აღნიშნულს გამოეხმაურა აფხაზეთის ავტონომიური რესპუბლიკის უმაღლესი საბჭო და გააპროტესტა დე-ფაქტო აფხაზეთის მთავრობის გადაწყვეტილება. უმაღლესმა საბჭომ სპეციალური წერილიც შეიმუშავა ამ საკითხთან დაკავშირებით.
“სოხუმის დე-ფაქტო წარმომადგენლობითმა ორგანომ მიზანმიმართულად მიიღო სრულიად უკანონო გადაწყვეტილება. აღნიშნულ აქტს არანაირი ისტორიული თუ ეთნიკური საფუძველი არ გააჩნია, ფეხქვეშ თელავს ადგილობრივი მოსახლეობის ნებას და წარმოადგენს რეგიონში განხორციელებული ეთნიკური წმენდის, ბოლო წლების მანძილზე იქ მიმდინარე კულტურული გენოციდის უკიდურესად გამომწვევი ფორმით გაგრძელების მცდელობას.
მივმართავთ საქართველოს პარლამენტს, პრეზიდენტსა და მთავრობას, მიიღონ სათანადო ზომები საერთაშორისო ორგანიზაციების ინფორმირებისთვის, რათა მკაცრად დაიგმოს და დროულად აღიკვეთოს კულტურული გენოციდის ეს მორიგი აქტი”.
დღეს ამ საკითხზე კომენტარი გააკეთა აფხაზეთის ავტონომიური რესპუბლიკის მთავრობის თავმჯდომარემ ვახტანგ ყოლბაიამ და განაცხადა, რომ ამ ქმედებით “აფხაზებმა ძველ ოცნებას შეასხეს ხორცი”.
“მცდელობა, რომ ტოპონიმების შეცვლა მომხდარიყო, 50-იანი წლებიდან მიდის.ამ სოფლების სახელების აფხაზური ტრანსკრიფცია რომ წაიკითხოთ, დარწმუნდებით, რომ მათი უმრავლესობა ქართულიდან მოდის. დღეს აფხაზებმა ძველ ოცნებას ხორცი შეასხეს”.
რეინტეგრაციის საკითხებში სახელმწიფო მინისტრი პაატა ზაქარეიშვილი ამბობს, რომ ეს პროცესი ახლა არ დაწყებულა და სახელწოდებები შეცვლილია უკვე გაგრიდან მოყოლებული. მისი განცხადებით ოკუპირებული ტერიტორიების კონფლიქტების მხარეებთან უკვე არსებული სერიოზული შედეგებისა, კონტაქტები ჯერჯერობით მაინც სუსტია, ამიტომ საჭიროა კიდევ ბევრი მუსაობა და კონსესუსის მიღწევა.
“გალის რაიონის სოფლებისთვის სახელწოდებების შეცვლა კონფლიქტის ნაწილია და ეს ახლა არ დაწყებულა. ეს პროცესი დიდი ხანია გრძელდება, სახელწოდებები შეცვლილია უკვე გაგრიდან მოყოლებული. აფხაზური დე–ფაქტო რეალობიდან გამომდინარე სახელწოდებები შეეცვალა ისეთ ცნობილ სოფლებს როგორებიცაა, განთიადი, შრომა და ა.შ. სახელები შეეცვალა ქუჩებსაც სოხუმსა და გაგრაში.1993 წლიდან მოყოლებული ცდილობენ ხელოვნურად მოახდინონ დისტანცირება ყველაფერი ქართულისგან, მაგრამ ის ფაქტი, რომ დღესაც კი ახაზურ პოლიტიკურ კონტექსტში ქართული თემის გამო კრიზისი არსებობს, მეტყველებს იმაზე, რომ ისინი ვერ გაურბიან ქართულ თემას და ამიტომ ამას უნდა შევხედოთ ისე, როგორც ვუყურებდით ამდენ ხანს. ეს არის კონფლიქტის ნაწილი. როცა მოხდება და მოხდება აუცილებლად ჩვენი შერიგება და ჩვენი ინტერესების თანხვედრით ერთიან სახელმწიფოში ცხოვრება ამ კონტექსტში მოხდება სახელწოდებების შეცვლა”.
ზაქარეიშვილი აქვე აცხადებს, რომ ეს პროცესი საკმაოდ სერიოზული ხასიათისაა, თუმცა სახელწოდება არ არის ყველაზე პრინციპული. მინისტრის თქმით უფრო მნიშვნელოვანია დევნილების დაბრუნება და იქ მცხოვრები მოქალაქეების დაცვა.
მკითხველს შევახსენებთ, რომ აფხაზური სახალხო კრების წევრებმა 11 დეკემბერს დაამტკიცეს დადგენილება, გალის რაიონის ადმინისტრაციულ-ტერიტორიული ერთეულების და მათი სახელწოდებების შესახებ. სოფელ პირველ ოტობაიას ხაშტა დაერქვა, მეორე ოტობაიას – ბგოურა, ფიჩორას – ბჩარა, პრიმორსკის – გუდაა, დიხაზურგას – აბააკიტი, ქვემო ბარღებს – ლადა–ბიარგიაპი, ნაბაკევს – ბატაიგუარა, ჭუბურხინჯს – ხიაცხა, ოკვინორეს – ციგტვარა, ზემო ბარღებს კი – ვიადა–ბარგიაპი.
