ექსპერი კახა კახიშვილი მიიჩნევს, რომ ამ ეტაპზე ახალმა პრემიერმა სწორი გადაწყვეტილება მიიღო მთავრობის იგივე შემადგენლობის დატოვებით. ექსპერტის აზრით, მინისტრთა კაბინეტის წევრები მას შემდეგ შეიცვლებიან, რაც პარტია “ქართული ოცნება” გაძლიერდება. კახიშვილი მიიჩნევს, რომ ზოგიერთი მინისტრი მართლაც შესაცვლელი იყო, მაგრამ ამ ეტაპზე გვარების დასახელებისგან თავს იკავებს იქიდან გამომდინარე, რომ ეს ადამიანები რჩებიან თანამდებობებზე და აგრძელებენ უფლება-მოვალეობის შესრულებას.
“ამ ეტაპზე გადაწყდა პარტიის გაძლიერება. როგორც კი “ქართული ოცნება” იქნება ძლიერი, მინისტრთა კაბინეტის წევრები შეიცვლებიან, ეს მოხდება არჩევნებამდე ან მის შემდეგ, ესეც დამოკიდებულია იმ პრობლემაზე, რაც შეიძლება შეიქმნეს ამომრჩევლის მობილიზებასთან დაკავშირებით. ჩვენ ვნახეთ, რომ საპრეზიდენტო არჩევნებზე ამომრჩევლის 55% არ მივიდა, თუ ასეთი აზროვნებით გაგრძელდა შემდგომი მოქმედებები, მთავრობას მოუწევს ნოვაციის განხორციელება ამომრჩევლის მოტივირებისთვის. რაც შეეხება მინისტრებს, ზოგიერთმა მათგანმა ამ ყველაზე საჭირო გარდამავალ პერიოდში საშუალო დონე აჩვენა, არ იყო იდეები და აუცილებლად განსახორციელებელი რეფორმები არც კი დაწყებულა, ახლაც მეეჭვება რაიმე კონკრეტული გააკეთონ, მაგრამ თავს ვიკავებ გვარების დასახელებისგან. ერთი სიტყვით, ეს სამინისტროები მინისტრის არ არსებობის დროსაც კი შეძლებდნენ ასე ემუშავათ.”
კახიშვილი აცხადებს, რომ დღეს საჭიროა პროფესიონალი და კვალიფიციური მინისტრები და კადრები, რადგან გაზრდილია როგორც ხელისუფლების პასუხისმგებლობა, ასევე საზოგადოების მოთხოვნაც.
“ორხელისუფლებიანობა დასრულდა, საზოგადოების მოლოდინი დიდია, კრიტიკოსებმაც დაასწულეს სიჩუმე, სწორედ ამიტომ დღეს საჭიროა საქმეზე ორიენტირება და კვალიფიციური კადრები”.
კახი კახიშვილი აქვე გამოეხმაურა ზოგიერთი პოლიტიკოსის მიერ გავრცელებულ აზრს, რომ ღარიბაშვილი ბიძინა ივანიშვილის წნეხის ქვეშ იმყოფება და ვერ ახერხებს საკუთარი გადაწყვეტილებების გატარებას.
“ბიძინა ივანიშვილი არასდროს აკადრებს ირაკლი ღარიბაშვილს ამყოფოს თავისი წნეხის ქვეშ და არც ირაკლი მისცემს ამის საშუალებას. მათ პარტნიორული ურთიერთობა აქვთ და მხოლოდ რჩევის კითხვა–მიცემის სახით შემოიფარგლებიან. ბუნებრივია, რომ ივანიშვილი თვალყურს ადევნებს პოლიტიკურ მოვლენებს, რადგან უმრავლესობა მისი მოყვანილია და ქვეყნისა და ხალხის წინაშე პასუხისმგებლობა სწორედ მას აწევს. ივანიშვილი ძალიან ჭკვიანი ადამიანია. მოვიდა, თქვა, შეუსრულა, შეასრულა და ლამაზად გაეცალა ყველაფერს. ბუნებრივია, მასთან კონსულტაციები იქნება, მაგრამ ეს არ ნიშნავს, რომ ის ჩაერევა გადაწყვეტილებების მიღებაში. ივანიშვილმა ძალიან სწორი ნაბიჯი გადადგა, როცა მისი წასვლის შემდეგ ქვეყნის პირველ პირებად დატოვა ღარიბაშვილი-მარგველაშვილის ტანდემი, რათა არ ყოფილიყო ხელისუფლებით გამოწვეული ტკბობის ხანა”.
კონკრეტული გვარების დასახელებისგან თავს იკავებს ექსპერტი მამუკა არეშიძეც. თუმცა, ისიც თვლის, რომ მთავრობის შემადგენლობაში ცვლილებები უნდა განხორციელებულიყო, მაგრამ გამართლებასაც აძლევს ამ ყველაფერს და აღნიშნავს, რომ ამ გადაწყვეტილებით ახალმა პრემიერმა შეინარჩუნა გუნდი.
“მთავრობის შემადგენლობაში ცვლილებები უნდა განხორციელებულიყო, მაგრამ მესმის რატომ არ მოხდა ეს პროცესი. ამ ცვლილებებით ახალი პრემიერი მოახდენდა დემონსტრირებას იმისა, რომ წინა პრემიერის პირობებში მთავრობის ზოგიერთმა წევრმა ვერ გაართვა თავი მოვალეობას. ამიტომ ირაკლი ღარიბაშვილმა ტაქტიკურად აარიდა თავი ამის დემონსტრირებას და შეინარჩუნა ძველი გუნდი, მითუმეტეს, რომ ადგილობრივი არჩევნები წინ გველოდება. ვფიქრობ, ის მინისტრები, რომლებიც ახლაც ვერ გაართმევენ თავს სამუშაოს, სწორედ არჩევნების წინ უნდა შეიცვალონ”.
მამუკა არეშიძემ აღნიშნა, რომ დღეიდან მთავრობას დაუღალავი მუშაობა მოუწევს და არ აქვს შეცდომის დაშვების უფლება, რადგან გასასამართლებლად ვერაფერს ვეღარ მოიფიქრებენ. ხალხის ნდობა და მოთხოვნაც გაიზარდა.
“ხელისუფლებას დიდი ვალდებულება აქვს აღებული ბიუჯეტის მხრივ. მათ უკვე აღარ შეეძლებათ ლაპარაკი იმის თაობაზე, რომ ხაზინა ცარიელი დახვდათ, ვერაფერს იტყვინ გაუგებარ ვალდებულებებზე, ვერ იტყვიან, რომ რაიმე ხელისშემშლელი პირობები აქვთ და უჭირთ მუშაობა. ასე რომ რთული პერიოდი იწყება და ვფიქრობ ამ ეტაპზე პრემიერმა საკმაოდ ტაქტიკური სვლა გააკეთა”.
