გასული კვირის განმავლობაში, გურიის გუბერნატორი ხან ზღვისპირა ურეკში იმყოფებოდა და ხან კიდევ მთიან მთისპირში. რატომ გააქტიურდნენ ადგილობრივი ხელისუფლების წარმომადგენლები, მკითხველიც კარგად მიხვდება _ ხმამაღლა არავინ ამბობს, მაგრამ ჩუმად ყველა საუბრობს, რომ საარჩევნო სამზადისი უკვე დაიწყო.
6 ივლისს, ოზურგეთის მუნიციპალიტეტის საკრებულოს თავმჯდომარის კაბინეტში, ალეკო მამეშვილმა და ოზურგეთის მუნიციპალიტეტის გამგებელმა გიორგი ტაკიძემ გვაცნობეს, რომ შექმნილია უსახლკარო, გაჭირვებულ ოჯახთა ერთიანი ბაზა და მუნიციპალიტეტის 2011 წლის ბიუჯეტში მათ დასახმარებლად პროგრამით გათვალისწინებულია 50 ათასი ლარი.
მამეშვილის თქმით, დასახმარებელი ოჯახების შერჩევა რამდენიმე კრიტერიუმით მოხდა _ პრიორიტეტი სოციალურად დაუცველ, მრავალსულიან და ალტერნატიული საცხოვრებელი ფართის უქონელ ოჯახებს მიენიჭა.
“გურია ნიუსის” ჟურნალისტებთან შეხვედრისას გია ტაკიძემ თქვა, რომ მუნიციპალიტეტის გამგეობაში აღნიშნული პროგრამა გრძელდება და წლის ბოლომდე კიდევ რამდენიმე უსახლკარო ოჯახის დაკმაყოფილება ეტაპობრივად მოხდება:
_ წლის ბოლომდე რამდენ ოჯახს შეუძენთ საცხოვრებელ სახლს?
_ ზუსტ ციფრს ვერ გეტყვით, რადგან ერთნაირ ფასებში ვერ ვიძენთ სახლებს.
_ რა დაჯდა ორი სახლის შეძენა, რომელიც უკვე მფლობელობაში გადაეცა ვლადიმერ საინიშვილის და შუშანა შავაძის ოჯახებს?
_ გურიანთაში, საინიშვილის ოჯახისთვის შევიძინეთ ორსართულიანი სახლი 5 000 კვმ. მიწის ნაკვეთით 12 ათას ლარად, მთისპირში უფრო ნაკლებად _ 5 000 ლარად. ისიც ორსართულიანია.
საკრებულოს თავმჯდომარის კაბინეტში მოწყობილი პრესკონფერენციის შემდეგ, ადგილობრივი ხელისუფლება მხარის გუბერნატორთან, ვალერი ჩიტაიშვილთან ერთად, მთისპირში წავიდა, სადაც შავაძეების ოჯახისთვის შეძენილი სახლი მოინახულა.
_ ახლა არ მითხრათ, რომ გზა არის გასაკეთებელი მთისპირშიო! ეს პრობლემა ძალიან მალე მოგვარდება და დაიწყება გზის სარემონტო სამუშაოები, _ თავი იმართლა ბატონმა ვალერიმ, თუმცა, ის ვერ მივხვდით, რატომ არ უნდა გვეთქვა სიმართლე, _ დღეს ოზურგეთის მუნიციპალიტეტმა ორ ოჯახს მოუგვარა პრობლემა და წლის ბოლომდე კიდევ რამდენიმე ოჯახს დაეხმარებიან.
13-სულიანი ოჯახის დიასახლისი, შუშანა შავაძე, თავისი ოჯახის გაუსაძლისი პირობების შესახებ გვესაუბრა: _ სახლი ორჯერ დამეწვა ხულოში. შემდეგ ახალი სახლი ავაშენეთ, მაგრამ მეწყერმა წაიღო, რის შემდეგაც ოზურგეთში გადმოვსახლდით. აქაც დაგვენგრა სახლი სიძველის გამო, მეუღლე სიმსივნით გარდამეცვალა. უსახლკაროდ რომ დავრჩი, მეზობლის სახლში შევსახლდი, შემდეგ ადგილობრივ ხელისუფლებას ვთხოვე დახმარება და რამდენიმე წლის შემდეგ, ეს სახლი შემიძინეს, _ გვითხრა შუშანა შავაძემ.
შავაძის ოჯახში იმ დღეს ბევრი სტუმარი იმყოფებოდა, მათ შორის, მისი მეზობლები, რომლებმაც “გურია ნიუსთან” რამდენიმე პრობლემის შესახებ ისაუბრეს:
_ თქვენც კარგად ნახეთ, რამდენი პრობლემა აქვს სოფელს _ გზა არ არის, მოუგვარებელია წყლის პრობლემა. აქ ცხოვრება აღარავის უნდა, მოსახლეობა გარბის სოფლიდან, რადგან აქ ცხოვრება ძალიან ჭირს.
მთისპირიდან ადგილობრივი ხელისუფლება გურიანთაში გაეშურა, სადაც ვლადიმერ საინიშვილის ოჯახს ესტუმრა. ეს ოჯახი ადრე სოფელ შრომაში ცხოვრობდა.
ელენე საინიშვილი, ოჯახის დიასახლისი: _ სახლში რვა სული ვართ. ძალიან ცუდ მდგომარეობაში ვცხოვრობდით _ თავზე გვაწვიმდა. ახლა ძალიან კმაყოფილი ვარ, ჩემი ოჯახი გახარებულია ასეთი ძვირფასი საჩუქრის გამო.
როგორც ჩვენი წყარო ამბობს, საინიშვილებს 12 ათასად ღირებული სახლი მთავრობამ სოფელ გურიანთის მაჟორიტარი დეპუტატის და “ვაშნარის” ამხანაგობის თავმჯდომარის მერაბ მჟავიას და ოზურგეთის მუნიციპალიტეტის ბუღალტრული აღრიცხვა-ანგარიშგების განყოფილების უფროსის ელიკო დოლიძის (მერაბი და ელიკო დეიდაშვილები არიან) ბებიისგან შეუძინეს.
