“ოზურგეთის მარადიული ფუშე”

_ ჩვენი წყაროს ინფორმაციით, შესაძლოა, თავართქილაძე გუბერნატორის, გიორგი ჩხაიძის მრჩეველი ან თანაშემწე გახდეს.

ამ ინფორმაციას არ ადასტურებს გურიის გუბერნატორი გიორგი ჩხაიძე. თავად ლელა თავართქილაძე აღნიშნულ თანამდებობებზე მისი დანიშვნის შესახებ “გურია ნიუსთან” კომენტარს არ აკეთებს: _ ამ თემასთან დაკავშირებით არ ვაკეთებ კომენტარს, _ გვითხრა თავართქილაძემ.

გიორგი ჩხაიძე, გურიის გუბერნატორი: _ ეს ინფორმაცია არ არის რეალური, ამას ვადასტურებ. რაც შეეხება სხვას, ქალბატონი ლელა თავართქილაძე დღეის მდგომარეობით, არის ჩემი თანამშრომელი. განცხადება, როგორც ავღნიშნე, დაწერილი აქვს. მისი გათავისუფლების განცხადებას ხელი ოფიციალურად ხვალ მოეწერება და ამ თანამდებობაზე 1 იანვრიდან აღარ იქნება.

_ ბატონო გიორგი, გვაქვს ინფორმაციები, რომ თქვენი ყოველი დღის განრიგი თუ რაიმე ღონისძიება ლელა თავართქილაძის მიერ იგეგმება. ჩვენი წყარო იმასაც ამტკიცებს, რომ ის გაძლევთ რჩევებს ამა თუ იმ კადრის შერჩევასთან დაკავშირებით. აქედან გამომდინარე, ინფორმაცია, რომ ქალბატონი ლელა თქვენს თანაშემწედ ან მოადგილედ უნდა დაინიშნოს, საფუძველს მოკლებული არ უნდა იყოს.

_ გავრცელებულ ხმები იმასთან დაკავშირებით, რომ ყველა ღონისძიებას ლელა თავარქილაძე მიგეგმავს, ეს ნამდვილად, თავისთავად ასეა, მაგრამ როგორც გითხარით, ის ჯერ კიდევ ჩემი თანამშრომელია და მას ვალდებულებები გააჩნია. მე შეიძლება ძალიან ბევრი რამ დამჭირდეს, ვთხოვო მას დახმარება მეგობრულად, ვკითხო რჩევები. ჩვენ ვისაუბრეთ და ქალბატონი ლელა თანახმაა, რომ თუ კი საჭირო გახდება, მეგობრულად მომეხმარება, _ გვითხრა ჩხაიძემ.

რესპუბლიკური პარტიის წევრი მარინა სუნგულია “გურია ნიუსთან” ამბობს, რომ თავართქილაძის თანამდებობაზე დატოვება ან სხვა თანამდებობაზე დანიშვნა ოზურგეთის შეურაცხყოფაა:

_ მოარული ხმები ლელა თავართქილაძის “ძლევამოსილებასთან” დაკავშირებით, ჩემი ღრმა რწმენით, მისივე შემოქმედების ნაყოფია. სამწუხაროდ, ჩვენს ქალაქში, ქალბატონი ლელა და ბატონი ფუშე სინონიმებად იქნენ, რადგან ყველა მთავრობაში მოიძებნა მისთვის პოსტი და წლების განმავლობაში, იგი ადმინისტრაციული შენობის “მესამე სართულის” უცვლელ ატრიბუტად იქცა. აღსანიშნავია, რომ ქალბატონი ლელა მის მიერ ჩატარებული სადამსჯელო ღონისძიებებით დაგვამახსოვრდა, რაც გამოიხატება განსხვავებული აზრის მქონე ადამიანთა საკმაოდ ეფექტურ ფარულ ტერორში.

იმ სტერეოტიპისაგან განთავისუფლება, რომელიც ჩვენი ქალაქის მრავალწლიანი სამწუხარო რეალობა იყო და რასაც “შეგვაჩვიეს”, დღეს ეჭვსა და იმედს ერთდროულად ბადებს. ამ ეჭვს ამყარებს ქალბატონი ლელას თანამდევი მითი მის მრავალფეროვან მეგობრებზე ყველა პოლიტიკურ პარტიაში და ამ მეგობრების, წუთისოფლის ბრუნვის მიხედვით, სათავისოდ წარმოჩენაში. მეგობრობას მივესალმებით, მაგრამ იგი ინდულგენცია არ არის.

ჩემი ღრმა რწმენით, არ მგონია, ოზურგეთი კვლავ პოლიტიკური ამორალობის სამზერად იყოს განწყობილი. ზემო ხსენებული ქალბატონის კონკრეტულ თანამდებობაზე დანიშვნა იმ ადამიანების შეურაცხყოფაა, რომლებიც “ნაციონალების” ზეობის ხანაში (და არა მარტო “ნაციონალების”) სიმართლისთვის იბრძოდა. სიტყვა _ “ბრძოლას” ფიგურალური დატვირთვა არ აქვს. მე ვსაუბრობ მათი სახელით, ვინც კარგად იცის, რასთან ასოცირდება ლელა თავართქილაძის თანამდებობრივი “არ ვსდევ ჟამთა ცვლას, მე იგივე ვარ მარად და მარად”, _ აღნიშნავს სუნგულია.