2014 წლის პირველი იანვრიდან საქართველო Eurocontrol-ის მე-40 წევრი იქნება. სხდომის ფარგლებში ჩატარდა საზეიმო მიღება, სადაც განცხადებები გააკეთეს Eurocontrol-ის გენერალურმა დირექტორმა, მარკ ბრენერმა და საქართველოს ეკონომიკის მინისტრის მოადგილე ნათია მიქელაძემ.
Eurocontrol-ის გენერალურმა დირექტორმა, მარკ ბრენერმა საქართველოს ევროპის სააერნაოსნო უსაფრთხოების ორგანიზაციაში გაწევრიანება მიულოცა და განაცხადა, რომ საქართველომ ბევრი რამ გააკეთა საკუთარი სანავიგაციო სისტემების ევროპულ სისტემებთან ინტეგრაციისთვის, რამაც ხელი შეუწყო საქართველოს ტერიტორიაზე ფრენების უსაფრთხოების ამაღლებას.
როგორც Eurocontrol-ის გენერალურმა დირექტორმა აღნიშნა, საქართველომ წარმატებით გაართვა თავი საქართველოს მიერ “ევროგაერთიანებასა და მის წევრ სახელმწიფოებს და საქართველოს შორის ერთიანი საჰაერო სივრცის შესახებ” შეთანხმებით ნაკისრი ვალდებულებების შესრულებას.
საქართველოს ეკონომიკისა და მდგრადი განვითარების მინისტრის მოადგილის, ნათია მიქელაძის განცხადებით, საქართველოსთვის ევროპის სააერნაოსნო უსაფრთხოების ორგანიზაციის წევრობა ძალიან მნიშვნელოვანია. მისი თქმით, Eurocontrol-ის ექსპერტთა მიერ მიმდინარეობს და სამომავლოდაც გაგრძელდება საქართველოში სამოქალაქო ავიაციის სპეციალისტების მუდმივი გადამზადება და კვალიფიკაციის ამაღლება. გარდა ამისა, როგორც ეკონომიკის მინისტრის მოადგილემ აღნიშნა, საქართველოს შესაბამისი კანონმდებლობაც ასევე მაქსიმალურად დაახლოებული იქნება ევროპის სააერნაოსნო უსაფრთხოების ორგანიზაციის სტანდარტებთან.
“ჩვენი შეფასებით, საქართველოს გაწევრიანება Eurocontrol-ში მნიშვნელოვანი მოვლენაა სამომავლოდ ჩვენი ქვეყნის ევროპასთნ ინტეგრაციის კუთხით,” _ განაცხადა მინისტრის მოადგილემ.
საქართველოს დელეგაციის შემადგენლობაში, რომლებიც ევროპის სააერნაოსნო უსაფრთხოების ორგანიზაციის მუდმივმოქმედი საბჭოს სხდომაში მონაწილეობდნენ, აგრეთვე შედიოდნენ საქართველოს სამოქალაქო ავიაციის სააგენტოსა და შპს “საქაერონავიგაციის” ხელმძღვანელი პირები.
ინფორმაციისთვის: EUROCONTROL-ში საქართველოს გაწევრიანების მიზნით, 2012 წლის 5 დეკემბერს ქ. ბრიუსელში ხელი მოეწერა შესაბამის დოკუმენტებს, ხოლო 2013 წლის 4 აპრილს საქართველოს პარლამენტის მიერ განხორციელდა საერთაშორისო კონვენციისა და შესაბამისი დოკუმენტების რატიფიცირება, რომლის საფუძველზეც საქართველოს პარლამენტმა გამოხატა ნება EUROCONTROL-ის საერთაშორისო ორგანიზაციაში საქართველოს გაწევრიანების თაობაზე. 2014 წლის პირველი იანვრიდან საქართველო ოფიციალურად გახდება ევროპის საარნაოსნობის უსაფრთხოების ორგანიზაციის მეორმოცე წევრი.
