“საქართველოს უზენაესი სასამართლოს და იუსტიციის უმაღლესი საბჭოს თანამდებობის პირები მუდმივად აცხადებდნენ, რომ მათი პრიორიტეტი ძლიერი და დამოუკიდებელი მართლმსაჯულების შექმნა იქნებოდა. გარდა ამისა, იმასაც აღნიშნავდნენ, რომ მოსამართლეთა შესარჩევ კონკურსებზე გადაწყვეტილება მიღებული იქნებოდა იმ ფორმით, რომ კვალიფიციური და გამოცდილი მოსამართლეები არ ჩამოშორებოდნენ სისტემას, რომ უვადო დანიშვნა მოქმედ მოსამართლეებსაც უნდა შეხებოდათ. გარდა ამისა, კარიერის პრინციპით მოსამართლეთა სამსახურებრივი წინსვლის უზრუნველყოფა ერთ-ერთი მიმართულება იქნებოდა. სამწუხაროდ, რეალობა სხვაგვარია და მათი დაპირებები რეალიზებას ვერ ახდენს პრაქტიკაში. ამის მაგალითია იუსტიციის უმაღლესი საბჭოს ბოლო გადაწყვეტილება, როდესაც რამდენიმე გამოცდილი კადრი როგორც მოქმედ, ასევე ყოფილ მოსამართლეთაგან არ გამწესდა თანამდებობაზე.”
“მოსამართლეთა ერთობის” ინფორმაციით, 20 ნოემბერს, იუსტიციის უმაღლესი საბჭოს მოსამართლე წევრებმა განცხადება გააკეთეს, სადაც აღნიშნულია, რომ მოსამართლე წევრებმა ხმა მისცეს კანდიდატების დაახლოებით 2/3-ს.
“მათ მიერ ერთობლივად გაკეთებული განცხადება ცხადყოფს იმ ფაქტს, რომ ეს არის გუნდურად და წინასწარ შეთანხმებით მიღებული გადაწყვეტილება, რომელიც სცილდება და შორს არის ინდივიდუალური არჩევანისგან. აღსანიშნავია, რომ მოქმედი კანონმდებლობის შესაბამისად, იუსტიციის უმაღლესი საბჭო შეიმუშავებს მოსამართლეთა დანიშვნის კრიტერიუმებს. 19 ნოემბრის შედეგები ცხადყოფს, რომ მოსამართლეთა დანიშვნის მოქმედი წესი ვერ უზრუნველყოფს საბჭოს მიერ ტენდენციური და ბუნდოვანი გადაწყვეტილებების მიღებას. მოსამართლეთა დანიშვნის კრიტერიუმების არასრულყოფილება ასევე დაადასტურეს თავიანთ განცხადებაში იუსტიციის საბჭოს არამოსამართლე წევრებმაც. სწორედ ამიტომ, მიგვაჩნია, რომ აუცილებელია დაიხვეწოს მოსამართლეთა დანიშვნის პროცედურა, რომელიც დამყარებული იქნება ობიექტურ კრიტერიუმებზე და კანდიდატს ექნება შესაძლებლობა მიიღოს სრული ინფორმაცია მათ მიმართ გამოტანილი გადაწყვეტილების შესახებ”, – აცხადებენ “საქართველოს მოსამართლეთა ერთობაში.
“მოსამართლეები, ასევე საზოგადოების ის ნაწილი, რომელსაც შეხება აქვს სასამართლოსთან დაგვეთანხმება, რომ მოსამართლეთა არსებული რაოდენობა ნამდვილად არ არის საკმარისი ეფექტური მართლმსაჯულების უზრუნველსაყოფად. ამდენად, მნიშვნელოვან პრიორიტეტს წარმოადგენს საბჭოს მიერ შტატების საჭირო რაოდენობის განსაზღვრა და მათი რიცხოვნობის გაზრდა და არა შემცირება.
მიგვაჩნია, რომ ამ საკითხების დარეგულირების გარეშე, არსებულ ვითარებაში და იუსტიციის უმაღლესი საბჭოს პრაქტიკის პირობებში შეუძლებელია დამოუკიდებელი და გამჭვირვალე სასამართლო სისტემის ფორმირება”, _ აცხადებენ “საქართველოს მოსამართლეთა ერთობაში”.
