სატრანსფერო ჭორ-მართალი

დღეს ნისლიანი ალბიონში მოსალოდნელ ტრანსფერებზე გესაუბრებით: არსენალის გულშემატკივრები და განსაკუთრებით, არსენალის მწვრთნელი არსენ ვენგერი დადხანს ელოდნენ ამ მომენტს _ როგორც იქნა, მათი გუნდი ჩემპიონატის ლიდერია და არც თუ ცუდი შანსი აქვს 10 წლის “შესვენების” შემდეგ, ჩემპიონის ტიტული დაიბრუნოს. თუმცა, წინ გრძელი გზაა, არის საკადრო პრობლემები, ლაზარეთშია თეო ვოლკოტი და ლუკას პოდოლსკი. არ იქნება გასაკვირი, თუ არსენალი იანვარში კიდევ ერთ ფორვარდს შეიძენს. ერთ-ერთ კანდიდატად ფრანგი, მაღალი დონის ფორვარდი კარიმ ბენზემა განიხილება, რომელსაც რეალში არც თუ კარგად მისდის საქმე _ ეს ინფორმაცია სავსებით რეალურია!

მანჩესტერ სიტის ნორმალური მწვრთნელი ეღირსა, თუმცა ჰარტი ვეღარ არის ფორმაში. არადა 2 წლის წინანდელი ჩემპიონობა თითქმის მის “სინდისზეა”. შარშანაც სტაბილური იყო, თუმცა, ახლა რუმინელი პანტელეიმონი იცავს სიტის კარს. თუ ჰარტი არ გამოფხიზლდა, იანვარში სრულიად რეალურია 26 წლის ასმირ ბეგოვიჩი ვიხილოთ “ეტიჰარდდზე”. ის ბოსნიელია და არაა გასაკვირი, მსოფლიო ჩემპიონატზე თავისი რეაქციით და ოსტატობით ბევრი კლუბის ყურადღება მიიქციოს. რაც შეეხება სიტის, მცველის დამატებაზეც არ იტყოდა პელეგრინი უარს, თან იმ დროს, როცა გუნდის პატრონი, შეიხი მანსური საკმაოდ ხელგაშლილია.

სამაგიეროდ, მაურისიო პოჩეტინო თვლის, რომ საუთჰემპტონს სულაც არ სჭირდება ვინმეს დამატება. გუნდი ისედაც ძალიან კარგ სეზონს ატარებს _ მე-5 ადგილზეა პრემიერლიგაში, თუმცა “წმინდანებს” ამ პოზიციის შენარჩუნება ძალიან გაუჭირდებათ. ისიც უნდა აღინიშნოს, რომ ისეთი აკადემიის მქონე გუნდს, როგორიც საუთჰემპტონია, კიდევ უფრო მეტ სურპრიზის შემოთავაზებაც შეუძლია _ სწორედ ამ ქალაქში აღიზარდნენ 100 მილიონად შეძენილი გარეტ ბეილი, ალექს ოქსლეი-ჩემბერლენი, თეო ვოლკოტი. აკადემიიდან დააწინაურეს ადამ ლალანა, ერთ-ერთი ლიდერი და ინგლისის ნაკრების დებიუტანტი. ასე რომ, ჰამპშირელებს საამაყოდ ნამდვილად აქვთ საქმე.

სეზონის ბოლოს კონტრაქტი ეწურება 26 წლის ირლანდიელ თავდამსხმელს, საკმაოდ ნიჭიერი და საინტერესო ფეხბურთელი შეინ ლონგს და ვესტ ბრონვიჩმა ჯერ-ჯერობით ვერ შეძლო მისი დაყოლიება კონტრაქტის გახანგრძლივებასთან დაკავშირებით. მისით ჰალი, ნიუკასლი და სტოკი ინტერესდება, ასე რომ, “სამყურების” ერთ-ერთი ლიდერი უმუშევარი ნამდვილად არ დარჩება.

ასტონ ვილას სულ მალე დაუბრუნდება უიგანში განათხოვრებული 24 წლის ნახევარმცველი მარკ ალბრიქტონი.

ტოტენჰემი ინტერესს იჩენს რეალ ბეტისის 19 წლის ნახევარმცველ ალვარო ვადილო კიფუენტეს მიმართ. სპეციალისტები ნიჭიერი ესპანელი ფეხბურთელის სავარაუდო ფასად 20 მილიონ ევროს ასახელებენ, რაც ძალიან ბევრია, თუმცა, ტოტენჰემს კონკურენტიც ჰყავს _ თანაქალაქელი არსენალი, რაც ბუნებრივად გაზრდის ვადილოს ფასს.