“სასახლეში კრიზისი ადმინისტრაციის არაპროფესიონალიზმითა და პედაგოგთა კოლექტივთან კომუნიკაციის დამყარების უუნარობით არის გამოწვეული. ხდება საბიუჯეტო თანხების არასწორი განკარგვა, ადმინისტრაცია ხელოვნურად არის გაბერილი და მისი შენახვა სასახლეს უფრო ძვირი უჯდება, ვიდრე ძირითადი კოლექტივის. ადმინისტრაციის თანამშრომლის ხელფასი რიგითი პედაგოგის ხელფასზე 10-15 ჯერ მეტია. მუდმივად ხდება გაუაზრებელი გადაწყვეტილებების მიღება და დებულებების ცვლა, ახალი ადმინისტრაციისგან მხარდაჭრას ველოდით. გვეგონა, რომ დაიწყებდნენ სასახლის ლიკვიდაციის ბრძანების გაუქმებისთვის ბრძოლას ან შექმნილი სსიპ-ის ცნობას ყოფილი სასახლის უფლებამემკვიდრედ, ჩვენთვის პედაგოგის სტატუსის დაბრუნებას და აშ.” _ ამბობს სასახლის თანამშრომელი ლიანა შენგელია.
მიუხედავად იმისა, რომ 2013-2014 სასწავლო წლისთვის მოსწავლე ახალგაზრდობის ეროვნული სასახლე ნაწილობრივ ფასიან სწავლებაზე გადავიდა, პედაგოგების თქმით, გაზრდილი ბიუჯეტი არც მათ ხელფასებზე ასახულა და არც სასწავლო პროცესის გაუმჯობესებაზე.
“სასახლის კაბინეტებში ერთი კომპიუტერიც არ დგას , ამ დროს კი სოლიდური თანხა იხარჯება ტურნიკეტის დამონტაჟებასა და მისი მომსახურე პერსონალის ხელფასებზე. ბავშვებს უწესდებათ კონტროლი, წინასწარ აფრთხილებენ, რომ სამი გაცდენის შემთხვევაში გაირიცხებიან, ბარათის დაკარგვის შემთხვევაში კი დაჯარიმდებიან. სასახლე ყოველთვის იყო და უნდა იყოს ნებაყოფლობითი, სადაც ბავშვი თავს იგრძნობს თავისუფლად. ასევე არ არის მიზანშეწონილი ბავშვების შეზღუდვა , თუ რამდენ წრეზე აქვთ სიარულის უფლება,” _ ამბობს ლიანა შენგელია.
სასახლეში გამართულ შეხვედრას სპორტისა და ახალგაზრდობის მინისტრის მოადგილე ზურაბ აზმაიფარაშვილი დაესწრო, რომელიც პედაგოგებს დირექტორთან შეხვედრას და შესაძლებლობის ფარგლებში მათ მიერ წამოჭრილი პრობლემების გადაჭრას დაპირდა. დარბაზიდან გამოსული მინისტრის მოადგილე კი ჟურნალისტებთან ამბობს, რომ მისთვის პროტესტის მიზანი და მიზეზი გაუგებარია.
“ის, რომ ტუალეტები წესრიგში მოდის, ის რომ ბავშვების უსაფრთხოებაა დაცული, ამას ემსახურება ის ტურნიკეტიც, რომ ზედმეტი ვერავინ შემოვიდეს სასახლეში. ამიტომ აქ პრობლემა არ არის. ეს ყველაფერი პედაგოგების ხელფასებსა და პრემიებზე აისახა. 1,87 ლარიდან 5 ლარამდე ავიდა პედაგოგის საათობრივი ანაზღაურება. რაც შეეხება შტატების გაზრდას, ეს ტყუილია. ეს პროტესტი ემსახურება გარკვეული ადამიანების მერკანტილურ მიზნებს, რომლებსაც სურთ, რომ გახდნენ სასხლის ხელმძღვანელები,” _ ამბობს აზმაიფარაშვილი.
სასახლის დირექტორმა ქეთევან ფეიქრიშვილმა “გურია ნიუსთან” ინტერვიუში პედაგოგების ყველა ბრალდება უარყო. მისი თქმით, ის რეფორმატორია, რეფორმებს კი ყოველთვის მტკივნეულად აღიქვამენ.
ქეთევან ფეიქრიშვილი:
_ ზოგადად სასახლეში ყოველთვის ბევრი პრობლემა იყო. ჩემი აქ მოსვლის შემდეგ დავიწყეთ მათი შესწავლა და მივედით იმ გადაწყვეტილებამდე, რომ რასაკვირველია, აუცილებელი იყო გარკვეული რეფორმების ჩატარება და თქვენ იცით, რომ რეფორმები ყოველთვის მტკივნეულია. თვითდინებაზე იყო სასახლე ყოველთვის მიშვებული, ჩვენ კი ვცდილობთ ეს ყველაფერი კანონის ჩარჩოში მოვაქციოთ. მავანს და მავანს ეს როგორც ჩანს, არ აწყობს. ულტიმატუმის და შანტაჟის ენა, რასაც ისინი იყენებენ, მიუღებელია როგორც სასახლის ადმინისტრაციის, ასევე სამინისტროსთვისაც. კონსტრუქციული დიალოგისთვის კი ყოველთვის მზად ვართ.
