“ყველა შემთხვევა რეალიზებული იყო გენერალური ინსპექციის მიერ, მაგრამ გენერალურ ინსპექციას დღემდე არ ჰქონდა უფლება, ადმინისტრაციული წესით დაეკავებინა ადამიანი, როდესაც ამის აუცილებლობა არსებობდა. მაგალითად, ვიცით, რომ თანამშრომელი იმყოფება ნარკოტიკული ნივთიერების ზემოქმედების ქვეშ. ციხის ტერიტორიაზე ვერ შედის პოლიცია, ჩვენი საგამოძიებო დეპარტამენტიც ვერ გამოიძიებს, რადგან არ აქვს ადმინისტრაციული წესით დაკავების უფლება. დღეიდან გენერალურ ინსპექციას ადმინისტრაციული წესით ადამიანის დაკავების უფლება ექნება. ეს არის ძალიან მნიშვნელოვანი”, _ განაცხადა სუბარმა.
სასჯელაღსრულების მინისტრი ამ თემაზე დიმიტრი შაშკინის განცხადებასაც გამოეხმაურა და აღნიშნა, რომ ყოფილმა მინისტრმა “სრული უვიცობა გამოავლინა”.
“უკვე აღარ მიკვირს, რატომ იყო შაშკინის დროს ასეთი საშინელი ვითარება ციხეებში. სრული უვიცობა გამოავლინა ამ ადამიანმა, კანონის წაკითხვა არ შეუძლია. ვერ მიხვდა, რომ ცვლილებები, რომელიც გენერალური ინსპექციის შესახებ კანონში შედის, ეხებოდა ადმინისტრაციულ დაკავებას და სისხლის სამართლებრივ დევნასთან საერთო არაფერი ჰქონდა. მის პერიოდში ციხეებში დისციპლინური წესით ერთი ადამიანიც კი არ დასჯილა. ეს ის პერიოდია, როდესაც პიკს აღწევდა ადამიანების წამება. როდესაც ეს ადამიანი გვასწავლის ჭკუას, როგორ ვიმუშაოთ, უხერხულია. მარტო ერთი წლის განმავლობაში გენერალურმა ინსპექციამ სხვადასხვა ტიპის სახდელი დაადო 230-მდე ადამიანს და საგამოძიებო დეპარტამენტმა ძალიან სერიოზული დარღვევების რამდენიმე ასეული საქმე შეისწავლა”, _ განაცხადა სუბარმა.
