სესიაშვილმა ყოფილი მთავარი პროკურორის მუშაობა პოზიტიურად შეაფასა და აღნიშნა, რომ კოჰაბიტაციურ რეჟიმში კბილაშვილმა შესაძლებლობების მაქსიმუმი გამოავლინა.
“არჩილ კბილაშვილმა პროკურატურა ჩაიბარა ძალიან მძიმე დროს. მას ერგო სააკაშვილის ხელისუფლების დროს პროფესიონალურად დაქვეითებული სტრუქტურა. კბილაშვილს ჰქონდა ასევე ძალიან მცირე დრო იმისთვის, რომ პასუხი გაეცა ათასობით საჩივარზე და ხელახლა დაწყებულიყო საქმეების ძიება. სულ 300 პროკურორი ჰყავს პროკურატურას. არჩილ კბილაშვილმა ძალიან კარგად განახორციელა რეფორმა, კარგად და მისაღებად”.
ირაკლი სესიაშვილმა აღნიშნა, რომ ის დარწმუნებულია ახალი პრემიერის გადაწყვეტილებაში, რომ ინაუგურაციის შემდეგ მთავარი პროკურორის და ყველა სხვა პოსტზე წარდგენილი კანდიდატურა იქნება საზოგადოებისთვის მისაღები და ქვეყნისთვის სასარგებლო საქმის გამკეთებელი. ასევე განაცხადა, რომ ახალი მთავარი პროკურორი ახალი ტიპის გამოწვევების წინაშე წარსდგება და მთავრობა მისგან ეფექტურ მუშაობას ელის.
“დარწმუნებული რომ არ იყოს ახალი პრემიერი ამ პოსტს არ შესთავაზებდა. იმედი მაქვს ახალი ერა დაიწყება პროკურატურაში და ახალ პრემიერთან ერთად ფარცხალაძე ახალ სიტყვას იტყვის. ახალ დროებაში ახალი მთავარი პროკურორი დადგება ახალი ტიპის გამოწვევების წინაშე, მისგან ჩვენ ეფექტურ მუშაობას ველით ევროპული სტანდარტების პროკურატურის შესამნელად”.
სესიაშვილმა აღნიშნა ისიც, რომ “ნაციონალური მოძრაობა” ახალი მთავრობის მიმართ ჩასაფრების პოლიტიკას ატარებს და ყველა ნაბიჯს, როგორი ეფექტურიც არ უნდა იყოს ის ნეგატიურად აფასებს.
პარლამენტის თავდაცვისა და უსაფრთხოების კომიტეტის თავმჯდომარის შეფასებით, რასმუსენის ვიზიტის დროს მერიის მაღალჩინოსნების დაკავებამ ყველას დაანახა, რომ სტრუქტურები არავის ზედამხედველობით არ მოქმედებენ.
“ნორმალურ სახელმწიფოში პირველ პირს არავინ ეკითხება დღეს ვინ დაიჭიროს და ხვალ ვინ. არც ის ევალებათ ვინმეს სეუთანხმონ, დაკავების პროცესი უნდა განვახორციელოთ და ქვეყანაში რაიმე ვიზიტი ხომ არ არის დაგეგმილიო. სტრუქტურამ დაგვანახა, რომ თავისუფლად მოქმედებს დადგენილი მოთხოვნების შესაბამისად. ასე რომ მე პირადად ამ ქმედებას შეცდომად არ ვთვლი და ამ თემით სპეკულირებას არც არავის მოვუწონებ”.
