ჟურნალისტ თეა გიგუაშვილის თქმით, საერთაშორისო ორგანიზაციის “ნიდერლანდების ინსტიტუტი მრავალპარტიული დემოკრატიისთვის“ მიერ დაფინანსდა პროექტი “მწვანე კედელი“ და ამ პროექტის ფარგლებში გორის მუნიციპალიტეტში ქარსაცავი ზოლების აღდგენისა და მოვლა-პატრონობის ადვოკატირება მოხდა.
გორის მუნიციპალიტეტის საკრებულოს დეპუტატი სოსო ხუროშვილი “გურია ნიუსთან” საუბრის დროს ამბობს, რომ ქარსაფარი ზოლების განადგურება 90-იან წლებში დაიწყო.
სოსო ხუროშვილი:
_ საქართველოში სულ 5 ათასი ჰექტარი ქარსაფარი ზოლები გვქონდა, აქედან გორის მუნიციპალიტეტზე მოდიოდა 1500 ჰექტრამდე, ეს ძალიან დიდი ფართობია. სოფლებში ხილის ბაღები გვქონდა, ახლა სადაც ვართ (საუბარია კარალეთი-ძევერის მონაკვეთზე) 20-25 წლის წინ ცარიელი ადგილები საერთოდ არ არსებობდა, ყველგან იყო ხილის ბაღები გაშენებული. ბოლო წლებში მოხდა ისე, რომ 90-იან წლებში ხილის გატანის პრობლემა იყო და ასევე ამას დაემატა წყლის პრობლემა, რის გამოც ვერ ხერხდებოდა სამეურნეო ნაკვეთებში მორწყვა და ასევე ქარსაფორი ზოლში დარგული მცენარეების. უწყლობამ ხეების გახმობა გამოიწვია. ეს ქარსაფარი ზოლები გაიჩეხა, ეს კი 90-იან წლებში ხდებოდა. მაგ დროს გაზის პრობლემა იყო და შეშით ხდებოდა გათბობა. ძირითადად ალვის ხეებით იყო ეს ზოლები გაშენებული.
_ ახლა რამდენი ხის დარგვა იგეგმება?
_ დარგვით ვფიქრობთ, რომ ბევრი ხე დავრგოთ, მაგრამ ყველაზე მთავარი მაინც მოვლა არის, ეს ყველაფერი კი ფინანსებთან არის დაკავშირებული. ქარსაფარ ზოლს მორწყვა უნდა. ალბათ, უნდა ვიფიქროთ ისეთ ხეებზე, რომლებსაც ნაკლები მორწყვა ჭირდება.
_ ეტაპობრივად მოხდება ამის გაკეთება?
_ საკრებულოს თავმჯდომარემ დავით რაზმაძემ შექნმა კომისია და აქტიურად დაიწყება თანხების მოზიდვა. ასევე არის მცდელობა, რომ ადგილობრივი ფერმერებიც დაგვეხმარნენ. დარგვას შერეული მცენარეებით დავიწყებთ, _ უთხრა სოსო ხუროშვილმა “გურია ნიუსს”.
მისივე თქმით, ქარსაფარი ზოლის აღდგენა ერთ წელიწადში ვერ მოხერხდება.
გიორგი დვალაშვილი, ივანე ჯავახიშვილის სახელობის თბილისის სახელმწიფო უნივერსიტეტის პროფესორი ჟურნალისტებთან საუბრის დროს ამბობს, რომ მთავარია კარალეთში ქარსაფარი ზოლის პრობლემის მოგვარება დაიწყოს და კარგია, როდესაც ადგილობრივებმა ამ კუთხით მუშაობა დაიწყეს.
გიორგი დვალაშვილი:
_ კარალეთის მონაკვეთი არის ერთ-ერთი რთული ადგილი, აქ არის როგორც დასავლეთის, ასევე აღმოსავლეთის ქარები გავრცლებული. კარგი იქნება ქარსაფარ ზოლში ფიჭვის ხე თუ გაშენდხება, ეს ჩემი რეკომენდაციაა. ფიჭვი ადვილად ეგუება აქაურ პირობებს და არ უნდა მორწყვა.
_ როგორც ჩვენთვის არის ცნობილი, ქარსაფარ ზოლში ალვის ხეების დარგვას აპირებენ…
_ ალვის ხეები სწრაფად იზრდებოდა, მაგრამ 30 წლის შემდეგ ის საშიშია. რამდენიმე ფაქტი არის, რომ წაქცეულმა ალვის ხემ პრობლემა შეუქმნა მოსახლეობას. გზიდან მოშორებით, სადაც არის ქარსაფარი ზოლები იქ შეიძლება ალვის ხის დარგვა ან კიდევ სხვა მცენარის. აუცილებელია ქარსაფარი ზოლების აღდგენა და მოვლა-პატრონობა, _ უთხრა გიორგი დვალაშვილმა “გურია ნიუსს”.
მედია ტური ხორციელდება საქართველოს ადგილობრივ თვითმმართველობათა ეროვნული ასოციაციი მიერ ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. ამ ტურის ფარგლებში ჟურნალისტები ბორჯომში, აბასთუმანსა და უფლისციხეში იმყოფებოდნენ. თუ რა მოხდა აბასთუმანში და რატომ განადგურდა ერთ-ერთი სოფელი გორის მუნიციპალიტეტში, ამის შესახებ “გურია ნიუსი” ინფორმაციას და ფოტორეპორტაჟს მოგვიანებით შემოგთავაზებთ.
