საქმე ეხება 5 თვის სახელფასო დავალიანებას, რომლის გაუსტუმრებლობის შემთხვევაში ძირითადი გუნდის 16 ფეხბურთელი მომდევნო თამაშებში მონაწილეობაზე უარს აცხადებს.
ლანჩხუთის მუნიციპალიტეტის გამგებლის მოვალეობის შემსრულებლის, ზაზა ურუშაძის თქმით, ფეხბურთელებს საკრებულოს თავმჯდომარის მიერ ხელმოწერილი საგარანტიო წერილები გადაეცათ, რომლის თანახმადაც სახელფასო დავალიანება იანვრის ბოლომდე გაუსტუმრდებათ.
_ ერთადერთი რაც დაზუსტებით შემიძლია გითხრათ ის არის, რომ ფეხბურთელებს, სახელფასო დავალიანებას იანვრის ბოლომდე სრულად გავუსტუმრებთ, _ აღნიშნა ჩვენთან საუბრისას ზაზა ურუშაძემ.
სფფ-ს აღმასრულებელი კომიტეტი, ამ საკითხს დიდი ხანია სწავლობს და საბოლოოდ, ლანჩხუთის “გურიას” დირექტორს კობა მირზაშვილს, ლანჩხუთის მუნიციპალიტეტის საკრებულოს თავმჯდომარეს ამირან გიგინეიშვილსა და ლანჩხუთის მუნიციპალიტეტის გამგებელს – ზაზა ურუშაძეს, გუშინ, სპეციალური წერილი გაუგზავნეს.
_ “მოგახსენებთ, რომ 2013 წლის 3 დეკემბერს, საქართველოს ფეხბურთის ფედერაციის აღმასრულებელმა კომიტეტმა განიხილა საქართველოს ფეხბურთელთა ასოციაციის თავმჯდომარის წერილი საფეხბურთო კლუბ “გურიას” ფეხბურთელების მიმართ კლუბის მხრიდან კონტრაქტის პირობების შეუსრულებლობის გამო, რომელიც გამოიხატა 5 თვის ხელფასის გადაუხდელობაში, რაც შემდეგში შესაძლოა აისახოს ფეხბურთელების გაფიცვაში.
საქართველოს ფეხბურთის ფედერაცია კატეგორიულად მოითხოვს უმოკლეს ვადაში კლუბის უფლებამოსილი პირებისგან წინამდებარე წერილში აღნიშნულთან დაკავშირებით დროულ რეაგირებას და ფეხბურთელთა კანონის შესაბამისი უფლებების დაცვას.
წინააღმდეგ შემთხვევაში, საქართველოს ფეხბურთის ფედერაცია იმოქმედებს საქართველოს ფეხბურთის ფედერაციის ჩემპიონატის დებულების შესაბამისად. ფიფა და უეფა ჩვენ პირდაპირ გვავალდებულებს, რომ დავიცვათ ფეხბურთელთა უფლებები. ჩვენ არ გვინდა, რომ ლანჩხუთის “გურიასთან” მიმართებაში სიტყვა “თუ” არსებობდეს, რადგან ეს გუნდი ჩემპიონატის ლიდერებს შორისაა და ასპარეზობა აუცილებლად უნდა გააგრძელოს. სწორედ ამიტომ მივეცით კლუბს ამ პრობლემების მოსაგვარებლად ათდღიანი ვადა, – განაცხადა სფფ-ის პრეზიდენტმა ზვიად სიჭინავამ.
ამ მიმართვას ფეისბუქის საშუალებით გამოეხმაურა ლანჩხუთის მუნიციპალიტეტის საკრებულოს თავმჯდომარე, ამირან გიგინეიშვილი:
_ ლანჩხუთის მუნიციპალიტეტს ფეხბურთის ფედერაციამ ათდღიანი ვადა მოგვცა გურიას ფეხბურთელების ექვს თვიანი ვალის გასასტუმრებლად. ჯერ ერთი, არ მეგონა, რომ ფედერაცია სასამართლოს ფუნქციას ასრულებდა, მეორეც ეს ორგანიზაცია, მიუხედავად ჩვენი მრავალგზის თხოვნა ვედრებისა, არ დაგვიდგა გვერდში ამ ძალიან მძიმე საფინანსო ვალდებულების დაძლევაში, რასაც პროფესიონალური გუნდის შენახვა ჰქვია მილიონებით. ღმერთია მოწამე, ძალა და ენერგია არ დაგვიშურებია. რკინის ქალამანი ჩავიცვით და ვიარეთ დუნიაზე, რომ ვინმე დაგვხმარებოდა. არაფერი გამოვიდა, არც შეპირებული ინვესტორი გამოჩნდა და არც საარჩევნო დაპირება შეასრულა ვინმემ. ახლა დეკემბერია. დავალიანების სრულად გასასტუმრებლად ფეხბურთელებს (რომელთაც უდიდეს პატივს ვცემ კაცობისა და პროფესიონალიზმისთვის) ვთხოვეთ ვადა 15 იანვრამდე, რადგან წლის ბოლო თვეს ამხელა თანხის მობილიზება ბიუჯეტში სრულიად შეუძლებელია. არ მესმის ერთი რამ, თუ ფედერაციამ გადაწყვიტა 10 დღეში 145000 ლარის ჩვენი ბიუჯეტიდან გასტუმრება დაგვავალოს, ამას როგორ შეძლებს თანხის არ არსებობის პირობებში? თუ სადმე ჯადოსნური ჯოხი ეგულება, გვითხრან და აქ ვართ! რაც შეეხება გუნდის ხელმძღვანელობას, სწორედ ეს ჯგუფია ინვესტორის ჩამოსვლის და გურიას შენახვის ზღაპრებით რომ გვიქცევს აგერ უკვე 5 თვეა, _ აღნიშნა გიგენეიშვილმა.
მისივე ინფორმაციით, მუნიციპალიტეტი იანვარში დავალიანებას სრულად გაისტუმრებს. ხოლო რამდენიმე დღეში გრიგოლეთის ბაზას აუქციონზე გამოიტანენ, რომლის შეძენის მთავარ პირობაში საფეხბურთო კლუბ “გურიას” შენახვა იქნება.
პ.ს. აღსანიშნავია, რომ თბილისის “დინამოსთან” დღეს გასამართი მატჩი, რომელშიც ლანჩხუთის “გურიას” დუბლშემადგელობით უნდა ეთამაშა, უამინდობის გამო, ხვალისთვის გადაიდო.
