შტაბის მთავარი გამხმოვანებლის, დიმიტრი კვერღელიძის სერიოზულად მიღება წარმოუდგენელია და არც ჩვენ მივიჩნევთ ამ არსებას გამოხმაურების ღირსად. დავით დარჩიას კი მოვუწოდებთ, სერიოზულად დაფიქრდეს იმ უმსგავსო პასუხებზე, რომლებმაც მისი მხრიდან გაიჟღერა პრესაში.
ბატონო დავით!
თქვენი მხრიდან მარგველაშვილის მხარდამჭერთა დარბაზის მისამართით, რბილად რომ ვთქვათ, დამაკნინებელი და შეურაცხმყოფელი განცხადებები ისმის, იმასთან დაკავშირებით, რომ დარბაზს თითქოს არაფერი გაუკეთებია იმ შედეგის მისაღწევად, რაც არჩევნებში ყველამ ერთად მივიღეთ. მეტიც, საკუთარი ღვაწლის წარმოჩენის ხიბლში ჩავარდნილები იმასაც იკვეხნით, რომ ზემოთაღნიშნული შედეგი თქვენ ისედაც გარანტირებული გქონდათ, ხოლო დარბაზის წევრები მხოლოდ იმაში დაგეხმარნენ, რომ თავიანთი ხმები “მოიტანეს”. სწორედ ამაზე იტყვიან _ კი, მაგრამ ბნელა, ბატონებო?
ეგებ, არ გახსოვთ და შეგახსენებთ, რომ როგორც საპრეზიდენტო, ისე, წინა საპარლამენტო არჩევნები გურიაშიც და მთელ საქართველოში მოიგო ერთმა ადამიანმა და არა ერთად აღებულმა ყველა შტაბმა თუ დარბაზმა. თქვენი ეს განცხადებები გულუბრყვილოდ, ანდა “მარტივ ეშმაკობად” მიიჩნეოდა, რომ არა ერთი გარემოება _ საკუთარ ღვაწლზე იმიტომ საუბრობთ, რომ ირიბად გვითხრათ, გურიის გუბერნატორის პოსტზე უალტერნატივო კანდიდატურა ვარო. თუმცა, რაღა ირიბად, როცა ცალსახად და პირდაპირ ასაბუთებთ, რომ ეს პოსტი სწორედ თქვენ გეკუთვნით, იმიტომ, რომ თქვენ ასეთი კარგი ხარ. არ გეუხერხულებათ მაინც საკუთარ თავზე ასეთი შეფასებები? არ გრცხვენიათ, საზოგადოებას ასეთი ფორმით რომ სთავაზობთ საკუთარ პერსონას? ის მაინც არ იცით, რომ ადამიანი ღირსებებზე სხვამ რომ უნდა ილაპარაკოს?
მაშინ დაგვიტოვეთ იმის უფლება, ცოტა რამ მოკრძალებულად შევახსენოთ თქვენს “მაღალგუბერნატორობას” _ იქნებ დაფიქრდეთ, რატომ ჩათვალა ცენტრმა ბევრგან და პირველ რიგში ოზურგეთის საჭიროებიდან გამომდინარე, რეკომენდაცია გაეცა მხარდამჭერი დარბაზების შექმნის თაობაზე? პასუხი მარტივია _ თქვენი და კვერღელიძისნაირების იმედად ოზურგეთში ის შედეგი არ დადგებოდა, რაც დადგა. იქნებ, ისიც გაიხსენოთ, რა გაკვირვებულები იყავით, როცა ხალხმრავლობას ხედავდით ჩვენს დარბაზში, როცა თქვენს შტაბში მაშინაც კი არ შედიოდნენ, თუ იქ ქუდს შეუგდებდით ვინმეს. ეგებ იმაზეც დაფიქრებულიყავით, რატომ იხვეწებოდნენ სოფლებში ” ქართული ოცნების” აქტივისტები, ხალხთან შეხვედრებში დარბაზსაც მიეღო მონაწილეობა. პასუხი ამ შემთხვევაშიც ყველამ კარგად იცის _თქვენი ავტორიტეტი საკმარისი არ აღმოჩნდა საზოგადოების მობილიზებისთვის.
დარბაზს არ აქვს და არც არასდროს ჰქონია ამბიცია, გაკეთებული საქმე სათავისოდ გამოეყენებინა, არც იმის მოლოდინით გვიკეთებია საკეთებელი, რომ ხვალ რომელიმე რაიმეს მოვითხოვდით სანაცვლოდ, ან სულაც მადლობას გვეტყოდნენ გაწეული გარჯისთვის. ჩვენ ჩვენი სახსრებით, ჩვენი ტრანსპორტით, ჩვენი ენთუზიაზმითა და ავტორიტეტით გაერთიანებულებს ერთი რამ გვამოძრავებდა _თქვენს იმედად არ დაგვეტოვებინა ოზურგეთი და კითხვის ქვეშ არ დაგვეყენებინა იმ ადამიანის ღვაწლი, ვისთანაც ადამიანურ ვალშია მთელი საქართველო.
ის ფაქტი, რომ თქვენ და კიდევ რამდენიმე თქვენნაირი არ გვცნობთ, არ მიგვაჩნია დიდ უბედურებად. ჩვენ აპოლიტიკური, უამბიციო თანამოაზრეების გუნდი ვართ, რომლებმაც ჩვენი გასაკეთებელი გავაკეთეთ და დავიშალეთ. თუმცა, ერთ ამბავსაც დავაანონსებთ _ თუ ოზურგეთს და ოზურგეთელებს დასჭირდებათ, დარბაზი კიდევ იტყვის სათქმელს და აუცილებლად დაგარწმუნებთ მის სიძლიერეში.
დარბაზის წევრები კიდევ ერთხელ გამოვხატავთ პატივისცემას ჩვენი თანამოქალაქეების, მთელი გურიის მიმართ, რომელიც უთუოდ იმსახურებს ჰყავდეს ღირსეული, კვალიფიციური, მართლად დამსახურებული ადმინისტრაციის ხელმძღვანელი, რომელზეც მთელი გურია იტყოდა, _ დიახ! და არა ისეთი, რომელსაც დღენიადაგ ღიღინებს: ” მე ისეთი კარგი ვარ!”
ვფიქრობთ, ჩვენი სათქმელი ვთქვით, როგორც იტყვიან გამგები გაიგებს. ამიერიდან თქვენს განცხადებებს და იმასაც, რასაც მომავალში იტყვით, აღარ ვაპირებთ, რაიმე ფორმით გამოვეხმაუროთ.
ოზურგეთში გიორგი მარგველაშვილის მხარდამჭერი დარბაზის დამფუძნებელი გელა კობალაძე
(R)
