“გენდერული თანასწორობის ქსელის” პროექტის კოორდინატორმა, მაია კუპრავა-შარვაშიძემ “გურია ნიუსთან” საუბრის დროს განაცხადა, რომ პრემიერ-მინისტრის ახალ გადაწყვეტილებას არ მიესალმება და კარგი იქნებოდა, ახალდანიშნულ გუბერნატორებს შორის ქალი ყოფილიყო.
“ძალიან ცუდი გადაწყვეტილებაა იმიტომ, რომ ეს ჩვენთვის რაღაც სიგნალია. ხშირად აღვნიშნავთ, რომ სადაც ქალი არ ჩანს, ცოტა სხვა სიგნალია ჩვენთვის, არაძალისმიერია ასეთი გადაწყვეტილება. თუ გუბერნატორების თანამდებობა სხვა დატვირთვას არ ატარებს, ვიდრე არის სინამდვილეში, მაშინ არ შეიძლება, რომ ქალი წარმომადგენელი არ გვყავდეს. წინა ხელისუფლების დროს იყო პრეცედენტი, როდესაც დანიშნეს ქალი გუბერნატორად. ცოტა რთულია იმის გაგება თუ ქვეყანას აქვს კურსი აღებული გენდერული თანასწორობის კუთხით და ამ კუთხით რაღაც დოზით პოზიტიურ ნაბიჯებს დგამენ, მაშინ, რატომ არ მოხდა 9 დასახებულ კანდიდატებს შორის ქალი?! ეს მიუღებელია იმ ფონზე, როდესაც ქალთა წარმომადგენლობაზე ვსაუბრობთ. ახალ მთავრობას, ახალ პრემიერ-მინისტრს კარგი შანსი ჰქონდა, რომ რამდენიმე ადგილზე ქალი გუბერნატორი დაენიშნა. ძალიან ცუდია, რაც მოხდა – ცხრა გუბერნატორიდან არცერთი არ არის ქალი. ნამდვილად არსებობენ საქართველოში ისეთი ქალბატონები, რომლებიც რეგიონისთვის სასიკეთო საქმეებს გააკეთებენ,” _ უთხრა მაია კუპრავა-შარვაშიძემ “გურია ნიუსს”.
ექსპერტი გენდერულ საკითხებში თამარ ბაგრატია როგორც აღნიშნავს, სამწუხაროა, რომ გუბერნატორებს შორის არც ერთი ქალი არ არის.
“სამწუხაროა, რომ დღეს ქალებს, როგორც მნიშვნელოვან პოლიტიკურ რესურსს გადაწყვეტილების მიღების დონეზე, გადამწყვეტილების მიმღებები არ იყენებენ. მმართველობის ამ ვერტიკალიდან ქალები მუდმივად იყვნენ “გამოთიშულები” და სამწუხაროა, რომ ეს პროცესი გრძელდება… ქალები არათუ დაინიშნენ, კანდიდატებადაც კი არ მოიაზრებოდნენ,” _ თქვა “გურია ნიუსთან” საუბრის დროს თამარ ბაგრატიამ.
იურიდიულ საკითხებში პრემიერ-მინისტრის მრჩეველი თამარ ჩუგოშვილი ირაკლი ღარიბაშვილის გადაწყვეტილებაზე კომენტარს არ აკეთებს და ამბობს, რომ ის მიესალმება ქალების დანიშვნას სხვადასხვა თანამდებობაზე.
“მივესალმები ქალბატონების დანიშვნას ნებისმიერ თანამდებობაზე და ეს ყოველთვის სასურველია. ზოგადად, ყოველთვის თანასწორობა თუ იქნება, ეს ნამდვილად მისაღებია,” _ განუცხადა თამარ ჩუგოშვილმა “გურია ნიუსს”.
