“გურია ნიუსი” ამ საკითხთან დაკავშირებით პარტიის ლიდერ მიხეილ მაჭავარიანს ესაუბრება. მისი განცხადებით, ამ ეტაპზე ბევრი რამ არის გაურკვეველი თვითმმართველობის კოდექსის პროექტში.
_ მივესალმები თუ იქნება პირდაპირი არჩევნები, მათ შორის გამგებლების. თუ გადაიდგმება ეს ნაბიჯი ძალიან კარგია. თუ რამე კარგი გაკეთდება ჩვენ ამას აუცილებლად მივესალმებით, მაგრამ ვინაიდან თვითმმართველობის კოდექსი, რომელიც შემოსულია და გვეუბნებიან, რომ საბოლოოდ არ ასახავს მთავრობის პოზიციას, ჩემთვის ძნელია, კიდევ სხვა რამეზე ვისაუბრო. მაგალითად, მე არ ვიცი რა იქნება საბიუჯეტო საყრდენი მუნიციპალიტეტებში, საშემოსავლო გადასახადის რა ნაწილი დარჩება ადგილობრივ ბიუჯეტში, როგორ მოხდება მუნიციპალიტეტების გადანაწილება, საარჩევნო სისტემა როგორ იქნება, ჯერ კიდევ ძველი სისტემაა შენარჩუნებული. რაც მესმის განხილვების დროს, როდესაც შეხვედრებია მუნიციპალიტეტში და ქალაქებში, ის აბსოლუტურად განსხვავებულია იმ ვერსიისგან, რაც წერია ქაღალდზე. ესეთი პრაქტიკა ევროპაში საერთოდ არ ყოფილა. არჩევნებამდე მინიმუმ ერთი წლის ადრე საარჩევნო წესები, თვითონ ადმინისტრაციული სისტემა და პრინციპები უნდა იყოს შეთანხმებული. მეტიც, ჩვენ უცხოელ პარტნიორებთან ევროპის საბჭოში უნდა იყოს გავლილი კონსულტაციები ამ კანონთან დაკავშირებით. სამწუხაროდ, ხელისუფელბა აგვიანებს ამ რეფორმას, საბოლოო ჯამში როგორ ჩამოყალიბდება ვერ გეტყვით. დაველოდოთ მოვლენების განვითარებას.
_ ბატონო მიხეილ, როგორ შეაფასებთ იმ ფაქტს, რომ 12 ახალი თვითმმართველი ქალაქი იქნება?
_ თქვენ ეს სად წაიკითხეთ?
_ ამასთან დაკავშირებით ხელისუფლების წარმომადგენლებმა გააკეთეს უკვე განცხადება…
_ ესეთი რაღაც არ წერია შემოტანილ კანონპროექტში. აი როცა დაიწერება და მეცოდინება, მერე გავაკეთებ განმარტებას.
_ არც დეცენტრალიზაციის საკითხზე წერია შემოტანილ კანონპროექტში?
_ არ წერია ასეთი კონკრეტიკა. დაგვპირდნენ, რომ განხილვების დროს იქნება კონკრეტიკა და ვნახოთ.
_ ბატონო მიხეილ, შეგიძლიათ კონკრეტულად გვითხრათ რა არის ისეთი, რომელზეც საუბრობენ ტელევიზიით და არ არის ასახული კანონპროექტში?
_ მაგალითად, მუნიციპალიტეტების დაყოფა, ეს კანონპროექტში არ არის. შემიძლიათ მოგაწოდოთ ეს კანონპროექტი და თავად გაეცანით. არის საუბარი, რომ ქობულეთში იქნება სამი ან ოთხი მუნიციპალიტეტი, მაგრამ კონკრეტულად არ ჩანს ამის ეკონომიური საფუძველი, საკუთრება რა იქნება და ა.შ.
_ თქვენ ალბათ გექნებოდათ ამასთან დაკავშირებით საუბარი პარლამენტის წევრებთან და ხელისუფლების წარმომადგენლებთან, რას ამბობენ, რატომ არ არის უფრო მეტი კონკრეტიკა თუნდაც თქვენს მიერ დასმულ კითხვებზე?
_ მეუბნებიან, რომ… აბა, რა ვიცი, რას მეუბნებიან. იმედია, როდესაც კომიტეტებში დაიწყება განხილვები, მაშინ იქნება კონკრეტიკა, ვნახოთ.
_ ახლა რაც შეეხება თვითმმართველობის კოდექსის ალტერნატიულ კანონპროექტს, რომლის შეტანასაც “ერთიანი ნაციონალური მოძრაობა” გეგმავს. ჩვენ გვაქვს ინფორმაცია, რომ ამისთვის ხელმოწერები შეგროვდა რეგიონებში…
_ ჩვენ არ გვჭირდება ხელმოწერების შეგროვება. ჩვენ რამე ალტერნატივა თუ გვექნება, პირდაპირ დეპუტატს აქვს უფლება დააყენოს კენჭისყრაზე.
_ ეს რა ხელმოწერები იყო?
_ ვერ გეტყვით ნამდვილად.
