სომხეთ-საქართველოს საპარლამენტთაშორისო თანამშრომლობის პერსპექტივებზე სომხეთის რესპუბლიკის ქალაქ ალავერდში, ევროპის უშიშროებისა და თანამშრომლობის ორგანიზაციის ერევნის ბიუროს ორგანიზებით, ორი ქვეყნის პარლამენტის წევრებს შორის სამუშაო კონგრესი იმართება. ორი დღის განმავლობაში ქართველი და სომეხი კანონმდებლები საერთაშორისო ორგანიზაციებში თანამშრომლობის საკითხებს განიხილავენ და ვაჭრობის, ეკონომიკური განვითარების, სოფლის მეურნეობის და კულტურის სფეროების განვითარებაში პარლამენტის ხელშეწყობის როლზე იმსჯელებენ.
ღონისძიება მისასალმებელი სიტყვით სომხეთის რესპუბლიკის ეროვნული კრების პრეზიდენტმა, ჰოვიკ აბრაჰამიანმა გახსნა. მან მადლობა გადაუხადა საქართველოს პარლამენტის დელეგაციას სომხეთში სტუმრობისთვის და კონგრესში მონაწილეობის მიღებისთვის. მისი განცხადებით, ორ ქვეყანას შორის მეგობრული ურთიერთობა მრავალსაუკუნოვან ისტორიას ითვლის, რომელსაც საფუძვლად უდევს კეთილი ნების გამოვლენა და ურთიერთპატივისცემა. მანვე საქართველო-სომხეთის განვლილი ისტორია მიმოიხილა და სამომავლო პერსპექტივებზე და ერთობლივ ეკონომიკურ და ინფრასტრუქტურულ პროექტებზე ისაუბრა. ქართველ და სომეხ კანონმდებლებს საქართველოს პარლამენტის თავმჯდომარე, დავით უსუფაშვილი მიესალმა. მისი განცხადებით, საქართველოს პარლამენტის წევრებისთვის დიდი პატივია მონაწილეობა მიიღოს ასეთ მნიშვნელოვან კონგრესში და ღონისძიების ორგანიზატორებს პარლამენტის სახელით მადლობა მოახსენა.
“ორ პარლამენტს შორის ურთიერთობა ეს არის ის ვალდებულება, რომელიც ჩვენი ხალხების წინაშე გვაკისრია. ჩვენ დიდი ყურადღებას ვანიჭებთ პარლამენტებს შორის ურთიერთობებს და ამიტომ, ცოტა ხნის წინ სომხეთის პარლამენტთან მეგობრობის ჯგუფს სათავეში პარლამენტის თავმჯდომარის პირველი მოადგილე, მანანა კობახიძე ჩაუდგა. დარწმუნებული ვარ მეგობრობის ჯგუფები ახლო მომავალში ერთმანეთთან მჭიდრო თანამშრომლობას დაამყარებენ. ამით ჩვენ, პარლამენტები ჩვენს წვლილს შევიტანთ ქვეყნებს შორის ურთიერთობების და თანამშრომლობის გაღრმავებაში. ძალიან მნიშვნელოვანია, რომ ჩვენ მოვახერხოთ ჩვენი ქვეყნების სტრატეგიული ინტერესების უკეთ დაცვა გლობალურ მსოფლიოში. ამ მიმართულებით მნიშვნელოვანია, რომ შევძლოთ ერთმანეთის უსაფრთხოების ინტერესების პრიორიტეტების გათვალისწინება. მიუხედავად დიდი სირთულეებისა, რომლის წინაშეც ოცი წლის განმავლობაში ორი ქვეყანა იდგა, ჩვენ ყოველთვის ვახერხებდით გამოგვეძებნა ის გზები და საშუალებები, რომლითაც ქვეყნებს შორის ურთიერთობა არ დაზარალდებოდა. დარწმუნებული ვარ ჩვენ შევძლებთ მომავალშიც ასე განვახორციელოთ ჩვენი პოლიტიკა”, _ განაცხადა დავით უსუფაშვილმა. გამოსვლის დასასრულს, პარლამენტის თავმჯდომარემ იმედი გამოთქვა, რომ არამარტო დღევანდელობის გადმოსახედიდან, არამედ ფართო პერსპექტივაში ორი ქვეყანა შეძლებს ყველა საკითხში მეგობრობის გაგრძელებას და პარტნიორულ მხარდაჭერას. ქართველი და სომეხი კანონმდებლები ორი დღის განმავლობაში სამუშაო შეხვედრებს სომხეთის რესპუბლიკის ქალაქ ალავერდში გამართავენ.
