“თუ ევროპა არის ჩვენი ორიენტირი და მოგვწონს ის, როგორც ევროპა ცხოვრობს და რაც ევროპაში ხდება, ეს არის შედეგი ზუსტად იმის, რომ ადამიანი არის ცენტრალური ღირებულება და შესაბამისად, ადამიანის უფლებებით არის შეზღუდული ყველა ხელისუფლება, ყველა დონის, ყველა შტოს, ყველა მიმართულების ხელისუფალი.
25 წლის წინ ახალგაზრდა იურისტთა ჯგუფი შევიკრიბეთ და დამოუკიდებელ საქართველოს კონსტიტუციის მოდელზე დავიწყეთ ფიქრი. მახსოვს, მაშინ გვქონდა ასეთი დამოკიდებულება, კონსტიტუციაში ხომ მოქალაქის მოვალეობები უნდა ეწეროს და რა შუაშია ადამიანის უფლებები, რომელსაც სადღაც მოვკარით ყური და წიგნებში ამოვიკითხეთ. მაშინ კონცეფციას ვერ ჩავწვდით, რადგან კონსტიტუცია იყო ადამიანის მოვალეობების ჩამონათვალი. იმის შემდეგ 25 წელი გავიდა და სამწუხაროდ, წლების განმავლობაში ისევ ამ კონსტიტუციის ტყვეობაში ვრჩებოდით და ადამიანის უფლებები რჩებოდა ხელისუფლების აუცილებელ ბოროტებად, რომელზეც საუბარი აუცილებელია, რომელზეც კონფერენციების ჩატარება აუცილებელია, რომელზეც ანგარიშის ევროსაბჭოში და სხვა სტრუქტურებში გაგზავნა აუცილებელია, მაგრამ სინამდვილეში რეალურ ცხოვრებაში, ხელისუფლებები ცხოვრობდნენ სხვა პრიორიტეტებით, იმიტომ რომ იყო ასეთი განწყობა და განცდა – ჯერ დამოუკიდებლობა და მერე დემოკრატია.
სად მიგვიყვანა ამ ლოზუნგმა ეს ყველას კარგად გვახსოვს. მერე მოვიდა სხვა ხელისუფლება, რომელმაც დასვა ამოცანად ჯერ ტერიტორიული მთლიანობის აღდგენა, ჯერ სახელმწიფო ფორმირება და მერე ადამიანის უფლები და აღმოვჩნდით იქ, სადაც აღმოვჩნდით. ვარდების რევოლუციის შემდეგ მოსულმა ხელისუფლებამ ასევე განაცხადა, რომ ჯერ სახელმწიფო იყო შესაქმენელი და მოდერნიზაცია ნიშნავდა ძლიერი სახელმწიფოს შექმნას და მერე მივუბრუნდებოთ დემოკრატიას, ადამიანის უფლებებსა და თავისუფლებას. რით დასრულდა ეს ყველაფერი, ესეც ვნახეთ.
დღევანდელი, ახალი ხელისუფლების წარმომადგენლებს საკმარისზე მეტი საკუთარი მწარე გამოცდილება დაგვივგროვდა იმისთვის, რომ აღარ დავუშვათ მსგავსი შეცდომა. რეალურად გავიაზროთ და გავაცნობიეროთ, რომ არ არსებობს რამე სხვა, რის გამოც ადამიანის უფლებებისა და თავისუფლების დაცვამ უნდა მოიცადოს,” _ განაცხადა დავით უსუფაშვილმა.
