მერაბიშვილის განცხადების შემდეგ “ერთიანმა ნაციონალურმა მოძრაობამ” სპეციალური განცხადება გამოაქვეყნა და აღნიშნულ ფაქტთან დაკავშირებით სისხლის სამართლის საქმის აღძვრა, გამოძიების დასრულებამდე მთავარი პროკურორის და სასჯელაღსრულების მინისტრის უფლებამოსილების შეჩერება და ყველა შესაბამისი ვიდეო მასალის ამოღება მოითხოვა. ამ მოთხოვნასთან დაკავშირებით სასაჯელაღსრულების სამინისტროს პრესსამსახურის უფროსმა ირაკლი კორძაიამ განაცხადა, რომ თუ თუ გამოძიება დაიწყება, საჭიროების შემთხვევაში, სამინისტრო ვანო მერაბიშვილის ციხეში ცხოვრების ამსახველ კადრებს უპრობლემოდ წარმოადგენს. კორძაია მერაბიშვილის განცხადებას არასერიოზულს უწოდებს და აცხადებს, რომ ყოფილი პრემიერ-მინისტრის ციხეში ყოფნას, ბევრი ევროპარლამენტარი აკვირდება და მსგავსი ქმედების განხორციელება შეუმჩნევლად შეუძლებელია.
“მერაბიშვილის განცხადება ძალიან არასერიოზული, იმიტომ რომ მის ციხეში ყოფნას აკვირდება ძალიან ბევრი ევროპარლამენტარი, რეგულარულ მონიტორინგს უწევს სახალხო დამცველი, ადგილობრივი და საერთაშორისო არასამათავრობო ოგრანიზაციები. ამდენად, ყოველივე იმ ქმედების განხორციელება, რასაც მერაბიშვილი ყვება, შეუძლებელია”, _ განაცხადა კორძაიამ.
10-17 დეკემბრის ჩათვლით ციხის ჩანაწერები მოითხოვეს მერაბიშვილის ადვოკატებმაც. ამის შესახებ მერაბიშვილის ერთ-ერთი ადვოკატი დათო ხაჟალია საუბრობს.
“უკვე მოვითხოვეთ 10-დან 17 დეკემბრის ჩათვლით ჩანაწერების უწყვეტ რეჟიმში გადმოცემა. დაველოდებით დეპარტამენტის ქმედებას და პასუხს, რათა შევძლოთ ამ ფაქტის გადამოწმება და შემდგომი რეაგირების მოხდენა”.
მერაბიშვილის განცხადებას გამოეხმაურა საქართველოს პრემიერ-მინისტრი, ირაკლი ღარიბაშვილი და ბრალდებულის განცხადებას არასერიოზული უწოდა.
“მსგავსი მეთოდები, როგორიც ახსოვს მერაბიშვილს “ნაციონალური მოძრაობის” დროს, ჩვენ აღარ ვსარგებლობთ. თავზე ჩამოცმები, გატაცებები არ უკავშირდება ჩვენს პერიოდს. თუ რაიმე გვაინტერესებს, არსებობს მთელი როგი პროცედურები, შევლენ გამომძიებლები და დაკითხავენ.
არსებობს რამდენიმე ვერსია, თუ რატომ გააკეთა ვანო მერაბიშვილმა ეს განცხადება. ერთი ის, რომ ალბათ მას მოჭარბებული შიში აქვს და ცდილობს ხელისუფლების დისკრედიტაციას მიზანმიმართული პროვოკაციით, ხოლო მეორე ვერსიის მიხედვით, შესაძლოა, ის ცდილობს დააშანტაჟოს მიხეილ სააკაშვილი”, _ განაცხადა პრემიერმა.
მერაბიშვილის განცხადებას აბსურდულს და წარმოუდგენელს უწოდებს იუსტიციის მინისტრი თეა წულუკიანიც, ხოლო უმრავლესობის ერთ-ერთი ლიდერი, დავით საგანელიძე მიიჩნევს, რომ მერაბიშვილი თავს იმართლებს და აქცენტების სხვა მიმართულებით გადატანას ცდილობს.
