(გურია ნიუსი, ლანჩხუთი) _ გასულ კვირას, თელავში განათლების სამინისტროს ეგიდით ჩატარებული ხელბურთის პირველობის დასკვნითი ეტაპი გაიმართა, რომელშიც მონაწილეობას საქართველოს ათივე რეგიონის გამარჯვებული გუნდი იღებდა. გურიის ღირსებას ლანჩხუთის სოფელ ნიგოითის საჯარო სკოლის ხელბურთელთა გუნდი იცავდა. ნიგოითელმა ბავშვებმა ფინალურ სტადიაზე რამდენიმე მატჩი მოიგეს და საერთო ჯამში მასპინძელ გუნდთან ერთად 5-6 ადგილი გაიყვეს. ეს იყო პირველი ტურნირი, რომელშიც ნიგოითელმა ბავშვებმა მიიღეს მონაწილეობა და წარმატებასაც მიაღწიეს:
_ რაც რეგიონის გამარჯვებულები გავხდით, თელავში ფინალურ ეტაპზე მიგვიწვიეს. ათივე რეგიონის წარმომადგენლები ორ ქვეჯგუფად დაგვყვეს. ჩვენს ქვეჯგუფში იყვნენ: სამცხე-ჯავახეთი, შიდა ქართლი, იმერეთი, სამეგრელო. პირველი მატჩი სამცხე-ჯავახეთელებს მოვუგეთ _ 8:3 გავიმარჯვეთ, შემდეგ დავმარცხდით სამეგრელოს წარმომადგენლებთან. გადამწყვეტი მატჩში იმერეთის, კერძოდ, ზესტაფონის გუნდს შევხვდით. მთელი თამაში ვიგებდით, მაგრამ ჩვენი მოთამაშის გივი ორმოცაძის ტრავმა გადამწყვეტი აღმოჩნდა _ ბავშვები ცოტა მოეშვნენ და იმერლებმა ამით ისარგებლეს. მატჩის ბოლოს სამი 7-მეტრიანი ვერ გამოვიყენეთ და 5:6 დავმარცხდით. ჯგუფში ბოლო მატჩში რუსთავის გუნდი 10:2 დავამარცხეთ. თუმცა, ეს არ აღმოჩნდა საკმარისი ფინალში გვეთამაშა. საერთო ჯამში, კახეთის გუნდთან ერთად 5-6 ადგილი დავიკავეთ, _ გვითხრა გუნდის მწვრთნელმა ნუგზარ გოგეშვილმა, _ ჩვენთვის ეს დიდი წარმატებაა _ ფინალურ ეტაპზე ყველა ქალაქის გუნდი იყო წარმოდგენილი და მხოლოდ ჩვენ ვიყავით სოფლის გუნდი. ჩვენ სკოლაში სულ 150 ბავშვი სწავლობს, ხოლო 1998-99 წლებში დაბადებული (სწორედ ამ ასაკში გაიმართა საქართველოს პირველობა) 20-ია. სწორედ მათ შორის მოგვიხდა მოთამაშეების არჩევა. ბოლო 6 თვის მანძილზე ვივარჯიშეთ და წარმატებას მივაღწიეთ.
ბატონი ნუგზარის თქმით, ხელბურთში საქართველოს სკოლებს შორის პირველობა გოგონებშიც გაიმართა. მისი მოსწავლეები ფინალურ ეტაპზე იყვნენ მიწვეულნი, მაგრამ რიგი მიზეზების გამო, შეჯიბრებაზე წასვლა ვერ მოხერხდა. მწვრთნელის თქმით, მცირედი ყურადღებაც კი საკმარისი იქნება იმისათვის, რომ ბავშვებმა მომავალში უკეთესი შედეგი აჩვენონ: _ არ გვაქვს ნორმალური სავარჯიშო დარბაზი, ბურთები, კარის ბადეები. თელავში ხელბურთის ფედერაციის გენერალურმა მდივანმა ზურაბ კაკაბაძემ 3 ბურთი გადმოგვცა საჩუქრად, თუმცა ეს ზღვაში წვეთია _ ყველა ბავშვს უნდა ჰქონდეს ინდივიდუალური ბურთი, რათა ნორმალური ვარჯიში შესძლოს.
ნიგოითის გუნდის ღირსებას ფინალურ ეტაპზე შემდეგი ხელბურთელები იცავდნენ: ლაშა გოგეშვილი, ჯემალ მამასახლისი, თორნიკე ფირცხალაიშვილი, მიხეილ ჯიბლაძე, გივი ორმოცაძე, თორნიკე მიმინოშვილი, დავით მახარაძე, მურთაზ ხვედელიძე, რემი ხვედელიძე, ნოდარ მარუაშვილი, მიხეილ თაბაგარი, მურმან მიმინოშვილი, თორნიკე კალანდარიშვილი.
