“გლდანის საპყრობილეში მყოფმა პატიმრებმა შიმშილობის აქცია დაიწყეს და დღეს უკვე მათ უერთდებიან დანარჩენი კოლონიები და ციხეები,” _ განაცხადა კაკაბაძემ.
ამ ინფორმაციას გამოეხმაურა სასჯელაღსრულების მინისტრი სოზარ სუბარი და განაცხადა, რომ მოშიმშილე პატიმრების რიცხვი 52-ია. სუბარმა ასევე ყველას მოუწოდა მსგავსი განცხადებების გაკეთების თავშეკავებისკენ.
“ის, რომ გლდანში 150 პატიმარი შიმშილობს, სიცრუეა. ამ დროისთვის სხვადასხვა ციხეებში 52 ადამიანი შიმშილობს, მათი ნაწილი ამ ფორმით მართლმსაჯულების დამდგენი კომისიის არშექმნას აპროტესტებს. მინდა მათ ვუთხრა, რომ ტყუილად ნერვიულობენ. ეს თემა არ გაჩერებულა, ეს არის ძალიან რთული საკითხი, გარდა იურიდიულისა, ფინანსურ საკითხებსაც უკავშრდება. ეს ყველაფერი მუშა პროცესშია და სპეციალური ჯგუფია შექმნილი, რომელიც ამაზე მუშაობს. აღნიშნულთან დაკავშირებით, უახლოესი დღეების განმავლობაში, იუსტიციის მინისტრი განმარტებას გააკეთებს. ვურჩევდი იმ ადამინებს, რომელებიც შიმშილობენ, დაელოდონ ამ განცხადებას, რომელიც ნათელს მოჰფენს ამ საკითხს.
ასევე, მინდა ვუთხრა ყველას, ვინც ასეთ განცხადებებს აკეთებს, თითქოს 150 პატიმარი შიმშილობს, ჯობია თავი შეიკავონ დაუზუსტებელი ინფორმაციის გავრცელებისგან, რადგან მსგავსი განცხადებები სტიმულს აძლევს სხვა პატიმრებს. არის ინფორმაცია, რომ პატიმრები შიმშილობის გარდა თვითდაზიანებებს აპირებენ, არ არის საჭირო ამ ფორმით პროტესტის გამოხატვა, მითუმეტეს რომ უახლოეს დღეებში ყველაფერი იქნება ცნობილი,” _ განაცხადა სუბარმა.
მისივე თქმით, ციხე ყოველთვის მტკივნეული ადგილია და სულ პატარა რამეც დიდად ჩანს.
“ციხე ყოველთვის მტკივნეული ადგილია, აქ სულ პატარა რამ დიდად ჩანს. ბოლო ერთი წლის განმავლობაში პირობით ვადამდე 2500 პატიმარი გათავისუფლდა, ამას დაუმატეთ შეწყალების კომისიის რეკომენდაციით გათავისუფლებულები და ყველა დაინახავს, რომ პატიმრებისა და მათი საქმეებისადმი მიდგომა შეცვლილია. ამიტომ, კიდევ ერთხელ მინდა ვუთხრა მოშიმშილე პატიმრებს – დაელოდონ იუსტიციის მინისტრის განცხადებას და თავი შეიკავონ პროტესტის ფართო მაშტაბებზე გაშლისაგან”.
დღესვე მინისტრმა კომენტარი გააკეთა რამდენიმე დღის წინ არასრულწლოვანთა საპატიმრო დაწესებულებაში მომხდარი ინციდენტის გამო დღეს ჩატარებულ ჩხრეკაზე.
“დღეს არასრულწლოვანთა დაწესებულებაში ჩხრეკა ჩატარდა, ამოიღეს უკანონო ნივთები, რომლებიც არასრულწლოვნებს ჰქონდათ მოგროვებული. ამას კი წინ უძღვოდა არასრულწლოვნებს შორის მომხდარი დაპირისპირება – 6–მა მოზარდმა მიიღო დაზიანება. არაფერი სერიოზული, მაგრამ ისინი სხვადასხვა დაწესებულებებში არიან გადაყვანილი, რათა არ ჰქონდეთ ერთმანეთთან კონტაქტი”.
სუბარმა ციხის ადმინისტრაცია უყურადღებობაში დაადანაშაულა და დასძინა, რომ აღნიშნულის თავიდან აცილება შესაძლებელი იქნებოდა, თუ ადმინისტრაცია მეტ ყურადღებას გამოიჩენდა.
