“კომიკურად ჟღერს ხელისუფლების ნათქვამი – ასეც რომ ყოფილიყო, არაფერი მოხდებოდა ფარცხალაძეს თანამდებობა რომ დაეკავებინაო. არაფერი მოხდებოდა კი არა, შემთხვევითობასაც რომ ჰქონოდა ადგილი, ეს უნდა გამორიცხულიყო. ახლა საჭიროა სასწრაფოდ გაეცეს ყველა კითხვას პასუხი და პროკურორის სიტყვებიც დამტკიცდეს”.
ასათიანი ამბობს, რომ ხალხის მხარდაჭერა ახალი მთავრობის მიმართ იკლებს, საზოგადოებაში ბევრი კითხვის ნიშანი ჩნდება იმასთან დაკავშირებით, თუ რატომ იქცევა “ქართული ოცნება” წინამორბედივით. მისი თქმით “ქვეყანა ისევ საბავშვო ბაღშია და სახლობანას ვთამაშობთ”.
“ბევრი კითხვის ნიშანი ჩნდება. საკმაოდ ცუდი სათქმელია, მაგრამ ისმის კითხვა – რატომ იქცევა “ქართული ოცნება” წინამორბედივით? ეს ხელისუფლებისთვის დამთავრდება კატასტროფით და ბევრად უფრო მოკლე დროში, ვიდრე ნაციონალებისთვის. დუმს ღარიბაშვილი, ჩუმად არიან ლიდერებიც, თითქოს ეს ამბები მხოლოდ ორ დაჯგუფებას ეხება. გასაგებია არ უნდათ შეელიონ თანაგუნდელს, მაგრამ თუ ასე გაგრძელდა, ხალხი დაასრულებს მათ კინკლაობას”.
საზოგადოების გაურკვევლობაზე გაამახვილა დღეს ყურადღება არასამთავრობო ორგანიზაცია “საზოგადოებრივი ინიციატივების ცენტრის” თავმჯდმარე ირაკლი ღლონტმა და აღნიშნა, რომ სახელმწიფომ საზოგადოებას ყოველთვის უნდა გააგებინოს როგორი წარსულის მქონე პირი ინიშნება ქვეყნის წამყვანი უწყების სათავეში.
“პოლიტიკური დაპირისპირებების პოლიგონად ქცეულ ქვეყანაში, საზოგადოებას ვეღარ გაუგიათ ვის დაუჯეროს, უგულავას, თუ ფარცხალაძეს? მართალია ეს დაპირისპირება საკმაო დიდი ყურადღების ცენტრში მოექცა, მაგრამ მაინც ჩვეულებრივი პოლიტიკური დაპირისპირებაა, საქმე ეხება საქართველოს უმაღლეს ბრალმდებელ მთავარ პროკურორს. სწორედ ამიტომ სახელმწიფომ თავი ვალდებულად უნდა ჩათვალოს და როცა საქმე მსგავსი უფლებამოსილების პირს ეხება, საზოგადოება ჩააყენოს საქმის კურსში, რომ მის წარსულთან დაკავშირებით არანაირი კითხვები არ გაჩნდეს”.
ოთარ ფარცხალაძის ნასამართლეობასთან დაკავშირებით, ხელისუფლებისგან სწრაფ და ეფექტურ რეაგირებას მოელის ექსპერტი ხათუნა ლაგაზიძე. მისი თქმით, საჭიროა მოქმედება არა მხოლოდ კანონის ფორმით, არამედ, პოლიტიკური მიზანშეწონილობის პრინციპითაც.
“ეს საკითხი უნდა განვიხილოთ ცოტა უფრო გლობალურად, სწორედ იმ კონტექსტში, თუ როგორია საქართველოს ახალი ხელისუფლების ქცევა. თუ ის არის პროევროპული, პროდასავლური, მაშინ მიდგომა იქნება სრულიად სხვაგვარი და ალბათ, არჩევს, რომ ჰყვადეს მთავარი პროკურორის ადგილზე ისეთი ადამიანი, რომლის მიმართაც არ იქნებოდა ისეთივე კითხვები, როგორიც დღეს ოთარ ფარცხალაძის მიმართ ისმის. საზოგადოების დიდი ნაწილის მიერ მოყვანილმა ხელისუფლებამ ასე მალე არ უნდა დაკარგოს ხალხის ნდობა. თუ დღეს ხელუსუფლებამ უცვლელი დატოვა ვითარება, მეშინია, რომ მისი შემდგომი ქმედებები კიდევ უფრო ძალისმიერი იქნება და ნამდვილად არავის უნდა გაიაროს იგივე გზა, როგორიც მისმა წინამორბედმა”.
