საქმე ეხებოდა საფეხბურთო კლუბ “გურიასთვის” თანხის გამოყოფას. სწორედ ამის გამო საკრებულოს სხდომა დაგვიანებით დაიწყო. ლანჩხუთის საკანონმდებლო ორგანოს ხელმძღვანელის კაბინეტში დეპუტატები დიდხანს მსჯელობდნენ აღნიშნული საკითხის გარშემო. 16 საათზე დანიშნული სხდომა, 16 საათსა და 40 წუთზე გამოაცხადა გახსნილად საკრებულოს თავმჯდომარემ. სხდომას 26 დეპუტატიდან 19 ესწრებოდა. საფეხბურთო კლუბ “გურიაზე” საკითხი ამირან გიგინეიშვილის ნაცვლად გამგებლის მოვალეობის შემსრულებელმა ზაზა ურუშაძემ წარმოადგინა. როგორც მან განაცხადა, არასამეწარმეო სამეურნეო მიწის შესაძლო გაყიდვიდან შემოსული 85 ათასი ლარი “გურიას” დაფინანსებისთვის უნდა გამოიყოს.
საკრებულოს წევრთა უმრავლესობა სხდომის მანძილზე საკმაოდ მწვავე განცხადებებს გამოთქვამდნენ, მათი ნაწილი თვლიდა, რომ ეს ისედაც მწირ ბიუჯეტს დააწვება და წლის ბოლოსთვის შეიძლება საფინანსო ორგანიზაციები უხელფასოდაც დარჩეს. თუმცა, ყველა დეპუტატი, თავის გამოსვლაში თანხმდებოდა, რომ “გურიას“ კლუბის დახმარება და მისი დაშლის თავიდან აცილების აუცილებლობა უდავოდ დგას.
დეპუტატები იმასაც ამბობდნენ, რომ საფეხბურთო კლუბისთვის თანხის გამოყოფა ჩიხში შეიყვანს ხელფასების გაცემის საქმეს და ჯობია ფეხბურთს მოაკლდეს თანხა, ვიდრე სხვა სამსახურები დარჩეს უხელფასოდ. საყვედურს გამოთქვამდნენ იმის გამოც, რომ კლუბში მხოლოდ 3-4 ადგილობრივი თამაშობს. თუმცა ყველა თანხმდებოდა იმაზე, რომ კლუბის მათი ხელით დაშლა დაუშვებელია.
დეპუტატებს შორის გამართული ცხარე კამათის შემდეგ საკრებულოს თავმჯდომარემ სხდომაზე მყოფ “გურიას” დირექტორს კობა მირზაშვილს ჰკითხა, თუ რა ხდება სპონსორთან დაკავშირებითო. რაზეც კლუბის დირექტორმა უპასუხა, რომ 15 ნოემრისთვის სპონსორის ჩამოსვლას ელიან და დეტალებზე შეთანხმება ადგილზე მოხდება.
გამგებლის მოვალეობის შემსრულებელმა სხდომაზე განაცხადა, რომ მომავალი წლიდან შეიძლება უმაღლესი ლიგის გუნდები 2 მილიონი ლარით ცენტრალური ბიუჯეტიდან დაფინანსდეს და ეს პრობლემა მოიხსნება.
როგორც საფინანსო სამსახურის უფროსმა როლანდ ლაშხიამ განმარტა, _ თუ მსხვილმა გადამხდელებმა, მაგალითად, რკინიგზამ და ა. შ., ფული არ ჩარიცხეს, შესაძლოა ხელფასების გაცემის პრობლემა რეალურად დადგეს.
სესიაზე ითქვა, რომ ადგილობრივი შემოსავლები მილიონ 300 ათასი ლარია. ამას დაემატება 85 ათასი და აქ ჯდომით არაფერი არ შემოვა. საჭიროა მეტი გააქტიურება და ჩართვა მინისტრის დონეზეც კი.
სხდომის დასასრულს დეპუტატები ერთხმად შეთანხმდნენ, რომ ფული “გურიას“” გამოეყოს და კლუბის მესვეურებმა ტაშის თანხმლებით და კმაყოფილი სახეებით დატოვეს სხდომა.
