“ფრიდრიხ ებერტის ფონდისა” და არასამთავრობო ორგანიზაციების საინიციატივო ჯგუფის ორგანიზებით გაიმართება კონფერენცია თემაზე: “ხუდონჰესის გამოწვევები.”
როგორც მედიაანონსში ვკითხულობთ, კონფერენციის მიზანია, შედგეს ღია დიალოგი საექსპერტო, სახელისუფლებო და საზოგადოებრივი წრეების წარმომადგენლებს შორის ხუდონჰესის პრობლემატიკის ირგვლივ.
კონფერენციის ორგანიზატორები არიან: საქართველოს მწვანეთა მოძრაობა /დედამიწის მეგობრები-საქართველო, ფრიდრიხ ებერტის ფონდი, მწვანე ალტერნატივა, საქართველოს ენერგეტიკოსთა კავშირი, სვანეთის ტურიზმის ცენტრი და სვანეთის ახალგაზრდული ცენტრი.
კონფერენციაზე მოწვეულები არიან სახელისუფლებო სტრუქტურების, არასამთავრობო ორგანიზაციების, დიპლომატიური კორპუსისა და საერთაშორისო ორგანიზაციების წარმომადგენლები.
ფონდის მიერ გაგზავნილ მოსაწვევში მეტად საინტერესო და რეალური მონაცემებისგან აცდენილ სტატისტიკას წავაწყდით:
მაგალითად:
1.ნახსენებია, რომ დაიტბორება 1100 ჰა ტყე;
2. დასატბორი ტერიტორიაა 400 ჰა სასოფლო-სამეურნეო მიწა;
3. გადასახლებული იქნება 2000 კაცი;
4. საქმე ეხება 25 სოფელს.
ჩვენი ყურადღება ორმა გარემოებამ მიიქცია: პირველი ის, რომ სვანეთში და მთელს საქართველოში ბოლო პერიოდში განვითარებული მოვლენების შედეგად, ვგულისხმობთ ტყის მასობრივ გაჩეხვას, 1100 ჰექტარი ტყე სვანეთში დიდი ალბათობით არ უნდა იყოს
და მეორე: ოფიციალური ინფორმაციით, განსახლება ხდება 184 კომლის, საერთო ჯამში 700 ადამიანის.
პირველ რიგში “გურია ნიუსი” მოსაწვევის ავტორს “ფრიდრიხ ებერტის ფონდის საქართველოს წარმომადგენლობის დირექტორს ია თიკანაძეს დაუკავშირდა იმის გასარკვევად, თუ საიდან იქნა აღებული ის მონაცემები რაზეც ზემოთ ვისაუბრეთ.
ია თიკანაძის განცხადებით ეს მონაცემები მათ პარტნიორებმა მიაწოდეს და ინფორმაციის დასაზუსტებლად მწვანეთა მოძრაობის წარმომადგენელთან, ნინო ჩხობაძესთან გადაგვამისამართა. მოგვიანებით კი ქალბატონი ია თიკანაძისგან მეილზე მოკლე სახის განმარტება მივიღეთ:
ქალბატონო თამარ,
გიგზავნით ანონსს, რომელიც აწი გავრცელდება.
უცნაურია, თუ რომელ პრეს–რელიზს გულისხმობდით.
ჩემი სახელით არ გავრცელებულა არც ერთი დოკუმენტი.
თქვენ გულისხმობთ, ალბათ, ფონდის სახელით გაგზავნილ მოსაწვევს, სადაც
აღნიშნული იყო თქვენს მიერ მოყვანილი ციფრები. იქვე მითითებულია ფრაზა “ექსპერტთა ინფორმაციის შესაბამისად…”
ამდენად, ხვალ ზუსტ განმარტებებს თავად ექსპერტები მოგახსენებენ.
დიდი მადლობა თქვენი ინტერესისთვის.
