“საქართველოში არის ორხელისუფლებიანობა და რაც ერთ მათგანს არ უნდა მართალი სიტყვა, მე მაქვს მათგან განსხვავებული ხედვა, რაც არ ემთხვევა კოჰაბიტაციური ხელისუფლების სურვილებს და ვარაუდს, ამიტომ ყველანაირად ცდილობდნენ მოეხდინათ ჩემი ბლოკირება. მხოლოდ სამჯერ მომეცა ტელევიზიით გამოსვლის საშუალება, რასაც კანონი ავალდებულებდათ, ეს შეხვედრებიც კითხვა-პასუხის რეჟიმში ჩატარდა და ფაქტობრივად ვერ მოვახერხე ჩემი პროგრამის გაცნობა მოსახლეობისათვის. სწორედ ამის შედეგია, რომ მივიღეთ კოჰაბიტაციური და გარიგების შედეგად ჩატარებული არჩევნები, რასაც ჯერ კიდევ ერთი თვის წინ ვამხელდი და ეს არ უნდოდა ხელისუფლებას. ახლა მთავარია გამოსავალი ვიპოვოთ. უნდა ჩატარდეს კანონიერი ლეგიტიმური არჩევნები, უნდა მოხდეს დიდი ეროვნული შერიგება. უნდა ჩამოვიდნენ საზღვარგარეთ მყოფი ეროვნული ხელისუფლების წარმომადგენლები და სწორედ მათ ჩაატარონ არჩევნები. თუ ისინი იტყვიან, რომ ამოწურეს თავიანთი საქმიანობა, უნდა იქნეს მოწვეული სრულიად საქართველოს ეროვნული ყრილობა. ეროვნული ყრილობა დაადგენს, როდის ჩატარდეს პარლამენტის და პრეზიდენტის ახალი არჩევნები”.
პრესკონფერენციის დასასრულს ბიბილურმა საზოგადოებას შესთავაზა 27 ოქტომბრის არჩევნების შედეგების ბათილად გამოცხადება და საქართველოს რესპუბლიკის უზენაეს საბჭოს უფლებამოსილების აღდგენა.
“მე ვთავაზობ მოსახლეობას, რომ რადგან ინაუგურაცია 17 ნოემბერსაა დანიშნული და ცოტა დრო დარჩა, შევიკრიბოთ პარლამენტის წინ და დავაფიქსიროთ ჩვენი ნება. მთავარია ხალხის აზრი და თუ საზოგადოება არჩევნების შედეგების ბათილად ცნობას მოითხოვს, ასეც უნდა მოხდეს. აუცილებელია, რომ ა.წ. 10 ნოემბერს, 14 საათზე გაიმართოს კეთილი ნების ადამიანების შეხვედრა. ჩვენ უნდა მივიღოთ გადაწყვეტილება აღვუგდინოთ უფლება-მოსილება საქართველოს რესპუბლიკის უზენაეს საბჭოს. უნდა დაიწყოს ხელმოწერების შეგროვება, რათა ეს გარიგებული არჩევნები ბათილად იქნეს ცნობილი. ხალხმა თვითონ უნდა მივხედოთ ჩვენს თავს და აღვადგინოთ სამართლიანობა”.
