აღნიშნული ფაქტები ათწლეულების განმავლობაში დაგროვილ პრობლემებს და უაღრესად მნიშვნელოვან კულტურულ ღირებულებებს უკავშირდება.
დღესვე საქართველოს ეროვნულმა მუზეუმმა მოამზადა და მოგვაწოდა განცხადება, რომელსაც უცვლელად გთავაზობთ; ამასთან, ვიმედოვნებთ, რომ განცხადების ბოლო აბზაცი, რომელშიც საუბარია მედიაში გადაუმოწმებელი ინფორმაციების გავრცელებაზე, არ ეხება დღევანდელ მასალას, რადგან იგი, როგორც უკვე აღვნიშნეთ, წარმოადგენს სახელმწიფო აუდიტის დასკვნის ნაწილს.
საქართველოს ეროვნული მუზეუმის განცხადება
“გურია ნიუსის” მიერ გავრცელებული ინფორმაციის თაობაზე
2013 წლის 30 ოქტომბერს “გურია ნიუსის” მიერ გავრცელდა ინფორმაცია, სადაც მოცემულია ამონარიდები სახელმწიფო აუდიტის დასკვნიდან. აღნიშნულთან დაკავშირებით საქართველოს ეროვნული მუზეუმი ავრცელებს ინფორმაციას:
სახელმწიფო აუდიტმა შეამოწმა საქართველოს ეროვნული მუზეუმი 2012 წლის თებერვალ-ოქტომბერში. სახელმწიფო აუდიტის ანგარიშში კოლექციათა დაცვა-აღრიცხვის კუთხით მოცემული შენიშვნები იმ პერიოდს უკავშირდება, როდესაც საქართველოს ეროვნული მუზეუმი არ იყო შექმნილი.
საქართველოს ეროვნული მუზეუმი დაარსდა 2004 წელს, სადაც ორ მილიონამდე ექსპონატია დაცულია.
სტატიაში აღნიშნული ფაქტები ათწლეულების განმავლობაში დაგროვილ პრობლემებს უკავშირდება. მათი გადაჭრის მიზნით საქართველოს ეროვნულმა მუზეუმმა შექმნისთანავე დაიწყო ღონისძიებების გატარება. მათ შორის, სტრუქტურულ ერთეულებში დაიწყო აღწერა-შეჯერების პროცესი, რომელიც დღემდე მიმდინარეობს.
რაც შეეხება სტატიაში ნახსენებ ექსპონატებს, რომლებიც აუდიტის სამსახურის მუშაობის პერიოდში თითქოს-და არ იძებნებოდა სათანადო ფონდსაცავებში, განვმარტავთ, რომ მათი უმეტესობა წარმოადგენს თავად მუზეუმებს შიგნით სხვადასხვა დროს გამოფენებსა თუ ფონდსაცავებში გადატანილ ექსპონატებს, რომლებიც ამჟამად მიმდინარე შეჯერების პროცესში უბრუნდება კუთვნილ საცავებს.
სტატიის დასაწყისშივე გამოთქმულია მოსაზრება, თითქოს “საელჩოებში, ბანკებსა და სახელმწიფო დაწესებულებებში დროებით გატანილი სამუზეუმო ექსპონატები უკვალოდ გაქრა, მუზეუმს კი მათ დასაბრუნებლად არაფერი გაუკეთებია”, რაც არ შეესაბამება სინამდვილეს.
საქართველოს ეროვნული მუზეუმი, შექმნის დღიდანვე, თავისი უფლებამოსილების ფარგლებში ახორციელებს ღონისძიებებს ექსპონატთა მოძიებისა და დაბრუნებისათვის. ჯერ კიდევ აუდიტის სამსახურის შემოწმებამდე დიდი ხნით ადრე მომზადებული და დაზუსტებული იყო ორგანიზაციათა სია „დროებით” სარგებლობაში გადაცემული ექსპონატთა ნუსხით. აღნიშნული სიები სამართლებრივი რეაგირებისათვის გადაეცა კონსტიტუციური უსაფრთხოების დეპარტამენტს.
საქართველოს საგარეო საქმეთა სამინისტრო დახმარებას გვიწევს ექსპონატთა დაბრუნების პროცესში. მიმდინარე წელს პრობლემის მოგვარებაში ჩაერთო საქართველოს კულტურისა და ძეგლთა დაცვის სამინისტროც. ვთანამშრომლობთ ყველა იმ უწყებასთან, სადაც დროებით გადაცემული ყოფილა სამუზეუმო ექსპონატები.
სხვადასხვა უწყებების, მათ შორის საელჩოების მიერ, უკვე დაბრუნებულია ექსპონატთა დიდი ნაწილი. ამ მიმართულებით მუშაობა გრძელდება.
საქართველოს ეროვნული მუზეუმი წუხილს გამოთქვამს, რომ მედიაში ჩნდება გადაუმოწმებელი ინფორმაცია, რომელიც უსაფუძვლო ეჭვებს აღვივებს საზოგადოებაში და შეურაცხყოფს არა მხოლოდ მუზეუმის თანამშრომელთა პროფესიულ და პირად ღირსებას, არამედ ჩრდილს აყენებს ეროვნულ ღირებულებებს.
