ზეიმი ორგანიზებული იყო ქართველ მუსლიმთა კავშირისა და საქართველოს ევანგელურ ბაპტისტური ეკლესიის მიერ.
საღამო გახსნეს ევანგელურ ბაპტისტური ეკლესიის უკვე გადამდგარმა მთავარეპისკოპოსმა, დოქტორმა მალხაზ სონღულაშვილმა და ქართველ მუსლიმთა კავშირის თავმჯდომარე ზურაბ ცეცხლაძემ. მათ ბიბლიიდან და ყურანიდან ამოიკითხეს საკითხავები, რომლებიც იესოს შობას უკავშირდება. ევანგელურ ბაპტისტური ეკლესიის მშვიდობის კათედრალის გუნდმა შეასრულა საშობაო საგალობელი “25-სა დეკემბერსა” ორი ვარიაციით: “ქრისტე იშვა ბეთლემსა” და “ისა იშვა ბეთლემსა” (ყურანულ ტრადიაციაში იესო მოიხსენიება, როგორც ისა).
ზეიმს ესწრებოდნენ ქართველი სუნიტი სასულიერო პირები, საქართველოს მუფთის მოადგილე ადამ შანთაძე, ასევე აზერბაიჯანელი შიიტი სასულიერო პირები და რელიგიური ლიდერები: ჰაჯ-ალი ალიევი – კავკასიის მუსლიმთა სამმართველოს წარმომადგენელი საქართველოში, აზიზ ნაბიევი – მარნეულის მედრესეს დირექტორი და სასულიერო საბჭოს თავმჯდომარე, ჰაჯ ფაიგ ნაბიევი – ორგანიზაცია ალულბეითის დირექტორი თბილისში, აგრეთვე ფერეიდნელი შიიტი თეოლოგი, ყუმის უნივერსიტეტის ბიბლიოთეკის დირექტორი, პროფესორი აქბარ მუყადასი, და თურქეთის საელჩოს ატაშე აჰმედ ერდემი (ქავთარაძე). ზეიმზე ქრიტანთა მხარეს წარმოადგენდნენ ეპისკოპოსები – ილია ოსეფაშვილი, მერაბ გაფრინდაშვილი, რუსუდან გოცირიძე და ასევე სხვა სასულიერო პირები და ჩვენი საზოგადოების წარმომადგენლები, როგორც ბაპტისტური, ასევე მართლმადიდებლური ტრადიციიდან.
შეხვედრას მიმართა ევროკავშირის ელჩმა საქართველოში ფილიპ დიმიტროვმა, რომელმაც თავის სიტყვაში ბრძანა: “იესომ თქვა, სადაც ორნი ან სამნი შეიკრიბებიან ჩემი სახელით, მეც მათ შორისა ვარო. დღეს ორზე და სამზე მეტნი ვართ იესოს სახელით შეკრებილნი და შესაბამისად, იესო ჩვენთან არის.”
საქართველოს ხელისუფლების მხრიდან ზეიმს ესწრებოდა შერიგებისა და მოქალაქეთა თანასწორობის მინიტრი პაატა ზაქარეიშვილი, რომელიც მიესალმა ამ ისტორიულ შეხვედრას და იმედი გამოთვა, რომ მსგავსი ერთობა ქრისტიანებსა და მუსლიმებს შორის კიდევ უფრო მეტად გაამყარებს საქართველოს სახელმწიფოებრიობას.
ზეიმის კულმინაციას წარმოადგენდა მონაწილეთა მიერ ერთმანეთში საჩუქრების გაცვლა: ქრისტიანმა სასულიერო პირებმა თავიანთ მუსლიმ მეგობრებს გადასცეს სახარების ქართული გამოცემა (ბიბლიური საზოგადოების დახმარებით) და მუსლიმმა სასულიერო პირებმა თავიანთ ქრისტიან მეგობრებს გადასცეს ყურანის ქართული თარგმანი.
შეხვედრის დასასრულს მალხაზ სონღულაშვილმა და ზურაბ ცეცხლაძემ ყველას მადლობა გადაუხადეს ზეიმზე დასწრებისათვის და იმედი გამოთქვეს, რომ ქრისტიანთა და მუსლიმთა შორის მეგობრობა საქართველოში მაგალითი გახდებს სხვა ქვეყნებისთვისაც. ზურაბ ცეცხლაძემ მწუხარება გამოთქვა, რომ მალხაზ სონღულაშვილმა დატოვა მთავარეპისკოპოსის თანამდებობა, მაგრამ იმედი გამოთქვა, რომ მის მიერ დაწყებული მეგობრობა მუსლიმებსა და ქრისტიანებს შორის მომავალშიც გაგრძელდება. მალხაზ სონღულაშვილმა მადლობა გადაუხადა ყველას ზეიმში მონაწილეობისათვის და დასძინა, რომ მას სურს იგი მომავლში გაიხსენონ, როგორც მთავარეპისკოპოსი, რომლის მთავარი ლოზუნგიც იყო: “სიყვარული ყველასი და სიძულვილი არავისი.”
სურათზე: ქრისტიანი, მუსლიმი (შიიტი და სუნიტი) სასულიერო პირები ლოცვაზე 25 დეკემბერს.
