“26 მაისმა გამოაცალა საფუძველი სააკაშვილის ერთპიროვნულ მმართველობას. ათასი ჭორი დადის, მაგრამ მინდა გითხრათ, რომ ჩვენი უმთავრესი მიზანი იყო მშვიდობიანად დაგვესრულებინა სააკაშვილის ერთპიროვნული მმართველობა, რეჟიმი, რომელმაც მრავალი უბედურება დაატეხა 9 წლის განმავლობაში საქართველოს. ჩვენ გვინდოდა რეჟიმს დაენახა ხალხის ძალა და ერთობა, თეზისიც ეს იყო – “ძალა ხალხშია”. იმ დროს რომ მომხდარიყო ოპოზიციის გაერთიანება, იმას ვერ გაბედავდა სააკაშვილი, რაც გააკეთა. დაახლოებით, ათასამდე ადამიანი ჩვენი სახალხო ძალისა ჯერ კიდევ 26 მაისის დარბევამდე დააპატიმრეს,” _ ამბობს ჯაველიძე.
მისივე თქმით, 26 მაისს თემურ შაშიაშვილთან ერთად ბათუმში იმყოფებოდა, სადაც მრავალრიცხოვანი მიტინგი ჩაატარეს, შემდეგ კი გადაინაცვლეს აჭარის ტელევიზიასთან და პირდაპირი ეთერი მოითხოვეს.
“ტელევიზიასთანერთ–ერთი დეპუტატის ძმამ ისროლა ქვა და გატეხა შუშა, ჩვენ კი გვქონდა მოთხოვნა შეგზავნილი, რათა 5 კაციანი შემადგენლობით შევხვედროდით ტელევიზიის ხელმძღვანელობას და დაგვეწყო მოლაპარაკება. მაგრამ პროვოკაციის შემდეგ დაიწყო დარბევა. მოხდა არეულობა და ტელევიზიის მიმდებარე ტერიტორია დაიცალა. მეორე დარბევა მოხდა აჭარის ჩვენს ოფისთან. ამის მერე გადავწყვიტეთ თბილისის დემონსტრაციასთან შეერთება, მაგრამ გზაში უმრავლესობა დააკავეს და თბილისში დაახლოებით 200 კაცი ჩამოვიდა. თბილისის დარბევა კი ყველას ახსოვს. ის, რაც არ გაუკეთებია როდიონოვს, 26 მაისს გააკეთა სააკაშვილმა. ეს დარბევაც არ იყო, ეს იყო ანგარიშსწორება ყველა ადამიანზე, რომელმაც ხმა აიმაღლა სააკაშვილის წინააღმდეგ,” _ აცხადებს ჯაველიძე.
ამასთან, ამბობს, რომ 26 მაისის დარბევა იყო მკვლელობა მშვიდობიანი მომიტინგეების და “სააკაშვილი–მერაბიშვილის ტანდემმა ჩაიდინა აუღწერელი დანაშაული ქართველი ხალხის წინააღმდეგ”. სახალხო კრების ლიდერის განცხადებით, აბსურდული განცხადებები გაკეთდა, როცა ითქვა, რომ რუსის ჯარის შემოყვანა უნდოდა ნინო ბურჯანაძეს.
“ნინო ბურჯანაძის გადაწყვეტილება არ იყო ის გამოსვლები. ეს იყო სახალხო კრების გადაწყვეტილება, იმ ხალხისა, რომლებსაც უნდოდათ თავისი პროტესტი ხმამაღლა გამოეთქვათ. დანაშაულს დანაშაული დაუმატეს და იმ მოედანზე, სადაც ხალხის სისხლი დაღვარეს, აღლუმი ჩაატარეს,” _ განაცხადა ჯაველიძემ.
26 მაისის თემას შეეხო მოძრაობა “თეთრების” ლიდერი თემურ შაშიაშვილიც და აღნიშნა, რომ ამ საქმის ბოლომდე სამართლიანად გამოძიება ღირსების საქმეა.