_ საკმაოდ ბევრი პედაგოგი დაგიპირისპირდათ. როგორც ჩანს სწორი კომუნიკაცია და თქვენი რეფორმების მნიშნელობაში მათი დარწმუნება ვერ მოახერხეთ.
_ თქვენ გგონიათ ყველა პედაგოგი მათ პოზიციაზეა? უბრალოდ ჩართული ყავთ ბავშვები და მშობლები სასახლის შიდასამზარეულოში, რაც ყოვლად დაუშვებელია. ჩვენ მიგვაჩნია, რომ ეს არის უზნეობა და ჩირქს სცხებს ყველა პედაგოგს. ჩემს მიერ დაწყებული რეფორმები ხორციელდება სწორად, თითოული ჩემი ნაბიჯი შეთანხმებულია მთავრობასთან და გამყარებულია კანონით. მე რეალურად ისიც კი არ ვიცი რისთვის მიცხადებენ უნდობლობას, რადგან პირობა, რომელიც მე დავდე 2013 წლისთვის, შესრულებული მაქვს სრულიად. 2014 წლის ბიუჯეტზე ვიმუშავეთ სამინისტროსთან ერთად და მომავალ წელს ვხვდებით მომატებული ბიუჯეტით.
_ სასახლის პედაგოგები პედაგოგის სტატუსს ითხოვენ, როგორ აპირებთ ამ საკითხის გადაჭრას?
_ პედაგოგიური სტატუსი, რომელსაც ითხოვენ, არ შედის ჩემს უფლებამოსილებაში. ამაზე დაწყებულია მუშაობა სამინისტროსთან, მაგრამ ამ ეტაპზე საუბარია იმაზე, რომ ერთადერთი გზა ამ სტატუსის მოპოვების არის გამოცდების ჩაბარება. ასე რომ, ეს ნებაყოფლობითია და თუ სურვილი ექნებათ, დავეხმარები იმაში, რომ ტრეინინგები გაიარონ და წარმატებით ჩააბარონ გამოცდა.
_ დღევანდელ შეხვედრაზე საუბარი იყო გაუმართლებელ ადმინისტრაციულ ხარჯებზეც. თქვენ ბრალს გდებენ ადმინისტრაციის შტატების ხელოვნურად გაზრდაში.
_ გაბერილი ადმინისტრაცია არ არის. სტრუქტურულად შედარებით დასალაგებელია. თუმცა, ეს სტურქტურა და ხელფასები ესე დამხვდა, ზოგადად სასახლე პასუხს მაგებინებს იმაზე, რაც მე არ ჩამიდენია და ასე უცხოვრიათ მათ წლების განმავლობაში.
_ კიდევ ერთი ბრალდება, თქვენს მიერ ნათესავების დასაქმებას უკავშირდება. ასევე ბრალს გდებენ პედაგოგების შევიწროებაში, თითქოს სამუშაო ოთახები ადმინისტრაციის კაბინეტებად გადააკეთეთ.
_ სასახლეს აქვს ოთახების გარკვეული ოდენობა, ასეთი ოთახები იყო აქ ყოველთვის და არანაირი ცვლილელები არ მომხდარა. სასახლეში არის აუთვისებელი ფართი, მაგრამ მისი გარემონტებისთვის ფინანსები არ გვაქვს, თუმცა, ნაბიჯ-ნაბიჯ წინ მივდივართ. მაგალითად, ცეკვის კაბინეტს ელემენტარულად გასახდელი არ ჰქონდა და ავუშენეთ. რაც შეეხება ადმინისტრაციის გაბერვას, ესეც არასწორია. მე დამხვდა ვაკანტური ადგილები, რომელზედაც პროფესიონალები მოვიყვანე. ნათესავების და ოჯახის წევრების პრობლემა ზოგადად სასახლეში არის- აქ ოჯახებად მუშაობენ ცოლი, ქმარი, შვილი, შვილიშვილი, ყველანი სწორედაც რომ ასე არიან, ჩემი ნათესავი კი აქ არავინ არ არის.
სასახლის დირექტორის თქმით, პედაგოგთა საათობრივი ანაზღაურება თითქმის სამჯერ გაიზარდა, თუმცა, მისთვისაც მიუღებელია, რომ ზოგეირთი მასწავლებლის თვიური შემოსავალი 45 ლარს არ აღემატება. ქეთევან ფეიქრიშვილის თქმით, უკეთეს მდგომარეობაში არიან შტატში მყოფი პედაგოგები, მათი ხელფასები ზოგჯერ 500 ლარამდეც კი ადის.
ცნობისთვის, ადმინისტარციაში ხელფასები 500 ლარიდან იწყება. დირექტორის ანაზღაურება კი 2950 ლარია.
“როდესაც ისინი ითხოვდნენ, გამეზარდა მათი ხელფასები ადმინისტრაციის თანამშრომლებისთვის ხელფასის შემცირების ხარჯზე, მე მათ ყოველთვის ვპასუხობდი, რომ ვინმესთვის დაკლებას, მათთვის მომატება მერჩივნა, რაც გავაკეთე კიდეც,” _ ამბობს სასახლის დირექტორი.
