როგორც “გურია ნიუსთან” საუბრისას “კავკასიის ეკონომიკური და სოციალური კვლევითი ინსტიტუტის” (CIESR) აღმასრულებელი დირექტორი თემურ თორდინავა აცხადებს, თვითმმართველობებში რამდენიმე ძირითადი პრობლემა გამოიკვეთა და ამის აღმოსაფხვრელად ექსპერტებმა სპეციალური რეკომენდაციები დადეს.
“საზოგადოებრივი მონიტორინგი თვითმმართველობის გამჭვირვალობისთვის” პროექტის ფარგლებში სამ თვითმმართველ ქალაქში – ბათუმში, ქუთაისსა და ფოთში სამოქალაქო სექტორისა და მედიის წარმომადგენლების მიერ თვითმმართველობის საქმიანობის სხვადასხვა მიმართულების მონიტორინგი განხორციელდა. დღეს ამ მონიტორინგის შედეგები მედიის და არასამთავრობო ორგანიზაციების წარმომადგენლებს გავაცანით. ექსპერტებმა თითოეული თვითმმართველი ქალაქიდან თავიანთი კვლევის შედეგები წარმოადგინეს. ამ პროექტის ფარგლებში შექმნილია ვებ-გვერდი www.lg-monitoring.ge (http://www.lg-monitoring.ge/index.php/en/), სადაც ამ მონიტორინგის შედეგებია განთავსებული და ვფიქრობთ, მომავალშიც გავაგრძელოთ საინტერესო ინფორმაციების გავრცელება. რაც შეეხება კონკრეტულ მოცემულობებს, რომლებიც თვითმმართველ ქალაქებში გამოიკვეთა, შეგვიძლია აღვნიშნოთ, რომ ძირითადი პრობლემა გამჭვირვალობის და ინფორმაციის მოძიების კუთხით გვხვდება, შესაბამისად, სამოქალაქო სექტორის ჩართულობის კომპონენტებიც დაბალია. მართალია, ეს მონაცემი ცოტათი მაღალია 8-10 წლის წინანდელ მონაცემზე, მაგრამ ის ძირითადი შედეგები, რაც ჩართულობის კუთხით უნდა გვქონდეს, ყველა თვითმმართველ ქალაქში პრობლემატურია. ვფიქრობ, თვითმმართველობის რეფორმა სასწრაფოდ არის გასატარებელი, რადგან ძალიან ბევრი წელი დავკარგეთ. მაგრამ სამოქალაქო სექტორმა პარალელურ რეჟიმში, ახალი თვითმმართველობის არჩევნების შემდეგ უნდა განაგრძოს და აქტიურად დააკვირდეს თვითმმართველობის საქმიანობას. ძალიან დიდი როლი უნდა ჰქონდეს ამ ყველაფერში მედიასაშუალებებსაც. მონიტორინგი 9 თვის განმავლობაში გრძელდებოდა, ხოლო უშუალოდ მუნიციპალიტეტებში მონიტორინგი 5-6 თვე გაგრძელდა. ყველაზე დიდი პრობლემა ინფორმციის მოწოდების კუთხით გამოვლინდა. ერთ-ერთ თვითმმართველ ქალაქში ექსპერტებს მოთხოვნილი ინფორმაციიდან მხოლოდ 50% მიაწოდეს. ამის მიზეზები ცალკე შესწავლის საგანია, მაგრამ რეალურად ძალიან ბევრი თემა და საკითხია დასალაგებელი თვითმმართველობებში და ამის დალაგების ერთგვარი საშუალება სწორედ თვითმმართველობის რეფორმაა,” _ აცხადებს თორდინავა.
პროექტის კოორდინატორი ნათია დაღელიშვილი “გურია ნიუსთან” საუბრისას აღნიშნავს, რომ “დაფიქსირდა უამრავი შემთხვევა, სადაც რეორგანიზაციას არასწორი ფორმა ჰქონდა მიღებული და ადამიანები სამსახურიდან გათავისუფლდნენ ახსნა-განმარტების გარეშე”.
“მონიტორინგს სამი სხვადასხვა არასამთავრობო ორგანიზაციის წარმომადგენელი უშუალოდ თითოეულ თვითმმართველ ქალაქში ახორციელებდა, ანუ ჯამში 9 ექსპერტი გვყავდა, რომლებიც თემებზე მუშაობდნენ. ძირითადი პრობლემები გამჭვირვალობასთან და საჯარო ინფორმაციის მოთხოვნასთან დაკავშირებით იყო. თითქმის შეუძლებელი გახლდათ იმ ინფორმციის მიღება, რასაც მონიტორინგის განხორციელებისას ექსპერტები ითხოვდნენ, ასევე გაწეული ხარჯების შესახებ ინფორმაცია არ ემთხვეოდა ბიუჯეტს, გამოვლინდა ინფრასტრუქტურული ხასიათის და საკადრო პრობლემები. ამ პრობლემების გადაჭრის გზები ჩვენს ექსპერტებს თემების მიხედვით აქვთ მოცემული. მეტი გამჭვირვალობა უნდა იყოს თვითმმართველობებში, საზოგადოებას უნდა ჰქონდეს საკრებულოს სხდომებზე დასწრების საშუალება, საიტებზე უნდა იყოს მუდმივად განახლებული ინფორმაცია და ა.შ.” _ აცხადებს დაღელიშვილი.
შეგახსენებთ, რომ პროექტი “დემოკრატიის მხარდაჭერის ეროვნული ფონდის (NED) ფინანსური მხარდაჭერით ხორციელდება. როგორც ორგანიზაციის წარმომადგენლები აცხადებენ, ისინი უახლოეს მომავალში საზოგადოების ჩართულობის დონის ასამაღლებლად მონიტორინგის განხორციელებას დაიწყებენ.
