კოალიციას რუსთაველის მეტროსთან 5 დღის განმავლობაში კარავი ჰქონდა გაშლილი, სადაც ყველა მსურველს შეეძლო რეგისტრაციის გავლა ორგანიზაციის დამკვირვებლად.
“თუ თითოეული ჩვენგანი ვთანხმდებით, რომ ამ ქვეყანაში ერთხელ და სამუდამოდ ჩატარდეს გაუყალბებელი არჩევნები, მაშინ ეს თანამონაწილეობა ყველამ რაღაც ფორმით უნდა გავიღოთ. ფორმა ასეთია, საარჩევნო ყუთთან უნდა მოხდეს ყველა ამომრჩევლის ფოტორეგისტრაცია. ეს პროექტი ჩვენ შევთავაზეთ საქართველოს პარლამენტს რომ მიეღო კანონის სახით, განეხორციელებინათ ფოტორეგისტრაცია თავისი რესურსებით ყველა საარჩევნო უბანზე. თუმცა პარლამენტმა გადადო ეს პროექტი და მისი განხილვა ნოემბერში დაგეგმა. ჩვენ ეს პროექტი წარდგენილი გვაქვს ყველგან. მისი განხილვა მოხდა უწებათაშორისი კომისიის მიერაც. სამწუხაროდ, ცეესკომ დაიჭირა ისეთი პოზიცია, რომ მისი ქმედებები გაწერილია საარჩევნო კოდექსით და კანონს ვერ დაარღვევს. ჩვენ ეს გვესმის. მაგრამ ის ორგანიზაციები, რომლებიც წლების მანძილზე აკვირდებობდნენ საარჩევნო პროცესს, აწარმოებდნენ ფოტო და ვიდეო გადაღებას, დღეს ამ პროექტს ეწინააღმდეგებიან,” _ აღნიშნავს მიხეილ ანდღულაძე.
პროცედურების შესახებ ინფორმაცია, თუ როგორ აპირებენ “ერთსულოვნების” დამკვირვებლები ამომრჩევლის რეგისტრაციას, ორგანიზაციამ ცესკოშიც წარადგინა და მისგან წერილობითი პასუხიც მიიღო. როგორც ცესკოს პრესსპიკერი ეკა აზარაშვილი აცხადებს, ცენტრალური საარჩევნო კომისია ერთი სადამკვირებლო ორგანიზაციისთვის ახალ საარჩევნო პროცედურებს ვერ შემოიღებს და ამიტომ ამგვარ პროექტზე უარი განაცხადეს.
“მათ წერილში გარდა ფოტორეგისტრაციისა, საუბარი იყო პერსონალურ მონაცემებზე. ფოტოს ისე უღებენ ამომრჩევლებს, სადაც პირადობის მოწმობა და პირადი ნომერიც ჩანს. “პერსონალრი მონაცემების შესახებ კანონის” მიხედვით არ შეიძლება კონკრეტული პირის თანხმობის გარეშე მისი გადაღება. საუბარი იყო ასევე იმაზე, რომ თუ კონკრეტული ამომრჩეველი უარს იტყვის გადაღებაზე, მათი დამკვირვებლები მაინც გააკეთებენ ამას. რაც არის კანონდარღვევა”.
კოალიცია “ერთსულოვნებას” ცესკოში აკრედიტაცია გავლილი აქვს. აზარაშვილის თქმით, თუ მათი დამკვირვებლები უბანზე კანონის შესაბამისად იმოქმედებენ, ცესკოს პრეტენზია არ ექნება, ხოლო რაც ამოვარდნილი იქნება საარჩევნო კანონმდებლობიდან, მასზე ადმინისტრაცია მოახდენს რეაგირებას.
თუ “ერთსულოვნების” დამკვირვებლების მიერ განხორციელებული პროცედურები საარჩევნო პროცესს შეაფერხებს, ასეთ შემთხვევაში “ფონდი საერთაშორისო გამჭვირვალობა-საქართველოც” მოახდენს რეაგირებას. ორგანიზაციის იურისტის, გიგი ჩიხლაძის თქმით, ფონდის დამკვირვებლები შესაბამის კომისიებს წარუდგენენ საჩივარს და თუ გამოჩნდება, რომ კომისიის მხრიდან ადეკვატური რეაქციები არ არის, მსგავს ფაქტებს ზემდგომ ორგანოებში გაასაჩივრებენ.
