“როგორც ცნობილია, ახალი პრეზიდენტის უფლება-მოვალეობები განსხვავებულია, იქმნება ახალი პოლიტიკური რეალობა, შესაბამისად , ადმინისტრაციის ფორმირება მოხდება იმ ახალი გარემოების მიხედვით, რომელიც იქმნება ინაუგურაციის შემდეგ. ჩვენ ვაპირებთ გარკვეულ რესტრუქტურიზაციას, რომლის მიხედვითაც შესაძლებელია მოხდეს გარკვეული საკადრო ცვლილებები”, _ განაცხადა ლაშა აბაშიძემ.
როგორც პრეზიდენტის ადმინისტრაციის მომავალმა უფროსმა განაცხადა ადმინისტრაცია პროფესიონალი კადრებით დაკომპლექტდება : “ჩვენ გვყავს გარკვეული გუნდი, რომელიც ძალიან კვალიფიციური და მაღალი მოტივაციისა, აქედან გამომდინარე, რესტრუქტურიზაციის შედეგად დაკომპლექტდება პროფესიონალური გუნდი. უკვე კონკრეტულ საკადრო გადაწყვეტილებებზე, თუ ვის რა პოზიცია ეკავება, ამის შესახებ ცნობილი 17 ნოემბრის შემდეგ გახდება ცნობილი”, _ განაცხადა ლაშა აბაშიძემ.
როგორც აბაშიძემ სოციალურ ქსელებში გავრცელებულ ინფორმაციაზე კომენტარებისას ჟურნალისტებს განუცხადა, პრეზიდენტის ადმინისტრაციის უფროსის თანამდებობაზე მარგველაშვილმა საქმიანი და პროფესიული ურთიერთობებიდან გამომდინარე შეარჩია.
“ბოლო პერიოდში ჩვენი ნათესაური კავშირის შესახებ გარკვეული ინფორმაციები გავრცელდა, მაგრამ მინდა დავადასტურო, რომ ბოლო 8 წლის განმავლობაში ჩვენ არანაირი ნათესაური კავშირი არ გვაქვს. ჩემთვის ნდობის გამოცხადება განპირობებულია მხოლოდ საქმიანი და პროფესიული ურთიერთობებიდან გამომდინარე. ხოლო ის, რომ 8 წლის წინ ნათესაური კავშირი გვქონდა, ამას, რა თქმა უნდა, ვადასტურებ“,_ განაცხადა ლაშა აბაშიძემ.
მისივე განმარტებით, გიორგი მარგველაშვილს სტუდენტობიდან იცნობს.
“მე ვიყავი სტუდენტი, როცა ბატონი გიორგი იყო ჯიპას რექტორი. აქედან დაიწყო ჩვენი ურთიერთობა. მას შემდეგ მე ვმუშაობდი განათლების სამინისტროში აუდიტის დეპარტამენტის ხელმძღვანელად, ბოლო პერიოდის განმავლობაში კი ვიყავი საარჩევნო შტაბში, კერძოდ, საარჩევნო კამპანიის ფონდის მმართველი, ასევე გახლდით ცესკო-ში მისი წარმომადგენელი, ასე, რომ ჩვენ გვაქვს პროფესიული და საქმიანი ურთიერთობები”, _ აღნიშნა ლაშა აბაშიძემ.