“მერაბიშვილის სიტუაციაში მყოფი ადამიანები ყოველთვის ამბობენ, რომ არ არიან დამნაშავეები და მათზე ზეწოლას ახდნენ. ზოგ შემთხვევაში, ეს არის სიმართლე და ზოგშემთხვევაში, მათ მიერვე მოგონილი თემაა, რადგან თავის გამართლება ყველას უნდა. მერაბიშვილისგან არ არის გასაკვირი, რომ ის საუბრობს თემებზე, რომელიც სამართალდამცავსტრუქტურებს ჩირქს მოსცხებს. კიდევ ერთი მომენტი, რომელსაც აუცილებლად უნდა გაესვას ხაზი, ბევრი პატიმარია, რომელიც ანალოგიურს ამბობს ან ამბობდა, მაგრამ მათ ნათქვამზე ასეთი აჟიოტაჟი არ ამტყდარა. არაა მერაბიშვილის აბსურდული განცხადება ასეთი ხმაურის ატეხვის ღირსი. მე დანამდვილებით ვიცი, რომ პროკურატურაშე ახალი ადამიანები მივიდნენ, ისინი პროფესიონალები არიან და საქმეს ღირსეულად გააკეთებენ, მერაბიშვილს კი უნდა ჩირქი მოსცხოს ამ სტრუქტურას”.
თუმცა სხვა აზრზეა უმცირესობის წარმომადგენელი ზურაბ ჭიაბერაშვილი და აცხადებს, რომ ახალი ხელისუფლება “ნაციონალური მოძრაობის” რეპრესიების მორიგ ტალღას იწყებს. ჭიაბერაშვილი სოსო ჯაჭვლიანის და გია ბარამიძის დაპირისპირებას იხსენებს და ამბობს, რომ სწორედ ამ კონფლიქტით დაიწყო ხელისუფლებამ ზეწოლა უმცირესობაზე.
“ოპოზიციურ პარტიაზე ახალი ზეწოლა სოსო ჯაჭვლიანისა და გია ბარამიძის დაპირისპირების შემდეგ დაიწყო. ჯაჭვლიანმა ოპოზიციის პროვოკაციაში ჩართვა სცადა, რაც საზოგადოებაში “ნაციონალურ მოძრაობაზე” აზრის უარყოფითად შეცვლისკენ იყო მიმართული. როგორ შეიძლება მერაბიშვილს თავზე გადააფარონ, ატარონ ღამის 2 საათზე თბილისის ქუჩებში, მიიყვანონ პროკურატურაში და მთავრმა პროკურორმა თვითონ “აკაჩაოს” იმისთვის, რომ მიიღოს სასურველი ჩვენება სრულიად აბსურდულ ბრალდებებზე, ეს არ უნდა დავუშვათ, თუ ამას შევეგუებით, მაშინ უნდა განვაცხადოთ, რომ ქვეყანაში არც სასამართლო გვაქვს და კანონის უზენაესობაზე ლაპარაკი ზედმეტია”.
უმრავლესობის წევრი თინა ხიდაშელი კი მერაბიშვილის განცხადებას ექს-პრემიერის სიზმრად აღიქვამს და აცხადებს, რომ მერაბიშვილის მიერ გაკეთებული განცხადებები სიცრუეა და “ნაციონალური მოძრაობის” მხრიდან დროის გაყვანის ფუჭი მცდელობაა.
“ამ საკითხზე გამოძიება აუცილებლად უნდა დაიწყოს, მერაბიშვილის ვერსიის დადასტურების შემთხვევაში დამნაშავე პირები დაისაჯონ, ხოლო იმ შემთხვევაში, თუ გამოძიებამ ვანო მერაბიშვილის ვერსიის ნამდვილობა არ დაადასტურა, “ნაციონალური მოძრაობის” გენერალურ მდივანს ცრუ ბრალდებისთვის სასჯელი უნდა დაუმძიმდეს. რაც შეეხება მერაბიშვილის დაცვის მხარის მოთხოვნას, მერაბიშვილის საკანთან გადაღებული სათვალთვალო კამერების ჩანაწერების ამოღების თაობაზე, ციხიდან ვიდეოჩანაწერების გამოტანა მარტივი პროცედურა არაა და ამისთვის შესაბამისი საგამოძიებო უწყების მოთხოვნაა საჭირო. პირადად მე მიმაჩნია, რომ მერაბიშვილმა სასამართლო პროცესზე საკუთარი სიზმარი მოყვა და ეს არ უნდა იქცეს ქვეყანაში მთავარ ამბად, მაშინ, როდესაც სხვა მართლაც რომ მნიშვნელოვანი საკითხებია გადასაწყვეტი”.
