკეთებს. მე, პირადად, დღესვე დავუკავშირდები მედიაციის სამსახურს და გავარკვევ ყველაფერს. თუ დაწესებულება თავად ვერ დაუკავშირდა, ჩვენთვის ეთქვა და მე დავუკავშირდებოდი მედიაციის სამსახურს.
_ დავით მდინარაძე ამბობს, რომ მან კომპეტენტური პირი ვერ ნახა, რომელიც ამაზე პასუხს გასცემდა.
_ დათოს არ ჰქონია ინფორმაცია, რომ მედიაციის სამსახური არის კომპეტენტური პირი ამ საკითხში და მას უნდა დაკავშირდებოდა. დაწესებულებების ხელმძღვანელები გაცილებით აქტიურები უნდა იყვნენ საკუთარი დავალიანების მისაღებად.
ჩვენ შევეცადეთ, ამ საკითხზე “ალფას” გურიის წარმომადგენლების აზრი მოგვესმინა, მაგრამ მათ კომენტარზე სასტიკი უარი გვითხრეს, რის შემდეგაც თბილისში, “ალფას” პიარ-მენეჯერს ლალი ბრეგვაძეს დავუკავშირდით: _ “ალფა” არც ერთ ექიმს ოფიციალურად თანხას არ უხდის _ ჩვენ ფულს სამედიცინო დაწესებულებებს ვურიცხავთ. აპრილის თანხა უკვე გადარიცხულია, მაისის _ 25 ივნისამდე გადაირიცხება. ასე რომ, სამუშაოების ღირებულებას ჩვენ დაგვიანებით არ ვფარავთ, ამიტომ, მედპერსონალმა საკუთარი პრობლემების შესახებ თავიანთ ხელმძღვანელობას მიმართოს, _ გვითხრა ბრეგვაძემ.
