“ჩვენ, “სოციალ–დემოკრატები საქართველოს განვითარებისთვის”, მივესალმებით პარტია “ქართული ოცნება – დემოკრატიული საქართველოს” ყრილობას.
მიუხედავად არსებობის მოკლე დროისა, “ქართულმა ოცნებამ” მისი ლიდერის, ბიძინა ივანიშვილის ხელმძღვანელობით ისტორიული როლი შეასრულა, უზრუნველყო ავტორიტარული რეჟიმის მშვიდობიანი შეცვლა და ქვეყნის განვითარების დემოკრატიულ პროცესს დაუდო სათავე. ხელისუფლებაში მოსვლის დღიდან პარტიამ მოქალაქეთა სოციალური მდგომარეობის გამოსწორება მის ძირითად პრიორიტეტად გამოაცხადა და აქტიურად დაიწყო იმ ურთულეს სოციალურ და ეკონომიკურ გამოწვევებთან ბრძოლა, რაც მას მძიმე მემკვიდრეობად ერგო.
დღეს პარტიის ლიდერმა ბიძინა ივანიშვილმა დატოვა პარტიის თავმჯდომარის თანამდებობა და ყრილობამ ახალი ხელმძღვანელობა აირჩია. ჩვენ გვჯერა, რომ ბიძინა ივანიშვილის საზოგადოებრივი მოღვაწეობა ისეთივე ეფექტური და სიკეთის მომტანი იქნება ქვეყნისთვის, როგორც მისი ხანმოკლე პოლიტიკური მოღვაწეობა.
ჩვენ ვულოცავთ ბატონი ირაკლი ღარიბაშვილს პარტიის თავმჯდომარედ არჩევას და გვწამს, რომ იგი, როგორც პრემიერ-მინისტრი და პარტიის ხელმძღვანელი კიდევ უფრო განამტკიცებს განვითარების იმ კურსს, რომელსაც ქვეყანა დაადგა.
“ქართული ოცნების” ახლად მიღებულ წესდებაში მკაფიოდ არის განცხადებული, რომ პარტია ეყრდნობა სოციალ-დემოკრატიის პრინციპებს.
ჩვენ მივესალმებით ამ განცხადებას, რადგან მიგვაჩნია, რომ სწორედ სოციალ-დემორკატიულ პრინციპებზე დაფუძნებულ პოლიტიკას შეუძლია მოუტანოს ქვეყანას ჭეშმარიტად ევროპული მომავალი, გამოიყვანოს ჩვენი ხალხი მძიმე სოციალ-ეკონომიკური მდგომარეობიდან და ახალი რეალური პერსპექტივა შექმნას ქვეყნის განვითარებისთვის. ეს მართლაც შესანიშნავი შესაძლებლობაა რადგანაც “ქართული ოცნების” ახლადარჩეული თავმჯდომარე იმავდროულად მთავრობის მეთაურიცაა.
“სოციალ-დემოკრატები საქართველოს განვითარებისთვის”, როგორც პარტია, რომელიც ასევე აღიარებს სოციალ-დემოკრატიულ პრინციპებს, მზადა ვართ ყოველმხრივი და ინტენსიური თანამშრომლობისთვის “ქართულ ოცნებასთან”, _ ნათქვამია განცხადებაში, რომელსაც “სოციალ – დემოკრატების” სახელით ხელს აწერს პარტიის თავმჯდომარე გია ჟორჟოლიანი.
