ბესელია აღნიშნავს, რომ სააკაშვილი საკუთარ უფლებებს ბოროტად იყენებს.
“სააკაშვილს ამ წლის განმავლობაში შეწყალებული ჰყავს ნარკოტიკების 80-ზე მეტი რეალიზატორი და მძიმე დანაშაულში ბრალდებული ასობით პირი. თუ მათ სიას გადავხედავთ, მათ შორის ვიპოვით ზურაბ ადეიშვილის ძმას, რომელიც კახეთის გუბერნიაში ერთ-ერთ მნიშვნელოვან თანამდებობაზეა. ასევე, ბუტა რობაქიძის საქმეზე მსჯავრდებულ პირს, როდესაც ასეთი პირების მიმართ სააკაშვილი კომისიის გვერდის ავლით იყენებს მისთვის მინიჭებულ უფლებას და იყენებს პოლიტიკური მიზნით საკუთარი პოლიტიკური გუნდის დასაცავად. სრულიად უპასუხისმგებლოდ იქცევა და მისი ნიანგის ცრემლები, რომ თითქოს ბოდიშს იხდიდა წასვლის წინ რეპრესიის მსხვერპლთა და ძალადობის მსხვერპლთა მიმართ, ეს იყო სიყალბე,” _ განაცხადა ეკა ბესელიამ.
ბესელია ასევე ახალიასთან დაკავშირებით უმცირესობის ბრალდებებსაც ეხმაურება და აღნიშნავს, რომ საუბარი იმის შესახებ, რომ თითქოს უმრავლესობამ ახალაია პოლიტიკური დევნის ობიექტად აქცია, ცინიზმია. მისი განცხადებით, უამრავი საჩივარი არსებობს წამებასა და არაადამიანურ მოპყრობაზე, რომლის უშუალო მონაწილე თავადა ბაჩანა ახალაიაა.
“აბსოლუტურად გამოვრიცხავ, რომ ახალაიას საქმეში რამე ტიპის პოლიტიკური ინტერესი არსებობდა. არსებობს ათობით საჩივარი. პირადად ჩვენს კომიტეტშია შემოსული სხვადასხვა პირის, რომელიც კონკრეტულად ასახელებს მის მიმართ განხორციელებულ ღირსების შემლახავ თუ არაადამიანური მოპყრობის სხვადასხვა ფაქტებს. პოლიტიკური სარჩულის ქვემოთ ამ საქმის მოქცევა ეს არის ცინიზმი. ვიცით, რომ სასჯელაღსრულების დაწესებულებაში მისი თავმჯდომარეობის პერიოდში და მოგვიანებით, მისი სხვადასხვა თანამდებობაზე ყოფნის დროს, არაერთი მოქალაქის საჩივარია, რომელიც კონკრეტულად უთითებს ახალაიას დანაშაულებებზე,” _ განაცხადა ბესელიამ.
