შეწყალების კომისია გუშინ დაახლოებით 7 საათის განმავლობაში 160-მდე მსჯავრდებულის საქმეზე მსჯელობდა, აქედან შესაწყალებელთა სიაში 90-მდე პატიმარი მოხვდა.
როგორც “გურია ნიუსთან” შეწყალების კომისიის თავმჯდომარე ალეკო ელისაშვილი აცხადებს, კომისიამ როგორც მძიმე, ასევე ნაკლებად მძიმე კატეგორიის მსჯავრდებულთა საქმეები განიხილა.
“ზუსტი ციფრის თქმის უფლება, რამდენ მსჯავრდებულს გავუწიეთ რეკომენდაცია, არ მაქვს, თუმცა დაახლოებით შემიძლია გითხრათ, რომ 60-მდე პატიმრის სრულად გათავისუფლების რეკომენდაცია გავეცით, 20-მდე პატიმრისთვის სასჯელის განახევრების რეკომენდაცია და 10-მდე პირი იყო, ვისზეც ვფიქრობთ, რომ პრეზიდენტმა ნასამართლეობა საერთოდ უნდა მოუხსნას. კომისიამ როგორც მძიმე, ასევე მსუბუქი კატეგორიის მსჯავრდებულთა საქმეებზე იმსჯელა. კომისიას აქვს თავისი კრიტერიუმები, რომლის მიხედვითაც, მძიმე მუხლებზე ნახევარი მაინც უნდა ჰქონდეს პატიმარს მოხდილი, ნაკლებად მძიმეზე სასჯელზე მესამედი, რომ ჩვენ მის საქმეზე ვიმსჯელოთ. ვინც ამ კრიტერიუმებში ჯდებოდა მათი საქმეები დავიდეთ და განვიხილეთ. იმის გამო, რომ გუშინ გვიან ღამით მოვრჩით მუშაობას, ოქმი ორშაბათს შედგება და რეკომენდირებულთა სია პრეზიდენტს გადაეგზავნება”, _ უთხრა “გურია ნიუსს” ელისაშვილმა და დასძინა, რომ მორიგი შეწყალება შობისთვის განხორციელდება.
უფლებადამცველი ნანა კაკაბაძე “გურია ნიუსთან” საუბრისას ამბობს, რომ შეწყალების კომისიის მიერ მიღებული გადაწყვეტილება სასჯელაღსრულების დაწესებულებებში მდგომარეობას დიდად ვერ შეცვლის.
“ჩემთვის არ არის ცნობილი ჰქონდა თუ არა რომელიმე მოშიმშილე პატიმარს შეწყალების კომისიისთვის განცხადებით მიმართული, მაგრამ ვიცი, რომ როდესაც მე-15 დაწესებულებში პატიმარ ლევან ქანთარიას ადმინისტრაციამ შესაწყალებელთა სიაში ჩასმა შესთავაზა, მან უარი თქვა, ხის ჯვარი გააკეთა და პროტესტის ნიშნად ხელები და ფეხები აიჭედა. მსჯავრდებული ღუდუშაურის კლინიკაში იყო გადაყვანილი, თუმცა უკვე ციხეში დააბრუნეს. მან თავად დამირეკა და მითხრა, რომ შეწყალება და პატიების გრძნობა არ მინდა, გამართლება მინდაო; 260-ე მუხლით იხდის სასჯელს, მაგრამ თავს დამნაშავედ არ ცნობს”, _ აცხადებს კაკაბაძე.
რაც შეეხება სხვა მოშიმშილე მსჯავრდებულებს, კაკაბაძის თქმით, მათი მდგომარეობა ძალიან მძიმეა, თუმცა ისინი შიმშილობის შეწყვეტას არ აპირებენ.
“მოშიმშილეები ამბობენ, რომ მათთან არავინ შედის, რომ აუხსნას და განუმარტოს რა ხდება. საბოლოო უარია ეს ხელისუფლების მხრიდან, თუ კიდევ შეიძლება მათ იმედი ჰქონდეთ, არ იციან. მათი უმრავლესობა აცხადებს, რომ სასიკვდილო შიმშილობას გააგრძელებენ. პატიმრები ამბობენ, რომ თუ მათ გადარჩენას აპირებენ, მაშინ უთხრან, რომ მართლმსაჯულების ხარვეზების დამდგენი კომისიის შექმნა დროებით გადაიდო და პროცესი ისევ განახლდება. წინააღმდეგ შემთხვევაში, ისინი საქმეების გადახედვის მოთხოვნით, შიმშილობას გააგრძელებენ”,_ უთხრა კაკაბაძემ “გურია ნიუსს”.
