“როდესაც ბიძინა ივანიშვილმა პოლიტიკიდან წასვლისა და სამოქალაქო სექტორში გადასვლის შესახებ განაცხადა, არაერთხელ მისაუბრია მასთან, რომ ჩემი საადვოკატო და საპროკურორო გამოცდილებით, მასთან ერთად დამეტოვებინა თანამდებობა, გადავსულიყავი სამოქალაქო სექტორში და მხარში ამოვდგომოდი აწ უკვე საზოგადო მოღვაწე ბიძინა ივანიშვილს,” _ განაცხადა კბილაშვილმა.
ამასთან, მთავარი პროკურორი ფიქრობს, რომ თანამდებობაზე ნაადრევად მოვიდა.
“წინა ხელისუფლებას მართლმსაჯულების კარი რომ არ ამოეგმანა, არც პოლიტიკის და არც თანამდებობისკენ გამხედავი არ ვიყავი. თანამდებობაზე ყოფნა პრესტიჟია, მაგრამ იგი ჩემთვის ღირებულებას არ წარმოადგენს. არც იმას უარვყოფ, რომ პროკურატურის გარდაქმნის დროსთან დაკავშირებით ჩემი და პრემიერ ივანიშვილის მოსაზრებები ერთმანეთს არ ემთხვევა, მაგრამ ეს ეხება დროს და არა პრინციპს. მეც და პრემიერიც ვფიქრობთ, რომ საქართველოში ევროპული პროკურატურა უნდა შევქმნათ, ოღონდ მე შედარებით სწრაფი მოქმედებების მომხრე ვარ. დრო აჩვენებს, რამდენად ვცდებოდი.
იმის გამო, რომ პროკურატურა აღმასრულებელი ხელისუფლების ნაწილია, მთავარ პროკურორს ევალება, პრემიერის მიერ განსაზღვრულ პოლიტიკას მისდიოს. სწორედ ამიტომ, ბიძინა ივანიშვილთან ხანგრძლივი მსჯელობის შემდეგ, შევთანხმდით, რომ პრემიერთან ერთად მეც დავტოვო თანამდებობა, როგორც მისმა თანაგუნდელმა და თანამოაზრემ და სამოქალაქო სექტორში გავაგრძელო საქმიანობა,” _ აღნიშნა კბილაშვილმა.
ამას გარდა, მთავარი პროკურორი მომავალ პრემიერთან რამე სახის უთანხმოებას გამორიცხავს და აცხადებს, რომ ირაკლი ღარიბაშვილთან ღირსეული და კოლეგიალური ურთიერთობა ჰქონდა.
“არავითარი უთანხმოება ჩემსა და მომავალ პრემიერ-მინისტრ ირაკლი ღარიბაშვილს შორის არ არსებობს. ჩვენ ერთმანეთის გვერდით მოგვიწია მუშაობა ერთი წლის განმავლობაში. ღირსეული და კოლეგიური ურთიერთობა ჩამოგვიყალიბდა. დანაშაულთან ბრძოლისთვის არაერთი დღე და ღამე გაგვიტარებია ერთად. ირაკლი ღირსებითა და წესიერებით სავსე ადამიანია. ჩვენ გვაქვს განსხვავებული შეხედულებები პრიორიტეტებთან და სამართალდაცვით სფეროში გასატარებელ რეფორმებთან დაკავშირებით,” _ განაცხადა კბილაშვილმა და ღარიბაშვილს წარმატებები უსურვა.
