თუმცა, არსებობს პრობლემები, რომელიც საოლქოს დამატებითი ფართების დაქირავებით გაუჩნდა _ ოსეფაიშვილი აღნიშნავს, რომ წელს 14 საარჩევნო უბნისთვის ფართის დაქირავება მოუხდათ, რაც დაახლოებით 5 000 ლარი დაჯდა.
ქუთაისის საოლქო საარჩევნო კომისიის მთლიან ბიუჯეტი 60 000 ლარს შეადგენს. დღეიდან საარჩევნო უბნების ინვენტარიზაცია დაიწყება. ოსეფაიშვილის თქმით, ძველ მისამართებზე დარეგისტრირებული ამომრჩევლის პრობლემა ისევ გადაუჭრელი რჩება, არამხოლოდ ქუთაისის, ქვეყნის მასშტაბითაც. რაც შეეხება გარდაცვლილებს, მათი გარდაცვლილად დარეგისტრირება ისევ ოჯახის წევრის კეთილ ნებაზეა დამოკიდებული. თუმცა,როგორც საოლქო კომისიის თავმჯდომარე აღნიშნავს, ამ კუთხით წელს მდგომარეობა გაუმჯობესებულია. 127 საარჩევნო უბნიდან ქუთაისში, ორი სპეციალური უბანი არსებობს:მესამე ქვეითი ბრიგადა და ქუთაისის N 2 სასჯელაღსრულების დაწესებულება.
ოსეფაიშვილი ამბობს, რომ არჩევნებისდამი ინტერესი მოსახლეობაში დაბალია, რაც იმაში გამოიხატება, რომ ამ დრომდე საოლქოს მხოლოდ 10-მა ამომრჩეველმა მიმართა სიის გადასამოწმებლად, რაც მისივე თქმით, სამწუხარო რიცხვია და ამომრჩევლის დაბალ თვითშეგნებაზე მიუთითებს.
“ამომრჩევლის ბარათების დარიგების პირველი ეტაპი დასრულებულია. წელს პირველი ეტაპი ცოტა ადრე დაიწყო, როდესაც ჩვენ საშუალება გვქონდა კარდაკარ შემოგვევლო და ამომრჩევლის ბარათი დაგვერიგებინა. თან გაგვერკვია, ვინ არ ცხოვრობს აქ, ვინ _ უცხოეთშია. ოჯახის წევრებმა ვისზეც განაცხადეს, რომ გარდაცვლილია, მათი დარეგისტრირება, როგორც გარდაცვლილების, გახორციელებულია. ვინც დააფიქსირა, რომ ქვეყნიდან გასულია ესეც დარეგულირებულია. გეტყვით ყველაზე სამწუხარო ციფრს _ ამხელა ქალაქში საკუთარი თავის სიაში გადასამოწმებლად საარჩევნო უბნებს მიმართა მხოლოდ ათმა კაცმა მიმართა. ამომრჩევლის თვითშეგენის დონე დაბალია ქუთაისში. აქ ამომრჩეველი ამ დროისთვის 158 000 კაცს შეადგენს. აქედან 14 000 სტატუსიანი იქნება ანუ ისინი ვინც სამხედრო სავალდებულო სამსახურში არიან, უცხოეთში იმყოფებიან, საკონსულო აღრიცხვაზე თუ საპატიმროში. ჩვენ ერთი დიდი უბედურება გვჭირს ქვეყნის მასშტაბით და ეს მხოლოდ ქუთაისი არ არის _ ძალიან ბევრი ადამიანია ისეთი, რომელსაც დღემდე არ შეუცვლია რეგისტრაციის ადგილი, ანუ გაყიდა ბინა 10-15 წლის უკან და ისევ იმ მისამართზეა დარეგისტრირებული. ძალიან მძიმე სიტუაცია გვექმნება უბნების დისლოკაციის ადგილებთან დაკავშირებით. წელს იძულებული გავხდით, 14 საუბნო საარჩევნო კომისიისათვის დაგვექირავებინა ოფისები. ეს დამატებითი ხარჯებია _ ამ ოფისებისთვის 5 000 ლარია საჭირო,” _ გვითხრა ქუთაისი 59-ე საოლქო საარჩევნო კომისიის თავმჯდომარემ ავთანდილ ოსეფაიშვილმა.
ფოტო: newpress.ge
