ოზურგეთის რაიონული პროკურორის შემოსავალმა, ქონებრივი დეკლარაციის მიხედვით, ბოლო ორ წელიწადში, 88 245 ლარი შეადგინა.
კახა კოჩივარს ქონებრივი მდგომარეობის შესახებ დეკლარაციის შევსება, უკვე ოთხჯერ მოუხდა. ქუთაისის რაიონული პროკურორის თანამდებობაზე ყოფნის დროს, კახას მამის ჯემალ კოჩივარის სახელზე ირიცხებოდა საცხოვრებელი სახლი ბაღდათში, წმიდა მარიამის ქუჩაზე ფართობი 300 კვადრატული მეტრი, ამავე ქუჩაზე ჰქონდა და აქვს მიწის ნაკვეთი 2100 კვადრატული მეტრით და ავტოფარეხი _ 20 კვადრატულ მეტრ ფართობზე. ამავე მუნიციპალიტეტში ფლობს არასაცხოვრებელ ფართს 350 კვადრატული მეტრის მოცულობით.
თავად პროკურორის სახელზეა რეგისტრირებული ბინა თბილისში წერეთლის #77-ში, 60 კვადრატული მეტრი ფართით. 2010 წლის 28 აპრილს შევსებული დეკლარაციის თანახმად, ჯემალ კოჩივარი მოძრავ ქონებას _ 1997 წელს გამოშვებულ მსუბუქ ავტომანქანა “Mერცედეს Bენც ე 320”-ს ფლობდა.
დეკლარაციის შევსების მომენტში, კოჩივარს “ტაო-პრივატ ბანკში” კრედიტის სახით 3000 ლარი ერიცხებოდა, ხოლო “სახალხო ბანკში” სახელფასო ნაშთი _ 5 ლარი. დედამისს, დარეჯან იმერლიშვილს კი “სახალხო ბანკში” სახელფასო ანგარიშზე 150 ლარი ედო.
პროკურორის ხელფასმა 2009 წელს 43 560 ლარი შეადგინა. მამას კი, ბაღდათის სამომხმარებლო კოოპერატივის გამგეობის თავმჯდომარის მოადგილის პოსტზე მუშაობის დროს, შესრულებული სამუშაოსთვის 4 600 ლარი ერგო. ქალბატონმა დარეჯანმა, რომელიც ბაღდათის სამედიცინო ცენტრის ტუბკაბინეტის გამგე იყო, ამავე წელს ხელფასის სახით 2 400 ლარი მიიღო.
მანქანის გასხვისებით, ჯემალ კოჩივარის შემოსავალმა 3 000 ამერიკული დოლარი შეადგინა. მანქანის შესაძენად კი მან 6 700 ამერიკული დოლარი დახარჯა.
ბოლოს, ქონებრივი მდგომარეობის შესახებ, დეკლარაცია კოჩივარმა 2011 წლის 28 აპრილს, ოზურგეთის რაიონული პროკურორის რანგში შეავსო. როგორც წინა დეკლარაციიდან ირკვევა, დამატებითი ქონება არც მას და არც მისი ოჯახის წევრებს არ შეუძენიათ.
კახა კოჩივარის კუთვნილმა ხელფასმა, სამსახურებრივი მოვალეობის შესრულებისთვის 2010 წელს 44 685 ლარი შეადგინა. მამის, ჯემალ კოჩივარისამ _ 1 020 ლარი. დედის, დარეჯან იმერლიშვილის ხელფასმა კი _ 3 780 ლარი. დამატებით ჯემალ კოჩივარმა, სასოფლო-სამეურნეო პროდუქციის რეალიზაციით, 2 200 ლარი მიიღო.
კახა კოჩივარი 1973 წლის 3 თებერვალს ბაღდათის რაიონში დაიბადა. განათლება თბილისის სახელმწიფო უნივერსიტეტში მიიღო. 1996 წელს ამავე უნივერსიტეტის იურიდიული ფაკულტეტი დაამთავრა. 1999 წლის ივლის-აგვისტოს თვეში შინაგან საქმეთა სამინისტროს საგამოძიებო დეპარტამენტის ვანის ქვეგანყოფილებაში მუშაობდა. ამის შემდეგ, 2001 წლამდე შსს საგამოძიებო დეპარტამენტის ბაღდათის ქვეგანყოფილებაში. 2001-2002 წლებში ბაღდათის რაიონული პროკურატურაში სტაჟიორი იყო. 2002-2004 წლებში კი _ ბაღდათის რაიონული პროკურატურის გამომძიებელი. 2004-2005 წლებში იყო იმერეთის საოლქო პროკურატურის საგამოძიებო ნაწილის უფროსი გამომძიებელი. 2005-2006 წლებში _ დასავლეთ საქართველოს საოლქო პროკურატურის საგამოძიებო ნაწილის უფროსი გამომძიებელი. 2006-2007 წლებში ჭიათურის რაიონული პროკურატურის რაიონული პროკურორის მოადგილე იყო. 2007-2008 წლებში _ ჭიათურის რაიონული პროკურატურის რაიონული პროკურორი. 2008-2009 წლებში _ საჩხერის რაიონული პროკურატურის რაიონული პროკურორი. 2009-2010 წლებში _ ქუთაისის რაიონული პროკურატურის რაიონული პროკურორი. 2010 წლიდან დღემდე იგი ოზურგეთის რაიონული პროკურატურის პროკურორია.