“26 მაისის ღამეს ხალხს სახელმწიფო სამსახურის თანამშრომლებიც არბევდნენ. ჩვენება მივეცი და მზად ვარ დაკითხვაზე კიდევ მივიდე. ჩვენი სურვილი იყო, რომ სასამართლო პროცესი ღია ყოფილიყო. ვიცი, რომ პროკურატურა გვარებს მკითხავს, ყველას გვარი ვიცი, ვინც გვირტყამდა და ახლაც ხმამაღლა ვიტყვი, რომ ყველანი გამგეობის და სახელმწიფო სამსახურის მუშაკები იყვნენ. მინდა ირაკლი ღარიბაშვილს მივმართო და ვუთხრა – ბატონო პრემიერო, ვინც მაშინ ნიღბით იდგა და გვცემდა, თქვენს ირგვლივ ტრიალებს, ეს არ უნდა აპატიოთ. სწორედ რომ ღირსების საქმეა, 26 მაისის გამოძიება ბოლომდე იყოს მიყვანილი,” _ ამბობს შაშიაშვილი.
ამასთან, როგორც იგი აცხადებს, ის არის პიროვნება, რომელიც ბოლო წუთამდე იდგა მიკროფონთან და თავისი თვალით ნახა ის საშინელება ბოლო წუთამდე.
“მოსახლეობამ დღემდე არ იცის ჩვენ რა მოთხოვნები გვქონდა. მიხეილ სააკშვილმა შეძლო მოსახლეობა დაერწმუნებინა, რომ თითქოს ჩვენ ვიყავით წინააღმდეგი იმისა, რომ საქართველოს დამოუკიდებლობის დღე აღნიშნულიყო, ეს არის ტყუილი. ჩვენი მოთხოვნა იყო მიწაზე მფორთხავ მთავარსარდალს არ მიეღო აღლუმი. ვანო მერაბიშვილი და მიხეილ სააკაშვილი რომ ისაუბრებენ იმაზე, რომ ნონა გაფრინდაშვილი, რეზო ესაძე, ელიზბარ ჯაველიძე და გია ბურჯანაძე ეროვნულობას ებრძვიან, ხომ სასაცილოა?!” _ აღნიშნავს შაშიაშვილი.
26 მაისის თემაზე დღესვე სპეციალური განცხადება გააკეთეს პოლიტპატიმრებმა.
“26 მაისის საქმეზე 50 ადამიანი ვიყავით დაჭერილი, ჩვენებები მიცემული გვაქვს, მალე გამოძიება დაიწყება, ვნახოთ მერე, ვანო მერბიშვილი პოლიტპატიმარია თუ დამნაშავე, რომელიც უნდა იჯდეს ციხეში არაერთი მუხლით. იმედი გვაქვს, ახალი პრემიერ-მინისტრის, ახალი მთავარი პროკურორის, ახალი შს მინისტრის, რომ ჩვენი საქმე იქნება გამოძიებული. დამნაშავე კი გამოვლენილი და დასჯილი. 26 მაისს საზოგადოების მოთხოვნა იყო ერთადერთი, რომ ჩვენ არ დაგვეშვა დამოუკიდებლობის დღეს წაგებულ მთავარსარდალს, რომელმაც გორში ისე იხოხიალა, რომ გადათხარა ასფალტი, მიეღო საზეიმო სამხედრო აღლუმი. ჩვენ არ ვიყავით წინააღმდეგი აღნიშნულიყო დამოუკიდებლობის დღე, ჩვენ გვინდოდა სააკაშვილს ჩაეტარებინა აღლუმი, როგორც დამარცხებულ მთავარსარდალს,” _ აცხადებენ პოლიტპატიმრები და იმედს გამოთქვამენ, რომ “კოაბიტაცია დასრულდა და ახლა მაინც აღდგება სამართლიანობა”.
