41 წლის დავით ცეცრცვაძე წყალსადენის სისტემაში 1995 წლიდან მუშაობს. რა გამოცდილებას ფლობს ამ სისტემაში და როგორ აპირებს ის ოზურგეთში სასმელი წყლის გამო არსებული პრობლემების გადაჭრას, ამის შესახებ „გურია ნიუსი“ ცერცვაძეს ესაუბრა.
დავით ცერცვაძე:
_ მოსვლისთანავე ვიყავი რეალიზაციის ინჟინერი, დირექტორის მოადგილე რეალიზაციის დარგში 2009 წლამდე, იმავე წელს, გარკვეული დროის განმავლობაში კურატორის მოვალეობას ვასრულებდი. ასევე, გაერთიანებული წყალმომარაგებაში ვიყავი ტექნიკური ინჟინერი. 2012 წლიდან ოზურგეთი- ჩოხატაურის ტექნიკური მენეჯერის პოზიცია მეკავა და ამჟამად ოზურგეთი-ჩოხატაური -ლანჩხუთის გაერთიანებული სერვისცენტრის ტექნიკური სამსახურის უფროსი ვარ.
_ძალიან დიდი ხანია მუშაობთ წყალკანალის სიტემაში. შესაბამისად, იცნობთ ამ სისტემაში არსებულ პრობლემებს. მოსახლეობა მუდმივად უკმაყოფილოა წყლის ხარისხით თუ იმით, რომ ხალხს წყალი დროულად არ მიეწოდება. როგორ აპირებთ ამ პრობლემების გადაჭრას და ექნება თუ არა ოზურგეთს წყალი ისე, როგორც საჭიროა?
_ ჩვენი კომპანიის ხედვა ასეთია – დაიწყო მასშტაბური პროექტები, სათავე ნაგებობების გაწმენდა, მიმდინარეობს პირველი ეტაპი. სატუმბი სადგურების სრული რეაბილიტაცია ხდება, საიდანაც ქალაქს წყალი უნდა მიეწოდოს. ალბათ, რამდენიმე თვეში ეს პრობლემა გადაიჭრება და ეს თემა დასრულდება. ამის შემდეგ დაიწყება მეორე ეტაპი, რაც ახალი წლიდან შიდა ქსელის 27 კილომეტრიანი მონაკვეთის სრულ რეაბილიტაციას ითვალისწინებს. ეს მოიცავს ქალაქის ძირითად ნაწილს, პარალელურად მიმდინარეობს გამრიცხველიანება და სათავეების რეაბილიტაციის დასრულების შემდეგ, რვასაათიანი გრაფიკის ნაცვლად, გადავალთ 12 საათიან გრაფიკზე. მოსახლეობა ამას მალე იგრძნობს და მათი კმაყოფილებაც აშკარა იქნება.
