“სამწუხაროდ, ამგვარ დროებით შეზღუდვებს დე ფაქტო ხელისუფლება არჩევნებისას ყოველთვის აწესებს. ეს კონფლიქტის შემადგენელი ნაწილია – მოსახლეობას თავისუფლად გადაადგილება რომ შეეძლოს, კონფლიქტიც არ იქნებოდა და ვიდრე კონფლიქტი არ მოგვარდება, დე ფაქტო ხელისუფლება ასეთ შეზღუდვებს მიმართავს.
თუმცა, იმედს გამოვთქვამთ, შეზღუდვა ამჯერადაც დროებითი იქნება და არჩევნების შემდეგ ხალხი კვლავ შეძლებს ადმინისტრაციული ხაზის გადმოკვეთას. მიმოსვლის აკრძალვის შესახებ მოსახლეობისთვის წინასწარ იყო ცნობილი,” _ უთხრა მინისტრმა “გურია ნიუსს”.
ცენტრალური საარჩევნო კომისიის პრესსპიკერი “გურია ნიუსთან” აღნიშნავს, რომ საარჩევნო უფლების მქონე იძულებით გადაადგილებულ პირთა რაოდენობა დაახლოებით, 204 ათას ხუთასია. თუმცა, ეკა აზარაშვილი ვერ აკონკრეტებს რამდენ ადამიანს შეიძლება შეექმნას ხმის მიცემასთან დაკავშირებით პრობლემა სამხრეთ ოსეთის დე ფაქტო ხელისუფლების მიერ დაწესებული შეზღუდვების გამო.
“თუ მათ იძულებით გადაადგილებული პირის სტატუსი აქვთ, რომელსაც მათ ლტოლვილთა და განსახლების სამინისტრო ანიჭებს, ასევე, უნდა ჰქონდეთ იძულებით გადაადგილებული პირის სპეციალური მოწმობა, რასაც ასევე, აღნიშნული უწყება გასცემს. ეს მოწმობა აუცილებელია იმისათვის, რომ ასეთმა პირებმა არჩევნებში მონაწილეობა მიიღონ. რა ფაქტობრივი მისამართიც უწერიათ ამ მოწმობაში, ხმა შესაბამის საარჩევნო უბანზე უნდა მისცენ”, _ უთხრა აზარაშვილმა “გურია ნიუსს”.
შეგახსენებთ, რომ დე ფაქტო ცხინვალის მთავრობა 27 ოქტომბერს დაგეგმილი საპრეზიდენტო არჩევნებისთვის, საოკუპაციო ხაზზე საქართველოს მოქალაქეების გადაადგილების უფლებას ზღუდავს. აღნიშნულთან დაკავშირებით დღეს საქართველოს შინაგან საქმეთა სამინისტრომ საპროტესტო განცხადება გაავრცელა.
“მიუხედავად იმისა, რომ 18 ოქტომბერს სოფელ ერგნეთში ინციდენტების პრევენციისა და მათზე რეაგირების მექანიზმის ფარგლებში გამართულ შეხვედრაზე დე ფაქტო ცხინვალის წარმომადგენლებთან დაისვა საკითხი, რომ 27 ოქტომბერს დაგეგმილ საპრეზიდენტო არჩევნებში საოკუპაციო ხაზის მიღმა მცხოვრებ საქართველოს მოქალაქეებს მისცემოდათ არჩევნებში მონაწილეობის მიღების საშუალება, მათ სამწუხაროდ თხოვნა არ გაითვალისწინეს და ადგილობრივი მოსახლეობის გადაადგილება ე.წ. გამშვებ პუნქტებზე სრულად შეზღუდეს.
შსს მკაცრად გმობს დე ფაქტო ცხინვალის რეჟიმის ზემოთ აღნიშნულ გადაწყვეტილებას, რადგან ეს არის ადგილობრივი მოსახლეობისთვის თავისუფალი გადაადგილების, არჩევანის გაკეთების პირდაპირი შეზღუდვა და შესაბამისად, ადამიანის უფლებების და თავისუფლებების დარღვევა.
შსს მოუწოდებს ოკუპირებული ცხინვალის რეგიონის დე ფაქტო მთავრობას გადახედოს მათ მიერ მიღებულ უკანონო გადაწყვეტილებას და არ მოუსპოს ოკუპაციის ხაზის მიღმა დარჩენილ საქართველოს მოსახლეობას დაგეგმილ საპრეზიდენტო არჩევნებში მონაწილეობის მიღების საშუალება”, _ ნათქვამია სამინისტროს განცხადებაში.