კეთილი სურვილებით,
ია თიკანაძე
ამის შემდეგ ხვალ დაგეგმილი ღონისძიების ერთ-ერთ ორგანიზატორს ნინო ჩხობაძეს დავუკავშირდით და ვთხოვეთ უფრო დეტალურად განემარტა, თუ საიდან იქნა აღებული ის მონაცემები, რაზეც ზემოთ ვისაუბრეთ:
ნინო ჩხობაძე: “ჩვენ ძირითადად რიცხვებზე არ ვსაუბრობთ, იმიტომ რომ სხვადასხვა მონაცემებია ყოველთვის, მაგრამ ჩვენ ვსაუბრობთ იმაზე, რაც უწერია თვითონ კომპანიას გარემოზე ზემოქმედების შედეგების ანგარიშში. იქ წერია, რომ 1100 ჰექტარზე ვრცელდება. დაახლოებით 700 კაცი უნდა გადასახლდეს, 170 კომლზეა საუბარი და 27 ტოპონიმი უნდა გაქრეს. რაც ვიცი, საბოლოო ჯამში 2000 კაცის განსახლება მოხდება.
_ ქალბატონო ნინო, გზშ-ში საუბარია 184 კომლზე, ანუ 700 ადამიანზე და თქვენ თითქმის სამჯერ მეტ მონაცემს ასახელებთ… როგორ ფიქრობთ, რამდენად სწორია ასეთი დრამატიზირება სიტუაციის? სად 700 და სად 2000 ადამიანი?
_ ეს 700 კაცი ისაა, რაც რეალურად ექვემდებარება გადასახლებას. იქედან 1050 თუ 1070 კომლია დარჩენილი, რაც არის, თვითონ ხაიშში არის უფრო ნაკლები, რომელიც ჩვენი ინფორმაციით წერია გარემოზე ზემოქმედების ანგარიშში. ეს მონაცემები იქედან გვაქვს აღებული, ჩვენ არაფერს ვიგონებთ. უბრალოდ, ექსპერტების ვარაუდია, რომ მათთვის, ვინც შეიძლება იმ ხეობაში დარჩეს, მდგომარეობა გაუსაძლისი გახდება.
_ რამდენად შეიძლება ვარაუდებზე ასეთი განცხადებების გაკეთება, საზოგადოებაც ხომ შეცდომაში შეგყავთ?
_ ამიტომ ჩვენ არ ვაკეთებთ განცხადებებს, ჩვენ ვსაუბრობთ ვარაუდებზე და ამას წერილობით არსად ვაფიქსირებთ.
ინვესტორის, კომპანია “ტრანს ელექტრიკას” პიარ მენეჯერი ნინო ასათიანი “გურია ნიუსთან” საუბრისას აცხადებს, რომ ნინო ჩხობაძის მიერ მოყვანილი ვარაუდები სრული სიცრუეა. მისივე თქმით, ისეთი სერიოზული ორგანიზაცია, როგორიც „ფრიდრიხ ებერტის ფონდია“ მსგავსი დეზინფორმაციის გავრცელებაში მონაწილეობას არ უნდა იღებდეს.
ნინო ასათიანი: “მე მგონი ნინო ჩხობაძეს გზშ-ს ახალი ვარიანტი არც წაუკითხავს, სადაც 376-ე გვერდზე თეთრით შავზე წერია, რომ 325 ჰა ტყე ექცევა ზემოქმედების არეალში. ან 2000 ადამიანი სად არის? განსახლების პირველი ფაზის მიხედვით, განსახლების არეალში ექცევა 769 ადამიანი, ეს არის 184 ოჯახი პირდაპირ და არა პირდაპირ. საიდან მოიტანეს ეს 2000 კაცი? ტყუილია აბსოლუტურად! ისევე როგორც ტყუილია ინფორმაცია 25 სოფელზე. დატბორვის ზონაში ხვდება 3 სოფელი და ზემოქმედების ქვეშ-2. და ეს ყველაფერი დეტალურადაა გაწერილი გზშ-ში, რომელიც ჩვენს ვებგვერდზე დევს.
როგორ შეიძლება ამხელა პროექტზე ვარაუდებით ისაუბრო, როცა არსებობს მათემატიკური დაანგარიშებები. ეს არის შეგნებული დეზინფორმაცია. რაღაცაზე რომ მსჯელობ, მინიმუ, წაკითხული მაინც უნდა გქონდეს”.
