_ გავეცანი თქვენს მასალას. ალბათ, გაუგებრობის ბრალია, რომ არ მოგაწოდეს ის ლინკები, სადაც ის ღონისძიებაა გაშუქებული, რის გამოც რესტორან “წისქვილში” სტუმრებისთვის მოწყობილი სუფრა 4 527 ლარი დაჯდა. ახლავე გამოგიგზავნით ლინკებს იმის დასტურად, რომ ღონისძიება ნამდვილად გაიმართა, _ გვითხრა ეკატერინე ყაველაშვილმა და რამდენიმე სიუჟეტის და სტატიის ლინკიც გამოგვიგზავნა.
მოწოდებული მასალებიდან კი გაირკვა, რომ პოლონეთის ფინანსთა სამინისტროს სახაზინო დაზვერვის დეპარტამენტის მაღალი თანამდებობის პირები, რომელთა პატივსაცემადაც ვახშამი გაუმართავთ (ფინანსთა სამინისტროს საგამოძიებო სამსახურის პრესსამსახურის ხელმძღვანელის ინფორმაციით, რესტორან “წისქვილში” სუფრა პოლონეთის ფინანსთა სამინისტროს სახაზინო დაზვერვის დეპარტამენტის მაღალი თანამდებობის პირებისთვის გამართეს) საქართველოში 3 ოქტომბერს იმყოფებოდნენ. ყველა სტატია და სიუჟეტი სწორედ ამ რიცხვით თარიღდება. რესტორან “წისქვილში” კი სუფრა 30 სექტემბერს გაიმართა.
ამ ოთხდღიან შუალედს, ფინანსთა სამინისტროს საგამოძიებო სამსახურში ასე ხსნიან:
_ ეს ადამიანები საქართველოში ჩამოვიდნენ 30 სექტემბერს, გამთენიას. ამავე დღეს იყო მიღება. ღონისძიებების ნაწილი გაშუქდა, ნაწილი პრესისთვის დახურული იყო. შესაბამისად, ეს არის ჩვენი პასუხი.
სამართალმცოდნე ლევან ალაფიშვილი ამბობს, რომ მთავრობამ უნდა დაადგინოს დაადგინოს მინიმალური სტანდარტები, რომელსაც ყველა უწყება დაიცავს.
_ პროტოკოლური ღონისძიებები და ამ ღონისძიებების ფარგლებში თანხების ხარჯვა არის ის საკითხი, რომელიც კანონმდებლობით სრულად არ არის მოწესრიგებული. ობიექტურად რომ ითქვას ეს რთულიც არის, რადგან შეუძლებელია ყველა და ხშირად მცირე დეტალის წინასწარ განსაზღვრა და კანონში ასახვა. კანონი ამ სფეროში დაწესებულებებს უტოვებს თავისუფლებას, თუმცა, ვფიქრობ დიდ სირთულეს არ წარმოადგენს – მთავრობამ დაადგინოს მინიმალური სტანდარტები, რომელსაც ყველა უწყება დაიცავს. მაგალითად სუვენირებისა და საჩუქრების ტიპი თუ ღირებულება, მიღებაზე სტუმართა გარდა დამატებით მოსაწვევ პირთა საკითხი, სადილების ან ექსკურსიების პერიოდულობა თუ სხვა. ფინანსთა სამინისტროს საგამოძიებო სამსახურის შემთხვევაში კანონდარღვევა არ არის, დარწმუნებული ვარ სხვა სახელმწიფო დაწესბულებებსაც ექნებათ გაწეული ანალოგიური ხარჯები, რომელთა ჯამი შესაძლოა დიდ ციფრებს აღწევდეს, _ გვითხრა ალაფიშვილმა.
ფინანსთა სამინისტროს პრესსამსახურმა შეკითხვის გაგზავნა წერილობით მოგვთხოვა. ჩვენი შეკითხვა ასეთი იყო: “2013 წლის სექტემბერში, ფინანსთა სამინისტრომ 4 527 ლარი გადაიხადა რესტორან “წისქვილში”. ხელშეკრულებაში მითითებულია, რომ ვახშამი ოფიციალური მიღებისთვის მოეწყო. გთხოვთ, მოგვწერეთ რომელი ოფიციალური მიღება გაიმართა, რომლისთვისაც აღნიშნული თანხა რესტორანში დაიხარჯა, სად გაშუქდა ეს ღონისძიება (იქნებ, მიგვითითოთ შესაბამისი ლინკი) და ასევე განგვიმარტოთ, რა სახის და ვის მიერ გაწეული მუსიკალური მომსახურებისთვის იქნა გადახდილი ამავე დღეს 850 ლარი.”
აღნიშნულს შეკითხვაზე ფინანსთა სამინისტროს საგამოძიებო სამსახურმა ასეთი პასუხი გაგვცა:
_ საქართველოში, ფინანსთა სამინისტროს საგამოძიებო სამსახურში, სამუშაო ვიზიტით იმყოფებოდნენ პოლონეთის ფინანსთა სამინისტროს სახაზინო დაზვერვის დეპარტამენტის მაღალი თანამდებობის პირები. აღნიშნული ვიზიტი წარმოადგენდა პოლონურ-ქართული პროექტის ნაწილს, რომელიც გათვლილია 2013-2014 წლებზე და დაფინანსებულია პოლონეთის საგარეო საქმეთა სამინისტროს მიერ. პროექტის მიზანია, რეგიონალურ დონეზე კორუფციის პრევენციის, გამოვლენისა და მის წინააღმდეგ ბრძოლის მეთოდების შესახებ გამოცდილების გაზიარება. აღნიშნულ ორ უწყებას თანამშრომლობის სამწლიანი ისტორია აქვს, 2013 წელს კი ურთიერთთანამშრომლობას ოფიციალური სახე მიეცა და მოხდა მისი დაფინანსება. ბათუმში, სასტუმრო “რედისონში” გაიმართა სამუშაო შეხვედრა, ხოლო რაც შეეხება უშუალოდ რესტორანში დახარჯულ თანხას, ეს იყო ოფიციალური მიღება, ვახშამი რომელზეც ქართულმა მხარემ მიიწვია პოლონეთის დელეგაცია და სწორედ ამ მიღებისთვის იქნა გამოყოფილი თანხა.”
