ჯონდი ბაღათურია ჟურნალისტებთან და იქ მყოფ საზოგადოებასთან ერთად დღეს არსებულ ფასებს გაეცნო იმ დასკვნის გასაკეთებლად, არის თუ არა 150 ლარის ოდენობის პენსია იმისთვის საკმარისი, რომ უბრალოდ იარსებოს ერთმა რიგითმა პენსიონერმა.
“დღეს ჩვენ ყველამ ერთად ვნახეთ, რომ ბაზარში ფასებს ცეცხლი უკიდია, ერთი რიგითი პენსიონერის ძალიან მოკრძალებული საახალწლო სადილი 215 ლარი ჯდება, ყოველგვარი გოჭისა და ინდაურის გარეშე. ამ დროს, ჯიპებში “გამოჯგიმული” მთავრობა გვიმტკიცებს, რომ საარსებო მინიმუმი 150 ლარი სავსებით საკმარისია, რომ პენსიონერმა იარსებოსო. მე დარწმუნებული ვარ და კიდევ ერთხელ ვიმეორებ, ჯიპებში “გაჯგიმული” პარლამენტის წევრებისთვის პენსიონერის მოკრძალებული სადილის 215 ლარი, ერთი პროდუქტის ფასს უდრის, სწორედ ამიტომ მოვუწოდებთ მთავრობას, დაუყოვნებლივ არის გასატარებელი საპენსიო რეფორმა, “ქართული დასის” არგუმენტი კი არის ის, რომ მინიმალური პენსია 205 ლარიდან უნდა დაიწყოს და 240-250 ლარამდე უნდა იყოს. ეს დამოკიდებული უნდა იყოს ნამუშევარ წლებზე. აი, ეს არგუმენტები არის ძალიან მტკიცე”.
ბაღათურიამ განაცხადა, რომ ამ ფასებს პენსიონრების ხელმოწერებით გადაუგზავნიან მთავრობას იმის დასამტკიცებლად, რომ საარსებო მინიმუმი არ არის 150 ლარი. მისი თქმით, შესაბამისად ყველაზე დაბალი საპენსიო ზღვარი უნდა იყოს 205 ლარი.
“მართალია ვერც ამ 250 ლარად ტკბილად ვერ იარსებებს პენსიონერი, მაგრამ ჩვენ გვექნება იმის ფიქრის საშუალება, რომ იმდენს მაინც ვაძლევთ პენსიონერს, ელემენტარულად მშიერი არ მოკვდება, ამასთანავე თვიდან თვემდე იმის მაყურებელი, მთავრობა როგორ მდიდრდება და ქვეყანა როგორ ღატაკდება, არ უძლიერდებოდეს უსამართლობის განცდა. კიდევ ერთხელ მინდა მოვუწოდო მთავრობას, წელს პენსია აუცილებლად უნდა გაიზარდოს საარსებო მინიმუმამდე, მთავრობამ უარი უნდა თქვას ჯიპებზე, ავტოპარკის განახლებაზე, ახალ სავარძლებზე და ყველა იმ კონფორტზე, რომელსაც ხალხის ხარჯზე იწყობს”.
ბრიფინგის დაწყებამდე ჯონდი ბაღათურიასთან ბევრი ადამიანი მივიდა, ზოგი თავის გასაჭირს უამბობდა, ზოგი საკონტაქტო ნომერს სთხოვდა, ზოგიც უბრალოდ ეფერებოდა და წარმატებას უსურვებდა, მაგრამ კამერების წინ კომენტარის გაკეთება მხოლოდ ერთმა ქალბატონმა, ლამარა ჩიტაიამ ისურვა.
_ საშინელი ფასებია, ყოველ დღე იზრდება ფასები. ახლა რომ ასეა, ახალი წლის წინა დღეს რაღა იქნება. მე და ჩემმა მეუღლემ ათჯერ მაინც შევამცირეთ ისედაც მოკლე სია რა უნდა გვეყიდა ბაზარში, მაგრამ ნახევარიც ვერ ვიყიდეთ. თაფლი 15 ლარია, ნიგოზი-14-15 ლარი. გოზინაყის გარეშე ახალი წელი წარმოგიდგენიათ? ვერა, ხოდა ჩვენ და კიდევ ბევრ ჩვენნაირს მოუწევს შეეგუოს რეალობას. გოჭი იაფადო, ერთი კაცი ყვიროდა, დამაინტერესა და მივედი, გოჭს კი არა, უფრო თაგვს ჰგავდა და 50 ლარიო. ან როგორ დაკლეს ასეთი პატარა?!”
_ ქალბატონო ლამარა, ე.ი. თქვენ ადასტურებთ, რომ ერთი რიგითი პენსიონერი ვერ შეძლებს საახალწლოდ განსხვავებული კერძის გაკეთებას?
_ ვერა, შვილო, განსხვავებულისას კი არა, ჩვეულებრივისაც ჭირს უკვე. შვილი რომ არ გვეხმარებოდეს, მე და ჩემს მეუღლეს, ნამდვილად არ ვიცი რა გვეშველებოდა.
