“მათ ოპოზიციურ პარტიებად ვერ მივიჩნევ”

გასულ კვირას, გურიაში, ოპოზიციონერი კახა კუკავა იმყოფებოდა. ის ოზურგეთში 26 მაისს დაკავებულების გათავისუფლებას დაესწრო.

მასთან საუბარი “რვიანის” შესახებ დავიწყეთ. ინტერვიუს ჩაწერის დღეს, 24 ივნისს, ეს გაერთიანება ჯერ კიდევ ინარჩუნებდა მოჩვენებით ერთიანობას.

_ ახლა მაჭავარიანის კაბინეტში მიმდინარეობს გამალებული მოლაპარაკებები. გვარწმუნებენ, რომ ეს მოლაპარაკებები საარჩევნო გარემოს გაუმჯობესებას შეეხება. არ ვიცი, რატომ არ შეიძლებოდა ამის გაკეთება ღიად, იქ, სადაც ადრე მიმდინარეობდა _ ცენტრალური საარჩევნო კომისიის შენობაში. რატომღაც ჩაითვალა, უფრო ამის გაკეთება მაჭავარიანის კაბინეტში უკეთესიაო. საზოგადოებას სერიოზული ეჭვი აქვს, რომ ეს მოლაპარაკებები სინამდვილეში საარჩევნო კანონმდებლობის გაუმჯობესებას არ ეხება.

_ საზოგადოებაში ოპოზიციის მიმართ ეჭვები და უნდობლობა საკმაოდ მაღალ ნიშნულს აღწევს.

_ მე არ ვფიქრობ, “რვიანი” ოპოზიციაა. “ოპოზიცია” ლათინური სიტყვიდან მომდინარეობს და წინააღმდეგობას ნიშნავს. არ ვფიქრობ, რომ ეს პარტიები ხელისუფლებას რამე წინააღმდეგობას უწევენ. დღეს ერთ-ერთმა ოპოზიციურმა პარტიამ, პარლამენტის სხდომაზე მოითხოვა ირაკლი ოქრუაშვილის ექსტრადიცია, მეორემ მოითხოვა ბურჯანაძის საქმის გამოძიება. უფრო ხშირად მე ვხედავ, რომ მათი პოზიციები ხელისუფლებისას ემთხვევა, ვიდრე განსხვავდება. არ ვფიქრობ, რომ “რვიანი” ეს არის პოლიტიკური სპექტრი. არის პოლიტიკური პარტიები, რომლებსაც თავიანთი ამოცანები აქვთ, მაგრამ _ არა ხელისუფლების შეცვლა. რამდენიმე პარტიამ განაცხადა, რომ სექტემბრიდან იწყებს საარჩევნო კამპანიას, ანუ საარჩევნო გარემოს გაუმჯობესებას. ის პოლიტიკური პარტიები, რომლებიც ხელისუფლებას მოუწოდებენ 26 მაისის ტრაგედიის გამო დააყენონ აქციის ორგანიზატორების პასუხისმგებლობა, ისინი არიან “პადოშა 2”, “პადოშა 3”, “პადოშა 4” და მე მათ ოპოზიციურ პარტიებად ვერ მივიჩნევ.

_ ბატონო კახა, რა ქმედებებს გეგმავთ სამომავლოდ?

_ რა თქმა უნდა, გაგრძელდება ხელისუფლებასთან ბრძოლა. ბევრი რამ არის შესაცვლელი _ უნდა მოხდეს გადაჯგუფება, გადალაგება და კონსოლიდაცია იმ პოლიტიკური რეალური ოპოზიციური ძალებისა, რომლებიც მიშა მაჭავარიანის კაბინეტში არ დაძვრებიან ღამ-ღამობით.

ჩვენ უნდა მოვახდინოთ არა პოლიტიკური პარტიების, არამედ პატიოსანი ადამიანების კონსოლიდაცია. შეიძლება პატიოსანი პარტიები ცოტა დარჩა საქართველოში, მაგრამ პატიოსანი ადამიანები მე, მგონია, კიდევ ბევრნი არიან.

_ თქვენ აქციებზე ლაპარაკობთ. რამდენად მოახერხებთ ხალხის შეკრებას, როდესაც 26 მაისის აქციის დაშლის შემდეგ, მოსახლეობაში შიში გაჩნდა?

_ ვფიქრობ, რომ უფრო მეტი და მეტი მიზეზი ჩნდება იმისა, რომ ძალიან დიდი აქციებისთვის მომზადდეს წინაპირობები. ამ წინაპირობებს ქმნის თავად სააკაშვილის მთავრობა. თბილისში დღეს დასუფთავების გადასახადი მიაბეს ელექტროენერგიის გადასახადს, რაც ზაფხულში აორმაგებს ან ასამმაგებს ოჯახის გადასახადს, ზამთრის სეზონზე კი გააშვიდმაგებს. მსგავსი ქმედებები იწვევს ძალიან დიდი პროტესტს და ეს არ არის ერთადერთი ნაბიჯი ხალხის წინააღმდეგ, რასაც სააკაშვილი მიმართავს.

_ ოპოზიციურ პარტიებს რა გეგმები გაქვთ რეგიონებში?

_ ბუნებრივია, 26 მაისმა გამოიწვია დეპრესია ქვეყანაში, მაგრამ ეს არის ტალღოვანი ეფექტი, რომელიც გაივლის და დარწმუნებული ვარ, დაიწყება ახალი ტალღა, აღმავალი ტალღა, რომელიც რეგიონებზეც გავრცელდება და გურიაში პირველ რიგში _ გურია საპრეზიდენტო არჩევნებიდან მოყოლებული იყო ყველაზე აქტიური და მებრძოლი. დარწმუნებული ვარ, ეს პროცესი შემოდგომის დაწყებისთანავე იქნება ძალიან აქტიური და ინტენსიური.