“უნდა რცხვენოდეს “რესპუბლიკურ პარტიას”, დიახ, სირცხვილი “რესპუბლიკურ პარტიას” და მის წარმომადგენლობას ადიგენში. ეს არის აშკარა პროვოკაცია, რამაც საქართველო შესაძლოა პოლიტიკური ისლამის პოლიგონად აქციოს. ამას აჭარაში და სამცხე-ჯავახეთში აკეთებენ თურქული სპეცსამსახურები, თან სრულიად ღიად, დაუფარავად! ახლა სწორედ რომ დროა ერთად დავდგეთ და დავუპირისპირდეთ ყველას, ვინც ცდილობს რელიგიური ნიშნით სპეკულირებას”.
ჯონდი ბაღათურიას ამ შეფასებას გამოეხმაურა უმრავლესობის წევრი დავით ზურაბიშვილი და აღნიშნა, რომ მინარეთის აღდგენა ბიძინა ივანიშვილისა და ირაკლი ღარიბაშვილის ინიციატივით მოხდა. ზურაბიშვილის განცხადებით, ეს სწორი გადაწყვეტილება იყო.
“ბაღათურიას ივანიშვილი შეიძლება “რესპუბლიკური პარტიის” წევრი ჰგონია, ჩვენ ამის საწინააღმდეგო არაფერი გვაქვს, თუმცა სიმართლესთან შორსაა. თავის დროზე მინარეთის იმ ფორმით დემონტაჟი არ უნდა მომხდარიყო, დღეს კი მისი აღდგენა სწორი გადაწყვეტილება იყო”.
ჭელაში ჟურნალისტებთან საუბრის დროს “საზოგადოებრივი დარბაზის” თავმჯდომარემ გოდერძი კუბლაშვილმაც “რესპუბლიკური პარტია” დაადანაშაულა და განაცხადა, რომ ადიგენის საკრებულოს წევრებზე ზეწოლა “რესპუბლიკური პარტიის” წევრებმა განახორციელეს.
“მარხვის პირველივე დღეს სიურპრიზი მოგვიწყვეს და მინარეთი დაგვიდგეს, რაშიც დიდი წვლილი შეიტანეს “რესპუბლიკური პარტიის” წევრებმა. სწორედ მათ უნდა აიღონ შემდგომ მოვლენებზე პასუხისმგებლობა ღვთისა და ერის წინაშე. უმძიმესი ზეწოლა მოხდა საკრებულოს წევრებზე, რის შედეგადაც მიიღეს ეს გადაწყვეტილება და დაიდგა მინარეთი”.
მინარეთის აღდგენასთან დაკავშირებით თავისი აზრი გამოთქვა ზარზმის მონასტრის წინამძღვრმა, მამა ნიკოლოზ გეწაძემ და განაცხადა:
“ჭელაში მინარეთის დადგმით სახელმწიფომ საკუთარი თავი ჩიხში შეიყვანა. ადიგენის რაიონის სოფლებში ქრისტიანები გაცილებით მეტად, ვიდრე მუსლიმები, დაშინებულნი არიან და ამას ის ფაქტიც მოწმობს, რომ დღეს ადგილობრივი ქრისტიანები მეჩეთთან არ ჩანან. ქრისტიანები ჭელეში მართლმადიდებლურ ტაძარს აშენებენ და მასალის შეგროვება გაუჭირდათ. ყველაფერმა რომ მშვიდობიანად ჩაიარა, ეს მეუფის კეთილი ნება იყო. არ ვაპირებთ მძაფრ რეაქციას, რადგან საკრებულომ დაადგინა და ამის აღმათვა სამართლებრივად მოხდა, ხელში რაღაცეების აღებას, მათ დევნას და მოწოდებების გაკეთებას არ ვაპირებთ. პროტესტი დღევანდელი დღით არ დასრულდება, მაგრამ ეს არ არის მხოლოდ ჩემი პროტესტი. მე ვიცი, რომ სახელმწიფოს მაღალჩინოსნები თავადაც წუხან ამის გამო. მე ვუთანაგრძნობ, რომ მსგავსი გადაწყვეტილების მიღება მოუწიათ”.
დღეს დილიდან ჭელაში შეკრებილები იყვნენ სასულიერო პირები, რომლებმაც სავედრებელი პარაკლისი გადაიხადეს და რომელთა განცხადებით მსგავი საკითხების გადაწყვეტა რეფერენდუმის გზით უნდა ხდებოდეს.
ამ დროისთვის სასულიერო პირთა ნაწილმა ჭელა დატოვა, ნაწილი კი მრევლთან ერთად ისევ რჩება ადგილზე. მრევლის წარმომადგენლები აცხადებენ, რომ ჭელაში თბილისიდანაც ელოდებიან თანამოაზროვნეებს. ვრცელდება ინფორმაცია, რომ მოძღვრები სავედრებელ პარაკლისს კიდევ გადაიხდიან
