სტადიონის სამშენებლო სამუშაოებს საქველმოქმედო კომპანია “ატუ” აწარმოებს. ამ ეტაპზე ადმინისტრაციული შენობის გარემონტება მიმდინარეობს, სადაც სტადიონის დირექციის ოფისი, გასახდელები, საშხაპეები, საკონფერენციო დარბაზი, ექიმის კაბინეტი და ორი საძინებელი განლაგდება.
სამუშაოთა მწარმოებელი სერგო ლომჯარია “გურია ნიუსთან” საუბრისას აცხადებს, რომ 3 ნოემბერს დაგეგმილი მატჩისთვის სტადიონის მომზადება ვერ მოესწრება.
“ალბათ, სათადარიგო მოედანზე ჩატარდება თამაში, რადგან შეუძლებელია ასეთ მოკლე დროში სამუშაოების დასრულება. სათადარიგო მოედნის ადმინისტრაციული შენობა კი კარგადაა მოწესრიგებული. აქ არის საშხაპეები და გასახდელები, რაც აუცილებელია მატჩის ჩასატარებლად. ამჟამად მიმდინარეობს მოედნის შეღობვა. მართალია, ეს სამუშაოები მოესწრება სამისთვის, მაგრამ ეს საკმარისი არ იქნება თამაშის ჩასატარებლად,” _ ამბობს ლომჯარია.
“გურია ნიუსის” ინფორმაციით, საქართველოს ფეხბურთის ფედერაცია მატჩის სათადარიგო მოედანზე ჩატარების წინააღმდეგია, რადგან ის ვერ პასუხობს უმაღლესი ლიგის სტანდარტებს.
სერგო ლომჯარია აცხადებს, რომ სამუშაოების დასრულების შემდეგ ლანჩხუთის “გურიას” კარგად მოწესრიგებული ადმინისტრაციული შენობა ექნება. რაც შეეხება მინდვრის საფარს, ის სავალალო მდგომარეობაშია.
ლანჩხუთის გამგებელი ზაზა ურუშაძე აცხადებს, რომ მინდვრის მოვლას თვეში 5 ათასი ლარი სჭირდება. მინდორი გაუკრეჭავია, მასში სხვადასხვა სარეველაა შერეული.
აღნიშნულ საკითხთან დაკავშირებით ლომჯარია აღნიშნავს, რომ ორი დღის წინ სტადიონზე გამგეობის თანამშრომლები იმყოფებოდნენ და სარეველები ხელით დაგლიჯეს, რადგან მინდვრის საკრეჭი მანქანა არ აქვთ.
“გურიას” სტადიონზე გაუქმებულია ელექტროტაბლოც. იგეგმება თუ არა მისი განახლება ან შეცვლა – სერგო ლომჯარიას ამის შესახებ ინფორმაცია არ აქვს.
კომპანია “ატუს” წარმომადგენელი სოსო ბოლქვაძე ამბობს, რომ როდის დამთავრდება სტადიონზე მიმდინარე სამუშაოები ზუსტად არ იცის.
“სავარაუდოდ,ყველაფრის მოსაწესრიგებლად კიდევ ორი-სამი თვე დაგვჭირდება. რაც შეეხება ტრიბუნების აღდგენას, ეს ძალიან დიდ თანხებთანაა დაკავშირებული და სახელმწიფომ უნდა იკისროს ეს ვალდებულება. თუმცა, არა მგონია ეს საკითხი დადებითად გადაწყდეს. აქ დარჩენილია რკინის კოლონები და შესაძლებელია მათზე ტრიბუნების აღდგენა, მაგრამ ჯერჯერობით ეს საკითხი ღიად რჩება.
გარდა ამისა, მოსაწესრიგებელია საკანალიზაციო სისტემა. როგორც იცით, ეს დიდი პრობლემაა მთელი ლანჩხუთისთვის. ხომ არ შეიძლება სტადიონის კანალიზაცია პირდაპირ მდინარეში ჩავუშვათ. სანამ არ აიგება გამწმენდი სისტემა, ეს საკითხი ვერ მოგვარდება,” _ უთხრა “გურია ნიუსს” ბოლქვაძემ.
