_ ადგილობრივ ხელისუფლებას სურს, სოფლის რწმუნებულმა ხელი მოაწეროს დოკუმენტს, რომელშიც წერია, რომ ჩვენს სოფელში სოფლის მხარდამჭერი პროგრამით გზა მოიხრეშა და ეს პრობლემა მოგვარდა. სოფლის რწმუნებული კი ამას არ აკეთებს, რადგან სამუშაოები არ არის დასრულებული. მხარს ვუჭერთ რწმუნებულს. ასევე, მოვითხოვთ, რომ თუ ჩვენს სოფელში გზის გაკეთება უნდათ, ერთხელ და სამუდამოდ მოაგვარონ ეს პრობლემა. შეიძლება, ყოველთვის პრობლემატური იყოს ეს საკითხი? _ გვითხრა სოფლის მოსახლეობამ.
სოფელ მთისპირის რწმუნებულის, ქეთევან ჯინჭარაძის თქმით, თავდაპირველად მას ოზურგეთის მუნიციპალიტეტის ინფრასტრუქტურის სამსახურიდან ავთანდილ მახარაძე დაუკავშირდა და უთხრა, რომ საბუთზე ხელი მოეწერა.
ქეთევან ჯინჭარაძე: _ მოვთხოვ სოფელში ხარისხიანად შესრულდეს ის სამუშაოები, რაც კეთდება.
_ ქალბატონო ქეთევან, როგორც ვიცით, თქვენთან მოიტანეს საბუთი, რომელზეც ხელი უნდა მოგეწერათ ჩატარებული სამუშაოების შესრულებაზე, თქვენ კი ამბობთ, სამუშაოები არ არის დასრულებული. ვინ გთხოვდათ ხელის მოწერას?
_ პირველად ინფრასტრუქტურის სამსახურის წარმომადგენელმა ავთო მახარაძემ დამირეკა. მანამდე კი დავუკავშირდი ოზურგეთის მუნიციპალიტეტის გამგებელს, კონსტანტინე შარაშენიძეს და ვუთხარი, რომ არ მომწონს მასალა, რომლითაც გზა კეთდება და უხარისხოდ გაკეთებულ საქმეს ხელს არ მოვაწერ,-მეთქი. მან მითხრა, როგორც გინდა, ისე გააკეთეო. მე არ მოვაწერე ხელი, რადგან სამუშაოები არ არის დასრულებული. გუბერნატორთან ვიყავი მისული და საქმის კურსშია.
სამუშაოების შემსრულებლის შპს “ბათვანის” წარმომადგენლის, შოთა მჟავანაძის თქმით, სამუშაოები ჯერ არ არის დასრულებული და მისთვის გაუგებარია მოსახლეობის პრეტენზია:
_ ვმუშაობთ და სამუშაოები ჯერ არ დასრულებულა.
_ მოსახლეობა პრეტენზიას გამოთქვამს შეუსრულებელი სამუშაოების გამო.
_ უცებ არ კეთდება ყველაფერი.
_ როდის დაიწყო და უნდა დასრულდეს სამუშაოები?
_ ხელშეკრულების დადებისთანავე დაიწყო სამუშაოების შესრულება და 1 აპრილამდე არის ვადა. ჩვენ მხოლოდ გზას ვაკეთებთ, _ გვითხრა შოთა მჟავანაძემ.
ავთანდილ მახარაძე ჩვენთან სატელეფონო საუბრის დროს ამბობს, რომ მას დოკუმენტებთან საქმე არ აქვს და ის მხოლოდ დაწყებულ სამუშაოებს აკვირდება:
_ პერიოდულად ამოვდივარ და ვამოწმებ სამუშაოს. მე არ ვიცი, რას ითხოვს ხალხი, კომისიაც იყო და არაფერი პრობლემა არ არის.
_ მოსახლეობის თქმით, გზის სამუშაოები არ არის დასრულებული.
_ სამუშაოების 30% არ არის შესრულებული.
_ მაშინ ხელის მოწერას რატომ ითხოვთ სოფლის რწმუნებულისგან?
_ მე ვთხოვ ხელის მოწერას? მე მაგ დოკუმენტთან არაფერი შეხება არ მაქვს. მინდა, რომ ჩემს სოფელში კარგად გაკეთდეს ყველაფერი.
_ სოფლის მცხოვრებლების თქმით, თქვენ წლების წინ სოფელ მთისპირის გამგებელი იყავით და მოსახლეობამ სამუშაო კაბინეტის კარები აგიჭედათ, რადგან მათ არ ეხმარებოდით.
_ რა კარები ამიჭედეს?! მაშინ მოდაში იყო რევოლუციები, თითქოს ამით რაღაცას აკეთებდნენ. მე თვითონ დავწერე განცხადება და წავედი, _ თქვა მახარაძემ.
აქციის მონაწილეებმა “გურია ნიუსთან” იმ პრობლემებზე ისაუბრა, რომელიც სოფელს წლების განმავლობაში აწუხებს.
ლევან ბოლქვაძე: _ გზა ჩვენ არ გვაქვს და წყალი, ელექტრო ბოძების პრობლემაცაა და არავინ არ არის ჩვენი პატრონი.
რუსუდან თალაკვაძე: _ ორი თვეა, უწყლოდ ვართ და აგერ სკოლის გვერდით კი წყალს მიაქვს ყველაფერი. წყალი და გზა უნდა გაკეთებულიყო, მაგრამ არ გაკეთებულა. გზა დაიწყეს, მაგრამ წყლის პრობლემა ისევ პრობლემად რჩება. ბაღში და სკოლაში ბავშვები ნორმალურად ვერ დადიან, რადგან ინგრევა გზა.
ელენე მახარაძე: _ რამდენიმე წლის წინ სოფლიდან გავუშვით ადამიანი, რომელსაც კარგი არაფერი გაუკეთებია ჩვენი სოფლისთვის _ ეს არის ავთო მახარაძე. ახლა გამგეობაში ინფრასტრუქტურის სამსახურში დაუსაქმებიათ და ახლა იქიდან გვიპირებს დაქცევას. საერთოდ თუ ჰყავს ამ ქვეყანას პატრონი?! იქნებ, კაბინეტიდან გამოვიდნენ ჩინოვნიკები და ჩვენი პრობლემებით დაინტერესდნენ!
ეთერ მახარაძე: _ ტალახი ამოიღეს მდინარიდან და დაყარეს გზაზე. ეს არის გაკეთებული? გზა და წყალი უნდა გაკეთებულიყო და მაგრამ ხედავთ რამეს გაკეთებულს?
ნანა ჭეიშვილი: _ განათლების და მეცნიერების სამინისტროს პროექტით ჩვენს სკოლას ემსახურება მიკროავტობუსი, მაგრამ ამ გზის გადამკიდე მძღოლები ყოველდღე საყვედურით მოდიან. წყალი შუაგზაზე მიდის და ეს პრობლემა რომ მოგვარდეს, ხომ შეიძლება? სწორედ ამ წყალმა ნახევარი სტადიონი ჩაიტანა.
“გურია ნიუსი” ამ საკითხთან დაკავშირებით მუშაობას გააგრძელებს.