“ერთსულოვნების” ამ განზრახვამ ძალიან ბევრი სამართლებრივი დარღვევა შეიძლება წარმოშვას. ამომრჩევლების ფოტორეგისტრაცია ხელს შეუშლის პროცესებს საარჩევნო უბანზე. ისედაც დატვირთულ საარჩევნო პროცედურებს როცა კიდევ რამდენიმე დაემატება, მხოლოდ და მხოლოდ იმიტომ, რომ რომელიღაც ოგანიზაციას ასე სჭირდება, ეს პირდაპირ გაართულებს პროცესს. პირადობის მოწმობის ჩამორთმევამ და მის ფონზე სურათის გადაღებამ, შეიძლება ამომრჩეველი შეცდომაში შეიყვანოს. სავსებით მოსალოდნელია მას გაუჩნდეს განცდა, რომ საარჩევნო ადმინისტრაციიდან ვინმე თხოვს პირადობას და სურათის გადაღებას. ან კიდევ პროტესტი გაუჩნდეს და საერთოდ არ მისცეს გადაღების უფლება. თუ “ერთსულოვნების” დამკვირვებლები მაინც თვითნებურად იმოქმედებენ, ჩემი აზრით, საარჩევნო უბნის თავმჯდომარეებმა უნდა მიიღონ მათი უბნიდან გაძევების გადაწყვეტილება. უბანს გარეთ კი შეუძლიათ ფოტრეგისტრაციის განხორციელება. ამაზე არანაირი პრობლემა არ იქნება,” _ ამბობს “საერთაშორისო გამჭვირვალობის” იურისტი.
ფოტორეგისტრაციაზე უარყოფითი რეაქცია აქვს ამომრჩეველსაც.
ელისო ჩინჩალაძე: “არ მინდა ჩემი ფოტო ჩემთვის გაურკვეველ ორგანიზაციას ჩაუვარდეს ხელში, აქედან გამომდინარე არ დავთანხმდები ფოტოგადაღებას”.
ანა ფერაძე: “ერთი შეხედვით, პრობლემა არ უნდა იყოს, მაგრამ მაინც არ მივცემდი უფლებას. არაფერს ვაყალბებ და ჩემთვის შეურაცხმყოფელია, ისე რომ წარმოვჩნდები, თითქოს ეჭვმიტანილი ვარ გაყალბებაში. ან კიდევ, რა გარანტია მაქვს, რომ ისინი ჩემს სურათს უკანონოდ არ გამოიყენებენ? იქნებ, პირიქით, დამაბრალონ რამე.. სანდო ვინაა? არ მივცემდი მე მაგის უფლებას..”
მიხეილ ჩუბინიძე: “ჩემი აზრით, მოუხერხებელი იქნება ამგვარი პროცედურით გაყალბების თავიდან აცილება. ასე ვერ გააკონტროლებ 2 მილიონ კაცს. სხვა მხრივ, ამან შეიძლება უკმაყოფილება გამოიწვიოს ხალხში, იმიტომ რომ ბევრს ეს ეგონება ზეწოლა”.
როგორც კოალიცია “ერთსულოვნება/ თეთრების” საზოგადოებისადმი მიმართვაშია ნათქვამი, “არჩევნების დასრულების შემდეგ, საარჩევნო უბნის ფოტორეგისტრაციის მონაცემთა ბაზაში არსებული ფოტო მასალა გადაიწერება დისკებზე და, შესაბამისი ოქმის გაფორმებით, გადაეცემა ყველა დამკვირვებელს. ხოლო ფოტოაპარატში არსებული შესაბამისი ჩიპი, დაილუქება კონვერტში საარჩევნო უბნის ბეჭდით და დაუყოვნებლივ, ხმების დათვლის პროცედურების დაწყებამდე, გაიგზავნება და ჩაბარდება ცენტრალური საარჩევნო კომისიის მიერ შექმნილ სპეციალურ ჯგუფს, რომელიც მთელი ქვეყნის მასშტაბით, ყველა საარჩევნო უბნიდან მიღებულ მონაცემებს მოაქცევს ფოტოსურათების გაორების ამომცნობი ცენტრალური პროგრამის სივრცეში და შედეგებს წარუდგენს საზოგადოებას. მოქალაქე, რომელიც სხვადასხვა უბანზე დაფიქსირდება როგორც მონაწილე ამომრჩეველი, მის მიმართ განხორციელდება კანონით გათვალისწინებული სამართლებრივი ზომები”.
